تحریر ڈاکٹر فرقان حمید
پاکستان اور ترکیہ عالمِ اسلام کے دو ایسے ممالک ہیں جن کی افواج پر پورے عالمِ اسلام کی نگاہیں مرکوز ہیں اور تمام اسلامی ممالک اپنے اپنے ملک کی افواج اور سیکورٹی ضروریات کو پورا کرنے کے لیے ان ہی دو ممالک سے رجوع کرتے ہیں اور قطر میں ورلڈ فتبال کپ میں ان دونوں ممالک ہی کے فوجی دستے سیکورٹی کے فرائض ادا کریں گے۔
دونوں ممالک میں افواج کی ملکی نظم و نسق پر گرفت اور اقتدار پر قبضے کے بارے مماثلت پائی جاتی ہے۔ترکیہ میں غازی مصطفیٰ کمال اتاترک کی قیادت میں اتحادی ممالک کے خلاف فتوحات کے چیف آف جنرل اسٹاف اور فیلڈ مارشل کی حیثیت سے مصطفی کمال اتاترک نے یونیفارم ہی میں پہلے قومی اسمبلی حکومت کے سربراہ کے طور پر اور پھر چار بار یونیفارم ہی میں اوپر تلے صدر مملکت منتخب ہو کر ملکی نظم و نسق میں فوج کے کردار کی بنیاد رکھ دی جبکہ پاکستان کے قیام کی کہانی ترکیہ سے بالکل مختلف ہے ۔ قیام پاکستان میں قائد اعظم محمد علی جناح کی قیادت میں سیاستدانوں نے بڑا اہم کردار ادا کیا اور یہ جنگ اپنی سیاسی قوتِ بازو سے جیتی لیکن پاکستان کے قیام کے گیارہ سال بعد جنرل محمد ایوب خان نے 1958ء میں ملک میں سیاستدانوں کو اقتدار سےہٹاتے ہوئے مارشل لا نافذ کردیا اور ملکی نظم و نسق میں فوج کوشامل کرنے کی بنیاد رکھتے ہوئے اسے آئینی تحفظ بھی فراہم کردیا ۔
ترکیہ میں اتاترک کے بعد جنرل عصمت انونو کی قیادت میں فوج طویل عرصے تک ملک کے سیاہ وسفید کی مالک رہی اور پاکستان کی طرح ترکیہ میں بھی وقفے وقفے سےملک کی نازک صورتِ حال کا واویلا مچاتے ہوئے مارشل لاءلگتا رہا ہے۔ 27 مئی 1960ء کوچیف آف جنرل اسٹاف، جنرل جمال گرسل نےملکی اقتدار پر قبضہ کرتے ہوئے آئین میں بھی تبدیلیا ں اور فوج ملکی نظم و نسق میں شامل کرتے ہوئے اعلیٰ ملی دفاعی کونسل (جسے بعد میں نیشنل سیکورٹی کونسل کا نام دے دیا گیا)قائم کردی۔
ترک فوج نےملک میں مارشل لا ء ہو یا نہ ہو ہمیشہ ملکی نظم و نسق پر اپنی گرفت مضبوط رکھی اور ملکی انتخابات اور خاص طور پرپارلیمنٹ کو ہمیشہ ہی اپنے مقاصد کی تکمیل کے لیے استعمال کیالیکن اس کے باوجود ملک کے ابتر سیاسی حالات کو دیکھتے ہوئے جنرل کنعان ایورن نے 12 ستمبر1980ء کو ملک میں مارشل لاء نافذکردیا اور پھر پاکستان کے جنرل ضیاء الحق اور جنرل پرویز مشرف کی طرز کا ریفرنڈم کرواتے ہوئے اور 91.37 فیصد ووٹ حاصل کرتے ہوئے سات سال کے عرصے کیلئے اپنے آپ کو صدرمنتخب کروانے کے ساتھ ساتھ ملک کا نیا آئین بھی منظور کروالیا جس پر آج بھی مختلف ترامیم کے ساتھ عمل درآمد جاری ہے۔
صدر کنعان ایورن کے بعد ملک ایک بار پھر کوالیشن حکومتوں کی وجہ سے سیاسی اور اقتصادی طور پر کمزور سے کمزور تر ہوتا چلا گیا جبکہ 3 نومبر 2002 نومبر کو ہونے والے عام انتخابات میں رجب طیب ایردوان کی قیادت میں قائم جسٹس اینڈ ڈولپمینٹ نے بڑے پیمانے پر کامیابی حاصل کرتے ہوئے کوالیشن سے نجات حاصل کرلی اور ملک کو اقتصادی لحاظ سے دنیا کے پہلے سولہ ممالک کی فہرست میں شامل کروانے میں کامیابی حاصل کی لیکن ترک فوج نے ان کی حکومت کی راہ میں مسلسل رکاوٹیں کھڑی کرنے کا سلسلہ جاری رکھا اور ملک کے کسی بھی ادارے میں نئی حکومت کو اپنے پسند کے بیوروکریٹس متعین کرنے کی اجازت ہی نہیں دی ۔
