صدر مملکت آصف علی زرداری نے پاکستان اور ترکیہ کے درمیان عوامی رابطوں کو مزید فروغ دینے کے لیے روڈ اور ریل ٹرانسپورٹ کو بڑھانے پر زور دیتے ہوئے کہا ہے کہ یہ آمد و رفت کا سستا ذریعہ ہے جس سے نہ صرف دونوں ممالک کے درمیان روابط بڑھیں گے بلکہ دوطرفہ اقتصادی تعلقات میں بھی اضافہ ہوگا۔ صدر مملکت نے ان خیالات کا اظہار چیف آف ترک جنرل سٹاف جنرل متین گوراک سے گفتگو کرتے ہوئے کیا جنہوں نے جمعہ کو وفد کے ہمراہ ایوان صدر میں ان سے ملاقات کی۔
چیئرمین جوائنٹ چیفس آف سٹاف کمیٹی جنرل ساحر شمشاد مرزا اور پاکستان میں ترکیہ کے سفیر ڈاکٹر مہمت پاچاجی بھی ملاقات میں موجود تھے۔ صدر نے وفد کا خیرمقدم کرتے ہوئے کہا کہ پاکستان ترکیہ کے ساتھ مشترکہ مفاد کے تمام شعبوں میں باہمی فائدہ مند تعاون کو مزید گہرا کرنے کے لیے پرعزم ہے۔
انہوں نے دو برادر ممالک کے عوام کو مزید قریب لانے کے لیے دو طرفہ ثقافتی تبادلوں بالخصوص ادب اور شاعری کے شعبوں میں اضافے کی ضرورت پر زور دیا۔ صدر نے اس بات پر روشنی ڈالی کہ ترکیہ پاکستان کا مخلص دوست ہے اور دونوں ممالک کے درمیان گہرے برادرانہ تعلقات ہیں جنہیں دونوں فریقوں کے باہمی مفاد کے لیے مزید مضبوط کرنے کی ضرورت ہے۔
انہوں نے دونوں ممالک کے درمیان دوطرفہ تعاون کی موجودہ سطح پر اطمینان کا اظہار کرتے ہوئے مزید کہا کہ پاک ترک تعلقات اعلیٰ سطح کے تبادلوں کی وجہ سے مزید بہتری کی جانب گامزن ہیں۔
قبل ازیں ایوان صدر میں منعقدہ ایک خصوصی تقریب میں صدر آصف علی زرداری نے پاکستان اور ترکیہ کے درمیان دفاعی تعلقات کو مضبوط بنانے اور فروغ دینے کے لئے شاندار خدمات کے اعتراف میں ترک چیف آف سٹاف جنرل متین گیوراک کو نشان امتیاز (ملٹری) عطا کیا۔
اس سے قبل آرمی چیف آف پاکستان جنرل عاصم منیر سے ترک چیف آف جنرل اسٹاف جنرل متین گیوراک نے ملاقات کی۔
ملاقات میں باہمی دلچسپی، دفاع، تربیت اور علاقائی امن و استحکام کو فروغ دینے سے متعلق بات چیت ہوئی، ملاقات میں دونوں اطراف نے اپنے ممالک کے درمیان مضبوط تعلقات کو تسلیم کیا۔
ملاقات میں دونوں اطراف سے دفاعی تعاون کو مزید وسعت دینے کے عزم کا اظہار کیا گیا، آرمی چیف آف پاکستان نے دونوں مسلح افواج کے درمیان موجودہ فوجی تعاون آگے بڑھانے کی ضرورت پر زور دیا۔
جنرل متین گیوراک نے علاقائی امن و استحکام کے لیے پاکستان کی کوششوں کو سراہا، انہوں نے دہشت گردی سے نمٹنے میں پاک فوج کے کردار کو بھی سراہا۔
اس سے قبل سربراہ ترک فوج کو جی ایچ کیو آمد پر پاک فوج کےچاق وچوبند دستے نے گارڈ آف آنر پیش کیا۔
جنرل متین گیوراک نے جی ایچ کیو میں یادگار شہدا پر پھولوں کی چادر بھی چڑھائی۔
پاکستان کے وزیر دفاع و دفاعی پیداوار خواجہ محمد آصف نے بھی ترک چیف آف جنرل سٹاف جنرل متین گیوراک سے ملاقات کی۔وزیر دفاع نے معزز ترک دفاعی وفد کا پرتپاک استقبال کیا۔انہوں نے پاکستان اور ترکیہ کے درمیان دوطرفہ دفاعی تعلقات کو مضبوط قرار دیا۔
وزیر دفاع نے غزہ میں حالات اور مصائب پر قابو پانے کے لیے ترکیہ کے فعال کردار کی تعریف کی ۔ معزز مہمان نے علاقائی امن و استحکام کو فروغ دینے میں پاکستان کی کوششوں کے ساتھ ساتھ دہشت گردی کے خلاف جنگ میں پاکستان کی مسلح افواج کے کردار کو سراہا۔
دونوں اطراف نے اپنی مسلح افواج کے درمیان مضبوط تعلقات کو تسلیم کیا اور دفاعی تعاون کو مزید وسعت دینے کا عزم کیا۔