استنبول بلدیہ کے مئیر اکرم امام اولو کو عدلیہ کی جانب سےسپریم الیکشن کمیشن کے چئیرمین اور اراکین کی توہین کرنے کے الزام میں 2 سال اور 7 ماہ اور 15 روز کی قید کی سزا سنائی جانے کے بعد کروائے جانے والے حالیہ سروئے نے تمام اعدادو شمار کو الٹ پلٹ کر رکھدیا ہے۔ امام اولو جن کے صدارتی امیدوار بننے کے چانسزز کم ہوتے جا رہے تھے عدلیہ کے اس فیصلے نے ان کو سب سے آگے لا کھڑا کیا ہے۔
عدلیہ کے اس فیصلے پر صدر ایردوان کے اتحاد” جمہور اتحاد” میں بھی دراڑ پڑتی ہوئی دکھائی دے رہی ہے۔ اس اتحاد میں شامل گریٹ یونین پارٹی کے چئیر مین مصطفیٰ دستی جی نے عدلیہ کے فیصلے پر تنقید کرتے ہوئے کہا کہ عدلیہ کی جانب سے امام اولو کی سیاست پر پابندی لگانا دراصل جرم سے کہیں زیادہ بڑی سزا ہے ۔ ہمیں سیاست پر پابندی لگانے جیسے اقدامات سے گریز کرنے کی ضرورت ہے ۔
صدر رجب طیب ایردوان نے پہلی بار استنبول بلدیہ کے مئیر امام اولو کے خلاف سیاسی پابندی اور قید کی سزا کے بارے میں بیان دیتے ہوئے کہا ہے کہ ” ان کا اس فیصلے سے کوئی تعلق نہیں ہے بلکہ یہ فیصلہ ججوں کی مبینہ توہین کے الزام میں ایک شخص کی سزا کا فیصلہ ہے۔”
اس فیصلے کے بارے میں صدر ایردوان کے ایک دیگر اتحادی اور نیشنلسٹ موومنٹ پارٹی کے چئیرمین دولت باہچے لی نے کہا کہ “یہ صورت حال ہیٹ سے خرگوش نکالنے کے مترادف ہے۔ اپوزیشن نے پہلے ہی سے اس فلم کا سینریو تحریر کرکھا تھااور ان کا مقصد ری پبلیکن پیپلز پارٹیCHP کے موجودہ چئیرمین کمال کلیچدار اولو کنارے لگانے کے مقصد لیے ہوئےہے۔
ترکیہ میں تقریباً تمام ہی ٹی وی چینلز عدلیہ کے فیصلے کے بعد سے امام اولو کے مستقبل کے بارے میں ٹالک شوز جاری رکھے ہوئے ہیں۔ ان ٹالک شوز ہی کے مطابق ترکیہ میں کروائے جانے والے حالیہ سروئے میں ملک میں بہت بڑی تعداد میں عوام نے عدلیہ کے اس فیصلے کو غیر منصفانہ قرار دیا ہےحتیٰ کہ برسراقتدار “جمہور اتحاد” میں جسٹس اینڈ ڈولپمینٹ پارٹی کی اکثریت نے بھی اس فیصلے کو غیر منصفانہ قرار دیا ہے۔
استنبول عدلیہ کے اس فیصلے کی اگر اپیل کورٹ اور سپریم کورٹ نےمنظوری دے دی تو امام اولو کی میئر شپ ختم ہو کر رہ جائے گی اور وہ آئندہ کسی بھی الیکشن میں امیدوار نہیں ہو سکیں گے۔
ترکیہ میں کروائے جانے والے حالیہ سروئے میں سیاسی جماعتوں سے یہ سوال کیا گیا تھا۔
کیا امام اولو پر سیاست میں حصہ لینے پر پابندی لگانے کا فیصلہ درست ہے؟
سروے کے نتائج کچھ یو ں تھے۔
جسٹس اینڈ ڈولپمینٹ پارٹی (آق پارٹی ):
یہ فیصلہ درست ہے : 31.8فیصد
یہ فیصلہ درست نہیں: 35.9فیصد
کوئی رائے نہیں : 32.4فیصد
نیشنلسٹ موومنٹ پارٹی MHP:
یہ فیصلہ درست ہے: 26.7فیصد
یہ فیصلہ درست نہیں: 52.2فیصد
کوئی رائے نہیں: 21.1فیصد
ری پبلیکن پیپلز پارٹی CHP :
یہ فیصلہ درست ہے: 0.5 فیصد
یہ فیصلہ درست نہیں: 96 فیصد
کوئی رائے نہیں: 3.5فیصد
گڈ پارٹی IYI پارٹی:
یہ فیصلہ درست ہے: 1.2فیصد
یہ فیصلہ درست نہیں: 93.9 فیصد
کوئی رائے نہیں: 4.9 فیصد
پیپلز ڈیمو کرٹیک پارٹی HDP پارٹی:
یہ فیصلہ درست ہے: 1فیصد
یہ فیصلہ درست نہیں: 97.1 فیصد
کوئی رائے نہیں: 2 فیصد