تحریر ڈاکٹر فرقان حمید
ترکیہ میں آئندہ سال جون میں ہونے والے صدارتی اور پارلیمانی انتخابات کے لیے ابھی ہی سےانتخابی مہم نے زور پکڑنا شروع کردیا ہے۔ صدر ایردوان روزانہ ہی ملک کے مختلف شہروں میں ایک ساتھ ہی کئی کئی افتتاحی تقاریب میں خود موجود ہو کر یا پھر آن لائن شرکت کرتے ہوئے آئندہ پانچ سال کے لیے بھی ان پر ہی اعتماد کرنے تاکہ ترکیہ کو ماضی کی طرح مستقبل میں بھی ترقی کی راہ پر گامزن رکھنے اوراس ترقی کی بدولت اسے دنیا کے پہلے دس ترقی یافتہ ممالک کی صف میں شامل کروانے کی یقین دہانی کروا رہے ہیں۔ میری ذاتی رائے کے مطابق صدر ایردوان اس وقت دنیا کے مصروف ترین صدر ہیں اوراپنی مصروفیت ، ملکی اور غیر ملکی دوروں کی بدولت ان کا نام کسی وقت بھی گنیز بک آف ورلڈ ریکارڈ میں رقم کیا جاسکتا ہے یا کرلیا گیا ہو ۔ وہ موجودہ دور میں مختلف ممالک کے رہنماوں سے ون آن ون ملاقات کرنے والے دنیا کے واحد لیڈر ہیں اور دنیا میں جس طریقے سے ان پر ثالث کی حیثیت سے اعتماد کیا جا رہا ہے اور وہ روس اور یوکرین کے درمیان جس طریقے سے ثالثی کا کردار ادا کررہے ہیں یورپی یونین اور نیٹو کا کوئی بھی رکن ایسا کرنے کی صلاحیت ہی نہیں رکھتا ہےاور یہی چیز ان کو دنیا کے تمام لیڈروں سے ممتاز کرتی ہے اور اب دنیا کے نظریں صدر ایردوان پر مرکوز ہو کر رہ گئی ہیں اور وہ قد آور شخصیت کو طور پر دنیا کے سامنے آئے ہیں۔
اس حقیقت کو بیان کرنے کے بعد یہ بھی ایک حقیقت ہے کہ صدر ایردوان کے لیے آئندہ صدارتی اور پارلیمانی انتخابات میں کامیابی حاصل کرنا مشکل بھی بنتا جا رہا ہے۔ اگرچہ پارلیمانی انتخابات میں (پارلیمنٹ) میں ان کی جماعت کو پہلی پوزیشن حاصل ہو جائے گی لیکن صدر ایردوان نے ملک میں صدارتی نظام متعارف کروانے کے لیے جو ریفرنڈم کروایا تھا اس میں ملک کے کسی بھی صدارتی امیدوارکی کامیابی کے لیے 51 فیصد ووٹ حاصل کرنے کی شرط عائد کردی تھی لیکن اب یہ شرط ان کی راہ میں کامیابی کی سب سے بڑی رکاوٹ بنتی جا رہی ہے کیونکہ موجود حالات میں ان کے لیے اکیاون فیصد ووٹ حاصل کرنا ملک میں اقتصادی صورتِ حال ، افراطِ زر کی شرح 85 فیصد ہونے (اپوزیشن کے مطابق 120 فیصد سے زاہد ہونے ) اور مہنگائی کی وجہ سے بڑا مشکل دکھائی دیتا ہے۔
ملک میں اس وقت مہنگائی کو یا افراطِ زر کو کنٹرول کرنے والا کوئی ادارہ سرے سے موجود ہی نہیں ہے جس کی وجہ سے جیسے ہی حکومت کی جانب سے تنخواہوں میں اضافہ کرنے کا اعلان کیا جاتا ہے اس اعلان کے فوراً بعد ہی روزمرہ کی اشیاء کی قیمتیں آسمان کو چھونا شروع کردیتی ہیں ۔ اس سے ترکیہ میں امیر لوگ امیر تر ہوتے جارہے ہیں جبکہ درمیانہ طبقہ جو کسی زمانے ترکیہ کی اقتصادیات میں ریڑھ کی ہڈی کی حیثیت رکھتا تھا کو مہنگائی کے کینسر نے ختم کرکے رکھدیا ہے اور اب یہی طبقہ غربت کی لکیر کے نیچے زندگی بسر کرنے پر مجبور ہے۔