صدر رجب طیب ایردوان نے ترکیہ کی تاریخ میں طویل عرصے حکمران کی حیثیت سے فرائض ادا کرتے ہوئے نیا ریکارڈ قائم کیا ہے ۔ وہ صدر کا عہدہ سنبھالنے سے قبل 2003 سے 2014 تک ملک کے وزیراعظم کی حیثیت سے فرائض سرانجام دے چکے ہیں تو 2014 سے انہوں نے ملک میں پارلیمانی نظام کے تحت (جس میں صدر کے اختیارات برائے نام ہوتے ہیں ) صدر کے فرائض ادا کیے جبکہ وہ 2018 میں ملک میں صدارتی نظام قائم ہونے کے بعد پہلی مرتبہ پہلے ہی راونڈ میں باون فیصد ووٹ حاصل کرتے ہوئے صدر منتخب ہوئے تھے اور اب سن 2023 میں نئی ترک صدی کے موقع پر انہوں نے پہلے راونڈ میں 49٫5 فیصدووٹ حاصل کیے لیکن 1+50 ووٹ حاصل نہ کرنے کی وجہ سے 28 مئی کو صدارتی انتخابات کا دوسرا راونڈ ہوا جس میں انہوں نے ایک بار پھر 52 فیصد ووٹ لیتے ہوئے کامیابی سے ہمکنار ہوئے ۔
نئے صدارتی دور کے آغازکے لیے انہوں نے دنیا بھر کے اہم رہنماوں کو حلف برداری کی تقریب میں شرکت کے دعوت نامے ارسال کیے تھے ۔
حلف برداری کی تقریب دراصل ترکیہ کی قومی اسمبلی میں منعقد ہوئی۔ صدر ایردوان حلف اٹھانے کے لیے جب قومی اسمبلی پہنچے تو شدید بارش کا سلسلہ جاری تھا جس پر صدر ایردوان نے اپنے ہاتھوں میں خود چھتری اٹھا رکھی تھی۔ ( ہمارے رہنماوں کے لمحہ فکریہ ہے یہ )
پارلیمنٹ پہنچنے پر پارلیمنٹ کے عبوری اسپیکر (اسپیکر کے انتخاب تک اراکینِ پارلیمنٹ میں سے عمر رسیدہ رکن، اسپیکر کے طور پر فرائض ادا کرتا ہے اور اس مرتبہ یہ فرائض ان کے اتحاد میں شامل نیشنلسٹ موومنٹ پارٹی MHP کے چئیرمین دولت باہچے لی کررہے تھے ) تو انہوں ہی نے صدر ایردوان کا استقبال کیا۔
پارلیمنٹ پہنچنے پر سب سے پہلے انہیں گارڈ آف آنر پیش کیا گیا۔
صدر ایردوان جب پارلیمنٹ کے اندر داخل ہوئے تو تمام اراکینِ پارلیمنٹ نے کھڑے ہو کر صدر رجب طیب ایردوان کا خیر مقدم کیا
یہاں پر عبوری اسپیکر دولت باہچے لی نے انہیں صدر منتخب ہونے کی دستاویز کو خصوصی فریم میں انہیں پیش کیا۔
اپنی اس دستاویز کو حاصل کرنے کے بعد صدر ایردوان نے اراکینِ پارلیمنٹ کے روبرو حلف اٹھایا۔ (یہاں اپنے ناظرین کو بتاتا چلوں، اراکین پارلیمنٹ باری باری اپنی ناموس اور وقار کی قسم کھاتے ہوئے خود ہی حلف کی عبارت پڑھتے ہیں)
"میں صدر ہونے کی حیثیت سے ملک کی بقا اور آزادی، وطن اور قوم کی ناقابل تقسیم سالمیت، قوم کی بلا شرط اور غیر مشروط خودمختاری کا تحفظ کرنے؛ آئین ، قوانین کی بالادستی ، ڈیموکریسی، اتاترک کےاصولوں، انقلابات اور سیکولراز م ترکیہ جمہوریت کی پاسداری کرنے، قوم کے امن و سکون اور رفاہ، قومی یکجتی ، انصاف کے تقاضوں کو پورا کرنے ،اور تمام انسانی حقوق اور بنیادی آزادیوں سے مستفید ہونے کے آئیڈیل سے انحراف نہ کرنے، جمہوریہ ترکیہ کی شان و شوکت کے تحفظ اور اس کی سربلندی کے لیے تفویض کردہ فرائض کو غیر جانبداری اور پوری تندہی سے کام کرتے ہوئے ادا کرنے کو عظیم ترک قوم اور تاریخ کے سامنے اپنی ناموس اور وقار کی قسم کھا تا ہوں ۔
