امریکہ میں موجود اوورسیز پاکستانیوں کے پلیٹ فارم ” پاکستانی امریکن پولیٹیکل ایکشن کمیٹی” نے تاریخ میں پہلی مرتبہ امریکہ میں اراکین کانگریس کو پاکستان میں انسانی حقوق کی پامالی کے سلسلے میں رجوع کیا اور امریکی حکام کو اس پر توجہ دینے اور انسانی حقوق کی پامالی پر پاکستانی حکام کو متنبہ کرنے اور باز رکھنے جیسے اقدامات پر زور دیا۔
امریکی کانگریس کے 65 اراکین کے دستخط شدہ مسودے کا بلنکن کو انتباہ ایک ایسی پیش رفت ہے جس کا پاکستانی امریکن پولیٹیکل ایکشن کمیٹی نے خیر مقدم کیا ہے کمیٹی کا دعوٰی ہے کہ 86 اراکین کانگریس اب تک ان کی درخواست پر دستخط کر کے ان کے موقف کی تائید کر چکے ہیں۔
انسانی حقوق کی بدترین پامالی پر چیئرمین تحریک انصاف عمران خان نے بھی پاکستان میں وچ ہنٹنگ کے سلسلے میں امریکی اراکین کانگریس سے مدد کی درخواست کی تھی۔ پاکستانی امریکن پولیٹیکل ایکشن کمیٹی کے فوکل پرسن نے کہا ہے کہ انسانی حقوق کی بدترین پامالی کی درخواست پر 86 اراکین کانگریس کے دستخط کے بعد یہ درخواست پاکستانی حکام کے لئے چارج شیٹ بھی بن سکتی ہے۔
پاکستان میں انسانی حقوق کی پامالی اور 9 مئی کے واقع کے بعد خواتین، بچوں، بزرگوں کی پکڑدھکڑ ، گرفتار افراد پر تشدد اور خواتین کو دوران گرفتاری ہراساں کرنے اور غیرانسانی سلوک پر دینا بھر میں اوورسیز پاکستانیوں میں اضطراب ، غم و غصہ پایا جاتا ہے۔ 9 مئی 2023 کو سابقہ وزیراعظم پاکستان و چیئرمین تحریک انصاف عمران خان کی رینجرز کے ہاتھوں احاطہ عدالت سے گرفتاری کے بعد ملک بھر میں تحریک انصاف کے ورکرز اور عوام سڑکوں پر نکل آئے اور ملک بھر میں ہنگامے اور احتجاج کے عمل کے دوران نامعلوم افراد کی طرف سے کورکمانڈر ہاؤس لاہور میں توڑ پھوڑ اور آگ لگانے کے واقعات رونما ہوئے۔
ان واقعات کے بعد پاکستان کی اسٹیبلشمنٹ نے ان واقعات کا کلی اور واضح ذمہ دار تحریک انصاف کی قیادت اور ورکرز کو ٹھہرایا اور ملک بھر میں کریک ڈاؤن کے ذریعے دس ہزار سے زائد افراد کو گرفتار کیا گیا جن میں سینکڑوں کی تعداد میں خواتین اور کم عمر بچے بھی شامل تھے۔
پاکستان میں اسٹیبلشمنٹ اور حکومتی ذرائع کا کہنا ہے کہ امریکہ میں مقیم پاکستانی کمیونٹی کی جانب سے متعلقہ مہم پاکستانی افواج کے لئے امریکی امداد میں رکاوٹ بن سکتی ہے جس کے نتائج تحریک انصاف کے لئے ایک میوگیٹ سکینڈل سے کم نہیں ہوں گے۔
