خصوصی خبر: ڈاکٹر فرقان حمید
پاکستان،ترکیہ اور سعودی عرب کے نئے دفاعی بندوبست میں تین سالہ سربراہی پاکستان کے حصے میں؛ بعد ازاں ذمہ داری سعودی عرب اور ترکیہ کو منتقل ہوگی
انقرہ: ترکیہ، پاکستان اور سعودی عرب کے درمیان 7 اگست 2026 کو مقدس شہر مکہ مکرمہ میں طے پانے والے مکہ مشترکہ دفاعی معاہدے نے خطے کے بدلتے ہوئے سلامتی کے منظرنامے میں ایک نئی سفارتی اور تزویراتی جہت پیدا کردی ہے۔ معاہدے کی تفصیلات بتدریج سامنے آ رہی ہیں، جن کے مطابق اس کے تحت قائم کیے جانے والے سیکریٹریٹ کی پہلی تین سالہ سربراہی پاکستان سنبھالے گا، جس کے بعد یہ ذمہ داری بالترتیب سعودی عرب اور ترکیہ کو منتقل ہوگی۔
یہ پیش رفت پاکستان کو اس نئے سہ فریقی دفاعی ڈھانچے کے ابتدائی مرحلے میں ایک نمایاں ادارہ جاتی کردار فراہم کرتی ہے۔ سیکریٹریٹ نہ صرف تینوں ممالک کے درمیان طے پانے والے فیصلوں پر عمل درآمد اور ان کی نگرانی کا مرکز ہوگا بلکہ مشترکہ دفاعی تعاون کو مربوط رکھنے میں بھی کلیدی کردار ادا کرے گا۔
مکہ میں طے پانے والے معاہدے کی بنیادی روح اجتماعی سلامتی کے تصور پر استوار ہے۔ اس کے تحت تینوں ممالک میں سے کسی ایک کے خلاف مسلح جارحیت کو تینوں کے خلاف جارحیت تصور کیا جائے گا۔ تاہم اس شق کا اطلاق کسی خودکار فوجی ردعمل کے بجائے ہر واقعے کی نوعیت، خطرے کی شدت اور متاثرہ ملک کی درخواست کو مدنظر رکھتے ہوئے کیا جائے گا۔
نیٹو طرز کا مگر علاقائی تقاضوں سے ہم آہنگ نظام
معاہدے کے تحت فیصلہ سازی کے لیے ایک اعلیٰ سطحی ادارہ تشکیل دیا جائے گا، جس میں تینوں ممالک کے وزرائے خارجہ، وزرائے دفاع اور سربراہانِ افواج شامل ہوں گے۔ متعلقہ ممالک میں ضروری قانونی اور آئینی مراحل مکمل ہونے کے بعد یہ فورم اپنا پہلا اجلاس منعقد کرے گا، جس میں معاہدے میں کیے گئے وعدوں اور ذمہ داریوں کو عملی شکل دینے کے طریقۂ کار پر غور کیا جائے گا۔
یہ ڈھانچہ بظاہر نیٹو کے اجتماعی دفاع کے تصور سے مماثلت رکھتا ہے، تاہم اس میں ہر ممکنہ بحران کے لیے ایک ہی خودکار ردعمل تجویز کرنے کے بجائے صورتحال کے مطابق لچکدار فیصلہ سازی کو ترجیح دی گئی ہے۔ متاثرہ ملک کی درخواست پر خطرے کی نوعیت اور شدت کا مرحلہ وار جائزہ لیا جائے گا اور اسی بنیاد پر مشترکہ اقدام کا فیصلہ ہوگا۔
ضرورت کے مطابق یہ تعاون براہِ راست فوجی معاونت تک بھی وسیع ہوسکتا ہے، جبکہ بعض حالات میں انٹیلی جنس معلومات، رسد، گولہ بارود اور دیگر دفاعی وسائل کی فراہمی تک محدود رکھا جا سکتا ہے۔
تینوں ممالک کے وزرائے خارجہ، وزرائے دفاع اور عسکری قیادت پر مشتمل کونسل کے سال میں دو مرتبہ اجلاس متوقع ہیں۔ اس کے فیصلوں پر عمل درآمد اور پیش رفت کی نگرانی سیکریٹریٹ کی ذمہ داری ہوگی۔
پاکستان کے لیے ابتدائی قیادت کا اہم سفارتی پہلو
