ایردوان نے نتَن یا ہو کو کھری کھری سنا دیں، تمہارے انجام کا وقت آن پہنچا ہے ، اسرائیل ایک دہشت گرد ریاست ہے

تمہارے پاس ایٹم بم ہے یا نہیں؟ سکت ہے تواس کا اعلان کرو

نتَن یا ہو  تمہارے پاس ایٹم بم ہے یا نہیں؟ اتنے ہی طاقتورہو تو پھر اس کا اعلان کرو ۔ میں بڑے واضح اور واشگاف  الفاظ میں کہہ رہا ہوں ”  اسرائیل ایک دہشت گرد ریاست ہے۔ ” تم  جتنے  چا ہو ایٹم بم بنا لو، اب تمہارے انجام کا وقت آن پہنچا ہے ۔ بس اب تم جانے والے ہو ۔

صدر ایردوان نے  ان خیالات کا اظہار ترکیہ کی قومی اسمبلی  میں  جسٹس اینڈ ڈولپمینٹ پارٹی  کے  گروپ اجلاس سے خطاب کرتے ہوئے کیا۔

صدر ایردوان نے کہا ہے کہ اگر ہم  سیاسی  معاشی، اور فوجی شعبوں کے ساتھ ساتھ تمام دیگر شعبوں  میں مضبوط اور مستحکم نہیں  ہوں گے تو   یہ لوگ ہمیں اس سرزمین پر بھی زندہ رہنے کا حق نہیں دیں گے۔  یہ برسوں تک ہماری ہی سرزمین  کو آرمینیا  میں شامل کرنے کے خواب دیکھتے رہے اور ہم نے انہیں قارا باغ  میں ایسا سبق سکھایا ہے جس پر یہ سب خاموش ہو کر  رہ گئے ہیں۔

اب اسرائیل بھی ایسے ہی فریب  میں مبتلا ہے  اور مایوسی اسرائیل  کا  مقدر  بن چکی ہے۔

نیتن یا  ہو اب تمہارے انجام کا وقت  آن پہنچا ہے

نتَن یا ہو تم اپنے دائیں اور بائیں جانب دو وزراء کو اکھٹے کرتے ہوئے پریس کانفرنس سے خطاب کرتے  ہو اور سمجھتے ہو یہ دونوں وزراء تمہیں بچالیں گے۔  نہیں ایسا ہرگز نہیں ہوگا، تمہارا انجام بہت قریب ہے  اور بس اب   تم جانے ہی والے ہو۔

میں واضح اور واشگاف الفاظ میں کہتا ہوں  اسرائیل ایک دہشت گرد تنظیم ہے

صدر ایردوان نے  اپنے خطاب میں کہا کہ میں واضح طور پر  کہنا چاہتا ہوں 7 اکتوبر سے   غزہ کے خلاف اسرائیلی بربریت ہمارے ایجنڈے میں سرفہرست ہے۔ اسرائیلی حکومت جسے امریکہ اور مغربی ممالک کی لامحدود حمایت حاصل ہے، 40 دنوں سے بلا روک ٹوک اپنے قتل عام کا سلسلہ جاری رکھے ہوئے ہے۔ جان بوجھ کر اسکولوں، مساجد، گرجا گھروں، اسپتالوں، بازاروں، عمارتوں اور سڑکوں کو نشانہ بنا کر اسرائیل ایک شہر اور اس کے لوگوں کو مکمل طور پر تباہ کرنے کی حکمت عملی پر عمل پیرا ہے اور اسی لیے میں برملا اورو اشگاف الفاظ میں کہتا ہوں ” اسرائیل ایک دہشت گرد ریاست ہے” ۔  

صدر ایردوان نے کہا کہ آپ حماس کو دہشت گرد تنظیم قرار دیتے ہیں لیکن  حماس ایک سیاسی جماعت ہے جو فلسطین میں انتخابات میں کامیابی حاصل کرنے کے بعد ہی برسر اقتدار آئی ہے اور   الیکشن جیتنے کے بعد آپ نے اس کے حقوق چھین لیے۔ اسرائیل کے ہاتھوں اب تک غزہ کے تقریباً 12 ہزارافراد  ہلاک ہونے والوں میں سے دو تہائی بچے اور خواتین ہیں۔ اسرائیلی انتظامیہ غزہ کے بچوں، خواتین اور شہریوں کے خلاف انسانی تاریخ کے سب سے ظالمانہ  حملے جاری رکھے ہوئے ہیں۔ ہم نے غزہ میں 40 دنوں  میں  اخلاقیات، آداب، قانون کی دھجیاں اڑتے ہوئے دیکھی ہیں۔  جنگ  میں سب سے پہلے   بچوں، عورتوں، بوڑھوں اور بیماروں کو ہاتھ نہ لگانے کے اصول کی پاسداری کی جاتی ہے۔

