پاکستان جو انفارمیشن ٹیکنولوجی میں دنیا پر اپنی مہر ثبت کررہا ہے کے طلبا و طالبات نے اس سلسلے میں دنیا کے مختلف ممالک میں ہونے والے فیسٹویلز میں اعلیٰ کارگردگی کا سلسلہ جاری رکھا ہوا ہے۔
پاکستانی طلبا و طالبات کے ایک گروپ نے ترکیہ کے بحیرہ اسود کے شہر سامسن میں منعقد ہونے والے” ٹیکنو فیسٹ 2022″ کی مختلف کیٹگریز میں سے ایک میں پاکستان کے لیے لیے اول پوزیشن حاصل کرتے ہوئے اپنے ملک کا نام روشن کیا ہے۔
ترکیہ میں منعقدہ سب سے بڑے ٹیکنالوجی فیسٹول میں چیونٹیوں کی جبلت کی طرز پر کام کرنے والے امدادی ڈرون (یو اے وی) کا پروجیکٹ پیش کرکے اس کیٹگری میں اول انعام حاصل کیا ہے جبکہ مقابلے میں درجنوں ممالک کی طلبا و طالبات بھی اپنی اپنی اختراعات پیش کی تھیں۔
اسلام آباد میں واقع انسٹی ٹیوٹ آف اسپیس ٹیکنالوجی (آئی ایس ٹی) نے ترکیہ میں ٹیکنالوجی کےبین الاقوامی اور سب سے بڑے میلے، ’ٹیکنوفیسٹ 2022‘ میں شرکت کی۔
طلبا و طالبات نے ترکی کے شہر سامسن میں منعقدہ بحیرہ اسود کے مقابلے اور پھر فری مشن یو اے وی کے زمرے میں کوتاہیا میں منعقدہ بین الاقوامی مقابلےمیں بھی حصہ لیا جس میں پوری دنیا سے 96 ٹیموں نے شرکت کی تھی۔ آئی ایس ٹی کی ٹیم نے ججوں کے سامنے تین یو اے وی (جن میں دو کواڈ کاپٹر اور ایک ہیکساکاپٹر شامل تھے) کے مجموعے کو بطور جُھنڈ (سوارم) کے پیش کیا۔ انہی بچوں نے اسی پروجیکٹ کے تحت ’ترغیبی (انسینٹوو) ایوارڈ‘ بھی اپنے نام کیا ہے۔
قدرت کےکارخانے میں لاتعداد جانوروں کی نقل کرکے روبوٹس بنائے گئے ہیں اور ٹیکنالوجی وضع کی گئی ہیں۔ اس ڈرون ٹیکنالوجی کی تیاری میں بھی ایک بہت چھوٹے لیکن بہت ہی خاص کیڑے چیونٹی سے سبق لیا گیا ہے۔ اس ٹیم میں شامل محمد رحموز ایوب نے بتایا: ’ ہم نے یو اے وی میں چیونٹیوں کی حیاتیاتی نقل کی ہے۔ جب چیونٹیاں غذا کی تلاش میں نکلتی ہیں تو اس راستے پر خاص کیمیکل چھوڑتی جاتی ہے اور بقیہ چیونٹیاں بھی ایک قطار میں اسی راہ پر چلتی ہیں اور یوں کھانے تک پہنچتی ہے۔ لیکن ہم نے اپنی یو اے وی ٹیکنالوجی میں اس کی الٹ تدبیر آزمائی ہے یعنی جب کسی مخصوص مقام پر کوئی ڈرون تلاش اور بچاؤ (سرچ اینڈ ریسکیو)کا کام کررہا ہو تو وہ دوسرےڈرون کو وہاں نہ آنے کا سگنل دیتا ہے اور یوں ایک ہی جگہ پر سارے ڈرون اپنا وقت اور توانائی ضائع نہیں کرتے۔ اس طرح سے یو اے وی کا کام تقسیم ہوجاتا ہے اور وہ ایک وسیع رقبے پر تلاش کا کام انجام دیتے ہیں۔ آئی ایس ٹی کی ٹیم نے یہ پورا نظام مع الگورتھم تیار کیا ہے۔‘
ٹیم میں شامل ایک اور رکن اسد محمود نےبتایا کہ پاکستان میں ایئرواسپیس علم اور ٹیکنالوجی کا ذکر بہت کم ہوتا ہے۔ اس مقابلے میں شمولیت سے ہم یہ بتانا چاہتے تھے کہ جب قابلیت کی بات ہو تو پاکستان کسی ملک سے کم نہیں۔ ’افسوسناک بات یہ ہے کہ مالیاتی مسائل کی وجہ سےٹیم میں شامل 8 میں سے صرف 3 افراد ہی تقریب میں شریک ہوسکے۔ تاہم یہ ثابت ہوگیا کہ ہم اپنی صلاحیتیں دکھاسکتےہیں اور مستقبل میں بھی ہم ان کوششوں کو جاری رکھیں گے۔
اس مقابلےکےلیے یو ای وی ڈیزائننگ ٹیم میں اسد محمود، احمد حسن، محمد رحموز ایوب، عبداللہ افضل، دلآویز صغیر، فریال بتول، روحان احمد اور نعمان رؤف شامل تھے۔
پاکستانی ٹیم کو حکومتِ ترکیہ کی جانب سے تمغے، شیلڈ اور نقد رقم بھی دی گئی تھی۔