حلف اٹھانے کے بعد تمام اراکین پارلیمنٹ نے کھڑے ہوکر تالیاں بجائیں اور اپنی خوشی کا اظہار کیا تاہم اس دوران ری پبلیکن پیپلز پارٹی کے اراکین اپنی نشستوں پر برجمان ہی رہے۔
حلف اٹھانے کے بعد صدر ایردوان نے مزارِ اتاترک پر حاضری دی اور پھولوں کی چادر چڑھائی اور وزٹنگ بک میں اپنے تاثرات قلم بند کیے۔
مزارِ اتاترک پر حاضری دینے کے بعد صدر رجب طیب ایردوان اپنے صدارتی محل روانہ ہوئے تو سڑک کے دونوں جانب عوام نے شدید بارش کے باوجود ان کی گاڑی پر پھول نچھاور کیے ۔
صدارتی محل کی تقریب میں 78 ممالک کے خصوصی نمائندوں نے شرکت کی جن میں 21 ممالک کے سربراہان ِ مملکت اور 13 ممالک کےوزرائے اعظم شامل تھے جن میں پاکستان کے وزیراعظم میاں محمد شہباز شریف بھی نمایاں تھے۔
صدر ایردوان گھوڑ سوار دستے کے ہمراہ جب صدارتی محل پہنچے تو انہیں 101 توپوں کی سلامی دی گئی۔ شدید بارش کی وجہ سے اس تقریب کا اہتمام صدارتی محل کے باہر لان میں نہیں بلکہ بڑے ہال میں کیا گیا تھا جہاں چار ہزار مہمان اپنی اپنی نشستوں پر تشریف فرما تھے۔
صدر ایردوان اس ہال میں اپنی اہلیہ ایمینے ایردوان کے ہمراہ داخل ہوئے اور سب مہمانوں نے کھڑے ہو کر ان کا خیر مقدم کیا۔ صدر ایردوان نے ہال میں موجود حکومتی اور مملکتی سربراہان سے پہلے مصافحہ کیا اور پھر خطاب کے لیے روسٹرم پر تشریف لائے ۔
پروگرام کاباقاعدہ آغازصدارتی سینفینی آرکسٹرا کی دھن سے ہوا۔ اس کے بعد 6 فروری کے زلزلے میں جان بحق ہونے والے افراد کے لیے ایک منٹ کی خاموشی اختیار کی گئی اور پھر قومی ترانہ بجایا گیا۔
صدر ایردوان نے اس موقع پر خطاب کرتے ہوئے سب سے پہلے اپنے تمام مہمانوں کو شکریہ ادا کیا۔
انہوں نے اپنے خطاب میں کہا کہ ہم جمہوریہ ترکی کی شان و شوکت کے تحفظ، اس کی ساکھ کو بڑھانے اور دنیا میں اس کا نام روشن کرنے کے لیے 5 سال تک پوری محنت اور دل جمعی سے کام کرتے رہیں گے۔ میں اپنے تمام 27 ملین 835 ہزار بھائیوں کا شکریہ ادا کرنا چاہتا ہوں، جنہوں نے ہمیں ایک بار پھر صدارت کے لائق سمجھا۔ انہوں نے 85 ملین ترک باشندوں کو سیاسی نظریات، مسلک یا فرقے سے قطع نظر ایک دوسرے کو گلے لگانے کی ضرورت پر زور دیتے ہوئے کہا کہ ہم نے اپنے 21 سالہ دور حکومت میں ہمیشہ اس حساسیت کو برقرار رکھا ہے اور اب اللہ کے حکم سے، ترک صدی کا آغاز ہوچکا ہے۔ ترکیہ کی ترقی کی دروازے پوری طرح کھل چکے ہیں۔ میں اس موقع پر اپنے صحافیوں، ادیبوں، سول سوسائٹی، فنکاروں، سیاستدانوں اور تمام اپوزیشن جماعتوں کو قومی یکجہتی اور بھائی چارے کی مہم شروع کرنے کی دعوت دیتا ہوں۔