کیا نتَن یا ہو تمہارے پاس ایٹم بم ہے یا  نہیں اگر اتنے ہی طاقتور ہو تو اس کا اعلان کرو

نتَن یا ہواتنی بڑی تعداد میں انسانوں کا قتلِ عام کرنے کے بعد اب تمہارا وزیر ایٹم بم استعمال کرنے کی دہمکی دیتا ہے۔  نتَن  یا ہو تمہارے پاس ایٹم بم ہے یا نہیں؟ اگر واقعی ہی اتنی   سکت رکھتے ہو تو پھر اس کا اعلان کرو۔  لیکن جان لو اب تمہارے انجام  کا وقت آن پہنچا ہے۔  تم جتنے مرضی ایٹم بم  اپنے پاس رکھ لو ،  اس سے کوئی فرق نہیں پڑتا ہے بس تمہارا انجام بہت قریب ہے۔

ایردوان نے کہا کہ  جو لوگ اسرائیل کے انسانیت کے خلاف جرائم کے خلاف آواز نہیں اٹھاتے  اور اسرائیلی انتظامیہ کو اسلحہ، گولہ بارود اور انٹیلی جنس سپورٹ فراہم  کرتے ہیں وہ بھی  ان جرائم میں برابر کے شریک ہیں۔

عالمی میڈیا کیوں خاموش ہے؟

روزانہ سینکڑوں بچے بموں کی زد میں آکر مرتے ہیں۔ یورپی یونین سے لے کر امریکہ تک سب خاموش ہیں۔  اسرائیل غزہ میں ہونے والے مظالم کا دنیا کے سامنے اعلان کرنے والے صحافیوں کو ان کے اہل خانہ سمیت قتل کر رہا ہے اور  بین الاقوامی میڈیا ادارے ایک بیان تک دینے سے قاصر ہیں۔  اقوام متحدہ کی سلامتی کونسل اپنے ملازمین کی حفاظت نہیں کرسکتی تو  اس نے  بھلا  غزہ کے شہریوں کی جانوں کی حفاظت  کیسے کرنی ہے؟  اسرائیلی وزراء نے کیمروں کے سامنے اعتراف کیا کہ ان کے پاس جوہری ہتھیار ہیں اور انٹرنیشنل اٹامک انرجی ایجنسی اس پر ایکشن لینے سے قاصر ہے۔  جو لوگ قرآن پاک کو جلانے والے بدمعاشوں کے اقدامات کی اجازت دیتے ہیں، فکر کی آزادی کا دعویٰ کرتے ہیں، وہ غزہ میں ہونے والے قتل عام پر ردعمل کا اظہار کرنے والے باضمیر لوگوں کو حراست میں لے رہے ہیں اور ان کی آواز کو خاموش کرنے کی ہر طرح سے کوشش کر رہے ہیں۔ یہ دہرا معیار نہیں تو کیا ہے؟  

کہاں ہیں یہ سربراہان مملکت، وزیر اعظم؟

صدر ایردوان نے کہا کہ یاد رکھیں، چارلی ہیبڈو کے واقعے میں 23 افراد ہلاک ہوئے تھے  اور سربراہان مملکت، وزرائے اعظم، سب  دنیا بھر سے پیرس میں اس مارچ میں شریک ہوئے اور وہاں موجود تھے۔ ویسے اب تقریباً 13 ہزار لوگ مر چکے ہیں۔ کہاں ہیں اس دنیا کے سربراہان مملکت اور  وزیراعظم ؟آئیں اور  غزہ  کے قتلِ عام پر بھی اپنا ردِ عمل ظاہر  کریں۔ کیا  آپ  انصاف پسند نہیں ہیں؟ یا پھر یہ صلیبی  اور ہلال  کا مسئلہ ہے۔ ہم اسے اب ایسے ہی دیکھ رہے ہیں۔