اب چونکہ انتخابات جیسےجیسے قریب آتے جا رہے ہیں صدر ایردوان نے ملک کے خزانے کا منہ بھی کھولنے کا فیصلہ کرلیا اور ماہ جنوری میں اس وقت ترکیہ میں کم از کم اجرت جو ساڑھے پانچ ہزار ٹر کش لیرا ہے (300ڈالرکے لگ بھگ) کےآٹھ ہزار ٹرکش لیرا کے لگ بھگ کیے جانے کا خیال ظاہر کیا جا رہا ہےلیکن اس کے ساتھ حکومت کی جانب سے ٹیکسوں میں بے پناہ اضافےجو قیمتوں میں اضافے مین چنگاری کی حیثیت رکھتی ہے امہنگائی کی ایک ایسی آگ بڑھک اٹھتی ہے جس پر قابو پانا ناممکن ہو جاتا ہے۔ ملک میں مہنگائی کی سب سے بڑی وجہ حکومت کے اخراجات میں بے پناہ اضافہ ہیں اگرچہ حکومت ملک کے مرکزی بینک میں 125 بلین ڈالر کے ریزرو موجود ہونے کا اعلان کرتی ہے لیکن اپوزیشن کے مطابق اگرچہ مرکزی بینک میں اس وقت 125 بلین ڈالر موجود ہیں لیکن یہ صرف چند دنوں کے لیے ہیں کیونکہ حکومت کے اس سال کے اندر اندر 160 بلین کی غیر ملکی ادائیگی کرنے کی ضرورت ہے اور یہی وجہ ہے کہ حکومت ترکیہ نے چند ماہ قبل قطر سے بیس بلین ڈالر،متحدہ عرب امارت سے 15 بلین ڈالرمرکزی بینک میں رکھنے کے لیے لے چکی ہے تو آئندہ ہفتے سعودی عرب سے 5 بلین ڈالر ملنے کی توقع ۔
اپوزیشن کے مطابق حکومتِ ترکیہ نے ڈالر کی قدرو قیمت پر کنٹرول رکھنے کے لیے جو پالیسی اختیار کررکھی ہے ، اُس سے حکومتِ ترکیہ کو اس وقت تک 90 بلین ڈالر کا
خسارہ ہوچکا ہے اوریہ پالیسی جاری رہنے کی صورت میں مزید خسارہ جاری رہے گا۔ ترکیہ کی اپوزیشن کی جانب سے اس بار ٹیلی ویژن چینلز پر جن اعدادو شمار کو پیش کیا جا رہا ہے اور عوام کو حقائق سے آگاہ کرتے ہوئے آئندہ انتخابات کے لیے صدر ایردوان کی راہ میں مشکلات کھڑی کی جا رہی ہے۔
اگرچہ اس وقت صدر ایردوان کے خلاف چھ جماعتوں کا اتحاد ” جسے “ملت اتحاد” کے نام سے یاد کیا جاتا ہے کی پوزیشن صدر ایردوان کے قائم کردہ اتحاد ” جمہور اتحاد” کے مقابلے میں بہت بہتر ہے لیکن اس اتحاد کو ابھی تک ایسا کوئی لیڈر میسر نہیں آیا ہے جو صدر ایردوان کا مقابلہ کرسکے ۔ اسی لیے اپوزیشن کا اتحاد صدر ایردوان کے مقابلے میں اپنے صدارتی امیدوار کا نام پیش کرنے سے قاصر ہے ۔ اگرچہ اس اتحاد میں مختلف نظریات رکھنے والی جماعتیں موجود ہیں اور ان تمام جماعتوں سے متعلق کروائے جانے والے سروئیز سے بھی اس اتحاد ( جو صرف صدر ایردوان کو اقتدار سے ہٹانے کے لیے وجود میں آیا ہے ) کے جمہور اتحاد سے مضبوط ہونے کے واضع اشارات مل رہے ہیں لیکن جب تک ایردوان کے خلاف قائم اتحاد کی جانب سے اپنے یا باہر سے کسی لیڈر کا نام پیش نہیں کیا جاتا اس وقت تک صدر ایردوان کو ان پر برتری حاصل رہے گی کیونکہ صدر ایردوان کرشمہ ساز شخصیت کے مالک ہیں ۔ وہ عوام کو اپنی مٹھی میں لینے کے فن سے پوری طرح آگاہ ہیں اور آخری وقت تک جب تک کامیابی حاصل نہیں ہوجاتی اپنی جدو جہد کو جاری رکھتے ہیں۔ یہی وجہ ہے ان کے خلاف ایک بھی سیاسی جماعت مقابلہ کرنے کی صلاحیت نہیں رکھتی جس کی وجہ سے انہوں نے ایردوان کے خلاف چھ جماعتوں کا اتحاد قائم کیا ہے جس میں مزید ایک دو جماعتوں کے شامل ہونے کی توقع کی جا رہی ہے۔ترکیہ کے آئندہ صدارتی انتخابات صدر ایردوان اور ترکیہ کے مستقبل کے لیے بڑی اہمیت کے حامل ہیں جس لے لیے دونوں ااتحادوں کے علاوہ مزید سیاسی جماعتیں ابھی ہی سے میدان میں آگئی ہیں ۔