وزیراعظم شہباز شریف نے ترکیہ میں زلزلے کے بعد آفت زدہ علاقوں میں ریسکیو ٹیمیں بھیجنے کی ہدایات جاری کر دی ہیں۔
پاکستان کی وزارتِ خارجہ کی جانب سے جاری کردہ بیان میں کہا گیا ہے کہ نیشنل ڈیزاسٹر مینجمنٹ اتھارٹی تمام دستیاب وسائل کو بروئے کار لاتے ہوئے ، تربیت یافتہ اربن سرچ، ریسکیو ٹیموں کو جو زیادہ تر پاک فوج کے سابق ماہرین اور ایکسپرٹس پر مشتمل ہے کو متعلقہ آلات اور ادویات کے ہمراہ ترکیہ روانہ کیا جا رہا ہے۔
وزیراعظم شہباز شریف کا صدر ایردوان سے ٹیلی فونک رابطہ
اس سے قبل وزیراعظم شہبازشریف نے ترکیہ کے صدر رجب طیب ایردوان کو ٹیلی فون کرتے ہوئے صدر ترکیہ سے زلزلے سے ہونے والی تباہی پر افسوس کا اظہار کیا ہے۔
انہوں نے صدر ایردوان کے ساتھ ہونے والی بات چیت میں قیمتی انسانی جانوں کے ضیاع پر گہرے افسوس کا اظہار کیا ہے۔
غمزدہ خاندانوں سے دلی ہمدردی اور تعزیت کرتے ہوئے پاکستان کے وزیراعظم شہباز شریف نے کہا ہے کہ آزمائش کی اس گھڑی میں پاکستان اپنے برادر ملک ترکیہ اور ترک عوام کے شانہ بشانہ کھڑا ہے۔
انہوں نے کہا کہ زلزلے کی تباہی سے نمٹنے میں پاکستان ، حکومتِ ترکیہ اور ترک عوام سے بھرپور تعان جاری رکھے گا۔
وزیراعظم شہباز شریف نے کہا کہ موسمیاتی تبدیلیوں کی وجہ سے تباہی کی شدت میں مسلسل اضافہ ہوتا جا رہا ہے۔
انہوں نے کہا کہ قدرتی آفات اور موسمیاتی تباہی کسی سرحد، خطے اور مخصوص قوم تک محدود نہیں رہی ہیں۔
وزیراعظم شہباز شریف نے اس موقع پر جان بحق افراد کی مغفرت ، اہل خانہ کے لئے صبر جمیل اور زخمیوں کی جلد صحت یابی کی دعا کی۔
ترکیہ کے صدر رجب طیب ایردوان نے ٹیلی فونپر بات چیت کرتے ہوئے پاکستان کی حمایت کرنے پر وزیراعظم شہبازشریف کا شکریہ ادا کیا ۔
صدر ایردوان نے کہا کہ آپ کے اور پاکستانی عوام کے جذبات کی قدر کرتا ہوں
پاکستان کے دفترِ خارجہ کے مطابق انقرہ میں پاکستان مشن متعلقہ ترک حکام کے ساتھ مسلسل رابطے میں ہے، زلزلے کی آفت کے بعد بحالی اور تعمیر نو کے مراحل میں ترکیہ کے ساتھ کام جاری رکھیں گے۔