سیکریٹریٹ کی پہلی تین سالہ سربراہی پاکستان کو اس نئے دفاعی تعاون کے ادارہ جاتی ارتقا کے ابتدائی مرحلے میں مرکزی کردار فراہم کرے گی۔ پاکستان کے بعد سعودی عرب اور پھر ترکیہ اس ذمہ داری کو تین، تین سال کے لیے سنبھالیں گے۔
یہ ترتیب اس اعتبار سے بھی اہم ہے کہ پاکستان پہلے ہی سعودی عرب کے ساتھ طویل عرصے سے جاری دفاعی تعاون اور حالیہ باہمی دفاعی معاہدے کے ذریعے خلیجی سلامتی کے مباحث میں ایک اہم فریق بن چکا ہے۔ ترکیہ کی شمولیت کے بعد یہی تعاون ایک وسیع تر سہ فریقی فریم ورک میں داخل ہوگیا ہے۔
یوں اسلام آباد کو ابتدائی مرحلے میں سیکریٹریٹ کی قیادت ملنا پاکستان کے لیے محض ایک انتظامی ذمہ داری نہیں بلکہ علاقائی دفاعی سفارت کاری میں اس کے بڑھتے ہوئے کردار کا ایک نمایاں اظہار بھی سمجھا جا سکتا ہے۔
دفاعی صنعت میں اسٹریٹجک شراکت داری
مکہ معاہدے کا دائرہ صرف اجتماعی دفاع تک محدود نہیں۔ تینوں ممالک نے دفاعی صنعت میں تعاون کو بھی اس شراکت داری کا ایک بنیادی ستون قرار دیا ہے۔
اس سلسلے میں بغیر پائلٹ فضائی، زمینی اور بحری نظام، الیکٹرانک جنگ اور مصنوعی ذہانت کو ترجیحی شعبوں کے طور پر سامنے لایا گیا ہے۔ مقصد یہ ہے کہ تینوں ممالک اپنی تکنیکی مہارت، صنعتی استعداد اور مالی وسائل کو یکجا کرکے جدید دفاعی صلاحیتوں کو زیادہ مؤثر اور پائیدار بنیادوں پر ترقی دیں۔
یہ تعاون مشترکہ تحقیق، ٹیکنالوجی کی منتقلی، دفاعی پیداوار اور جدید جنگی نظام کی تیاری تک پھیل سکتا ہے، جس سے تینوں ممالک کی دفاعی صنعتوں کے درمیان روابط مزید گہرے ہونے کی توقع ہے۔
مشترکہ مشقیں اور فوجی ہم آہنگی
معاہدے میں تینوں ممالک کی مسلح افواج کے درمیان باہمی ہم آہنگی اور عملی تعاون بڑھانے کے لیے مشترکہ فوجی مشقوں کا بھی تصور پیش کیا گیا ہے۔
ان مشقوں کا مقصد مختلف عسکری نظاموں اور کمانڈ ڈھانچوں کے درمیان عملی مطابقت پیدا کرنا اور مشترکہ کارروائیوں کی صلاحیت کو بہتر بنانا ہوگا۔
اس طرح مکہ مشترکہ دفاعی معاہدہ محض کسی ایک ممکنہ خطرے کے خلاف دفاعی بندوبست نہیں بلکہ دفاع، ٹیکنالوجی، عسکری تربیت، دفاعی صنعت اور تزویراتی مشاورت پر محیط ایک وسیع تر تعاون کا فریم ورک بنتا دکھائی دے رہا ہے۔
مکہ مکرمہ میں ہونے والی یہ پیش رفت ایسے وقت میں سامنے آئی ہے جب مشرقِ وسطیٰ اور اس سے ملحقہ خطوں میں سلامتی کا منظرنامہ تیزی سے تبدیل ہورہا ہے۔ تینوں ممالک کی جانب سے اس نئے بندوبست کو دفاعی تعاون اور علاقائی سلامتی کے تناظر میں پیش کیا گیا ہے، جبکہ ترکیہ نے واضح کیا ہے کہ یہ معاہدہ کسی مخصوص ملک کے خلاف تشکیل نہیں دیا گیا۔
مکہ سے شروع ہونے والے اس نئے دفاعی بندوبست میں پاکستان کا ابتدائی قائدانہ کردار اسے محض ایک شریک ملک نہیں رہنے دیتا بلکہ پہلے مرحلے میں اسے اس ابھرتے ہوئے علاقائی سلامتی کے ڈھانچے کے ادارہ جاتی سفر کا نگران اور متحرک فریق بنا دیتا ہے۔