ایردوان کی قیادت میں سول حکومت کے مضبوط ہونے اور عالمی سطح پر اس کی مقبولیت میں اضافے کی وجہ سے فوج نے ایک بار پھر ایردوان حکومت کا تختہ الٹنے کی 15 جولائی 2016 کو ناکام کوشش کی گئی جس پر ایردوان حکومت نے آئین میں ترامیم کراتے ہوئے فوجیوں پر سول عدالت میں مقدمہ چلانے کی بھی زمین ہموار کروالی اور اس طرح استنبول کی سول عدالت میں ترکی کی تاریخ میں پہلی بار فرسٹ آرمی کے کمانڈر انچیف، فضائیہ اور بحریہ کے سربراہ اور چیف آف جنرل اسٹاف سمیت اعلیٰ رتبے کے 365 فوجی افسران پر بغاوت کے الزام میں مقدمے کی کارروائی کا آغاز کیا گیا اور طویل مقدمے کی کارروائی کے بعد 325 افسران کو مجرم قرار دیتے ہوئے سزا سنائی۔ عدالت نے تینوں افواج کے سابق سربراہان کو عمر قید کی سزا جبکہ دیگر 71 فوجی افسران کو سولہ سولہ سال قید کی سزا سنائی۔ یہ ایردوان حکومت کی ایک ایسی کامیابی ہے جس نے مستقبل میں فوج کے سول حکومت کے انتظامی معاملات میں مداخلت کے تمام دروازے بند کر دیئے۔
ایردوان حکومت کا سب سے بڑا کارنامہ فوج کو وزارتِ دفاع اور وزیر دفاع کی جانب سے دیے جانے والے احکامات کی تعمیل کروانا ہے۔ اس سے قبل ترکیہ میں وزیر دفاع کا کردار صرف کاغذوں تک ہی محدود تھا اور چیف آف جنرل سٹاف(ترکیہ میں چیف آف آرمی سٹاف نہیں ) ہی ملک کے کرتا دھرتا تھے۔ان کے بیانات اور احکامات کو میڈیا ہمیشہ اولیت دیتا ۔ فوج جب چاہتی اخبارات اور میڈیا کی خبروں کو سینسر کردیتی اور کسی کو بھی چوں چراں کرنے کی ہمت نہ ہوتی لیکن 15 جولائی کی ناکام فوجی بغاوت نے ملک میں سب کچھ تبدیل کرکے رکھدیا ہے اور اب فوج عملی طور پر بیرکوں میں واپس جاچکی ہے اور ملکی سیاست میں کسی قسم کی دخل اندازی کرنے کا کوئی ارادہ نہیں رکھتی ہےلیکن اس کا ہرگز مطلب یہ نہیں ہے کہ فوج کی تکریم ، عزت و احترام میں کوئی کمی آئی ہے بلکہ اس کے برعکس فوج کی تکریم اور عزت و احترام میں وقت کے ساتھ ساتھ ہمیشہ ہی اضافہ ہوتا جا رہا ہے کیونکہ یہ فوج اب سیاست میں نہیں بلکہ ملکی دفاع کو مضبوط بنانے اور دفاعی صنعتی پیداوار کی جانب بھر پور توجہ مرکوز کرتے ہوئے اسے دنیا کے پہلے چند مضبوط دفاعی ممالک کی فہرست میں شامل ہو چکی ہے۔اب پہلی بار ملک میں دفاعی ضروریات کا اسی فیصد ترکیہ ہی میں مقامی وسائل تیار کیا جا رہا ہے اور ترکیہ کے ڈرانز نےترکیہ کو امریکہ اور چین جیسے ممالک کی فہرست میں شامل کردیا ہے۔ ترکیہ کی فوج کی تکریم اور عزت احترام ہونے والے اضافے کو آپ ترکیہ میں کسی بھی شہید فوجی کے جنازے سے لگا سکتے ہیں جس میں حکومت اور فوج کے اعلیٰ حکام سے لے کر بڑی تعداد میں لوگ شرکت کرتے ہیں اور فوجی شہید کی خبر کو تمام میڈیا نمایاں طور پر پیش کرتا ہے۔
پاکستان میں بھی فوج کو سیاست سے دو رکھتے ہوئے ، فوج کے دفاع اور فوجی دفاعی صنعت کو اپنے پاوں پر کھڑا کرتے ہوئے اس کی تکریم اور عزت و احترام میں اضافہ کیا جاسکتا ہے کیونکہ پاکستانی افواج پاکستان کے عوام کے دلوں میں بستی ہے اوراسے پردے کے پیچھے ہی رہ کر ملکی دفاع کی طرف توجہ دینا ہے ورنہ پاکستانی سیاستدان بلا کسی ثبوت اور شواہد کے فوج کو نشانہ بناتے رہیں گے۔