ترکیہ کے دس صوبوں میں 6 فروری صبح سویرے چار بجکر 17 منٹ پر 7٫7 کی شدت کے زلزلے کے جھٹکوں کے بعد اسی روز ان تمام علاقوں میں ایک بار پھر دوپہر ایک بجکر 24 منٹ پر 7٫6 کی شدت کے زلزلے کے نتیجے میں ترکیہ میں 36 ہزار کے لگ بھگ افراد جاں بحق اور 70 ہزار سے زاہد افراد زخمی ہوئے ہیں تو 2 لاکھ 11 ہزار رہائشی مکانات مسمار ہوچکے ہیں۔
اقوام متحدہ کی جانب سے صدی کی آفت قرار دیے جانے کے بعد ترکیہ کےکے ان زخموں پر مرہم رکھنے کے لیے اور زلزلے کے متاثرین کی امداد کے لیے آٹھ بڑے قومی چینلز اے ٹی وی، فاکس، کنال ڈی، کنال 7، شو ٹی وی، اسٹار ٹی وی، ٹی آر ٹی 1 اور ٹی وی 8نے مشترکہ طور پر آج رات آٹھ بجے ٹیلی تھون سروس شروع کرنے کا اعلان کیا ہے۔
ترکیہ کے دس صوبوں ( شہروں اور اس کے گردو نواح پر مبنی صوبے) غازی انتیپ، ادیامان، حطائے، قہرامان ماراش، شانلی عرفہ، دیار باقر، ملاتیہ، عثمانیہ، ادانہ اور کلیس کے زلزلے کے متاثرین کی امداد کے لیے ترکیہ کے آٹھ بڑے چینلز کے مشہور اینکر پرسنز، نہایت حطیب اولو، پیلن چفت، چاعلا شکل ، تومیر دوعرو، نازلی چیلک، آجون الیجالی، دینز بائرام اولو اور دیدم ارسلان اولو یلماز پروگرام پیش کریں گے اور ترکیہ میں آنے والے زلزلے کے متاثرین کی امداد کے لیے دنیا بھر سے امدادی دینے کی اپیل کریں گے۔
پروگرام میں بڑی تعداد میں ترکیہ کے تاجروں، کھلاڑیوں، فنکاروں ، سیاستدانوں اور غیر ممالک میں مقیم ترک اور غیر ملکی باشندوں کی شرکت کی توقع کرنے کے ساتھ ساتھ ریکارڈ حد تک رقم جمع کرنے کی امید ظاہر کی جا رہی ہے۔ اس پروگرام میں جمع ہونے والے عطیات کی رقم کو ترک قزلائی (ہلال احمر) اور آفاد (ڈیزاسٹر اینڈ مینجمنٹ) کے اکاونٹ میں جمع کروائیں گے۔
ٹی وی چینلز:
ATV, FOX, Kanal D, Kanal 7, Show TV Star TV TRT -1اورTV8۔
براہ راست ٹیلی تھون نشریات: 15 فروری بروز جمعرات ، رات 8 بجے (ترکیہ ٹائم)