پنجاب کی وزیراعلیٰ محترمہ مریم نواز شریف جمہوریہ ترکیہ کی وزارت خارجہ کے زیرِ اہتمام منعقد ہونے والے عالمی سطح کے سفارتی اجلاس انطالیہ ڈپلومیسی فورم 2025 میں شرکت کے لیے ترکیہ کے خوبصورت سیاحتی شہر انطالیہ پہنچ گئی ہیں۔ یہ فورم 11 سے 13 اپریل 2025 تک "ایک بکھری ہوئی دنیا میں سفارت کاری کی بحالی” کے عنوان کے تحت منعقد ہو رہا ہے، جس کی میزبانی ترکیہ کے صدر جناب رجب طیب ایردوان خود کر رہے ہیں۔
وزیراعلیٰ پنجاب کا یہ دورہ ترکیہ کی خاتونِ اول محترمہ ایمینے ایردوان کی خصوصی دعوت پر عمل میں آیا ہے۔ ان کے ہمراہ پنجاب کی سینئر وزیر برائے اطلاعات و ثقافت محترمہ مریم اورنگزیب بھی موجود ہیں۔ انطالیہ پہنچنے پر ان کا پرتپاک استقبال انطالیہ کے ڈپٹی گورنر ڈاکٹر سوات سید اولو نے کیا۔
وزیراعلیٰ مریم نواز شریف فورم کے دوران کل خصوصی خطاب کریں گی، جس میں وہ پاکستان کے سب سے بڑے صوبے پنجاب میں تعلیم کے فروغ، پالیسی اصلاحات، اور اپنی حکومت کے ترقیاتی ویژن پر روشنی ڈالیں گی۔ ان کا خطاب فورم کے عنوان "تقسیم شدہ دنیا میں مستقبل کی تعمیر: تعلیم بطور تبدیلی کی طاقت” سے ہم آہنگ ہوگا۔
اس اہم سفارتی پلیٹ فارم پر دنیا بھر سے عالمی رہنما، وزرائے خارجہ، پالیسی ساز، ماہرین تعلیم، کاروباری شخصیات، میڈیا کے نمائندگان اور سول سوسائٹی کے رہنما شریک ہو رہے ہیں۔ انطالیہ ڈپلومیسی فورم بین الاقوامی سطح پر مکالمے، تعاون اور پائیدار ترقی کے لیے ایک مؤثر پلیٹ فارم کے طور پر تسلیم کیا جاتا ہے۔
صدر رجب طیب ایردوان نے افتتاحی اجلاس میں دنیا بھر سے آئے معزز مہمانوں کو خوش آمدید کہا اور عالمی مسائل کے حل کے لیے اجتماعی سفارت کاری کی اہمیت پر زور دیا۔
وزیراعلیٰ مریم نواز شریف کی اس شرکت سے نہ صرف پاکستان اور ترکیہ کے درمیان برادرانہ تعلقات کو مزید فروغ ملے گا، بلکہ عالمی سطح پر پاکستان کے مثبت امیج اور تعلیمی اقدامات کو بھی اجاگر کرنے کا موقع ملے گا۔