انہوں نے کہا کہ آج متحد ہونے کا دن ہے۔ آئیے سب مل کر ترک صدی کی تعمیر کا ایک ساتھ آغاز کرتے ہیں۔
صدر ایردوان کے خطاب کے بعد صدارتی محل میں یہ تقریب اپنے اختتام کو پہنچی۔
صدر ایردوان نے اسی شام نئی ترک صدی کے لیے اپنی نئی کابینہ کا اعلان بھی کیا۔ اس کابینہ میں پرانی کابینہ کے صرف دو نام شامل تھے جن میں وزیر صحت فخر الدین قوجہ اور وزیر ثقافت و سیاحت مہمت نوری ایر سوئے جبکہ باقی تمام وزراء اس کابینہ میں نئے ہیں۔
یہاں پر اپنے ناظرین کو خصوصی طور پر اس بات سے آگاہ کروں کہ ترکیہ میں نیا وزیر حلف اٹھانے سے قبل میڈیا کے سامنے پرانےیا سابق وزیر سے ملاقات کرتا ہے ، نیا وزیر ، سابق وزیر کے کار ناموں کو اجاگر کرتا ہے اور مستقبل میں ان کی ہر موقع پر رہنمائی کرنے سے بھی آگاہ کرتا ہے اور دوونوں وزراء ایک دوسرے کو پھولوں کا گلدستہ پیش کرتے ہیں۔ کاش کہ ہمارے ہاں بھی ایسے ہی خوشگوار ماحول میں وزراء کی تبدیلی ہو جس کے عوام پر بھی مثبت اثرات مرتب ہوں۔
بعد میں صدر ر رجب طیب ایردوان نے غیر ممالک سے آئے مہمانوں کے اعزاز میں قصر چانکایہ میں عشائیہ دیا ۔
اس عشائیہ کی خاص بات (میرےذاتی نکتہ نظر سے ) وزیرِ اعظم شہباز شریف کی ترک صدر رجب طیب ایردوان اور ان کی اہلیہ سے غیر رسمی گفتگو تھی، جس کا مرکز پاکستانی مینگو زتھے۔
وزیراعظم شہباز شریف، ترک صدر ایردوان اور ان کی اہلیہ امینہ ایردوان کے درمیان خوش گوار انداز میں گفتگو ہوئی۔
وزیرِ اعظم شہباز شریف نے کہا ہے کہ آپ کے بطور صدر انتخاب پر پاکستان کے عوام ترک عوام سے زیادہ خوش ہیں۔(یہ بالکل صحیح بھی ہے اور میں اس موضوع کو اپنے اس سے قبل کے ویڈیو میں پیش بھی کرچکا ہوں )
اس موقع پر شہباز شریف نے کہا کہ آپ کے لیے آموں کا تحفہ لایا ہوں، آدھے آم اپنے بھائی اور آدھے بہن کے لیے ہیں
وزیرِ اعظم شہباز شریف کی بات پر صدر ایردوان اور ان کی اہلیہ بے ساختہ مسکرا دیے اور انہوں نے شکریہ ادا کیا۔
صدر ایردوان نے مسکراتے ہوئے جواب دیا کہ مجھےعلم ہے کہ پاکستان کے آم بہت لذیذ اور میٹھے ہوتے ہیں۔
ایردوان کی بیگم نے بھی شہباز شریف کی طرف سے پاکستانی مینگوز کے تحفے کا شکریہ ادا کیا۔
وزیرِ اعظم شہباز شریف نے کہا کہ اب واپس روانہ ہو رہا ہوں، آپ کی دعوت کا بہت شکریہ، آپ نے ہمیں اپنی خوشیوں میں شریک کیا۔
شہباز شریف نے کہا کہ آپ کے تمام اہلِ خانہ کو مبارک باد پیش اور نیک تمناؤں کا اظہار کرتے ہیں۔
صدر ایردوان نے نیک تمناؤں کے اظہار پر وزیرِ اعظم شہباز شریف کا خصوصی شکریہ ادا کیا اور کہا کہ آپ کا شکریہ کہ آپ تشریف لائے۔