صدر ایردوان جب سے ترکیہ میں برسر اقتدار آئے ہیں انہوں نے اس وقت سب سے پہلے ترکیہ کی خارجہ پالیسی اور حکمتِ عملی میں بڑے پیمانے پر تبدیلی کی ہے۔ ترکیہ ایردوان سے قبل ایک نام نہاد سیکولر ملک ہونے کے ناتے اسلامی ممالک، اسلامی تنظیموں اوراسلامی این جی اوز سے دور رہنے ہی میں اپنی عافیت سمجھتا رہا ہے۔ اس کے اسلامی ممالک میں صرف پاکستان کے ساتھ شروع دن سے بڑے گہرے سیاسی، معاشرتی، سفارتی اور معنوی تعلقات قائم رہے ہیں جو آج بھی وقت کے ساتھ ساتھ فروغ پا رہے ہیں لیکن ترکیہ کے ایردوان سے قبل تک ایسا سوچنا ممکن نہ تھاکیونکہ ایک سیکولر ملک ہونے کے ناتے ترکیہ میں حکمران اور حکام مغرب ہی کو اپنا قبلہ سمجھتے رہے ہیں اور خاص طور پر ایران میں آنے والے اسلامی انقلاب کے بعد ترکیہ اسلامی ممالک سے مزید دور ہوگیا ور اور ایران کے ساتھ اس کے تعلقات میں بھی سرد مہری دیکھی گئی جو ایردوان دور میں اپنے اختتام کو پہنچی جبکہ ترکیہ کے عرب ممالک کے ساتھ سفارتی تعلقات موجود ت ہونے کے باوجود ان تعلقات میں کبھی گرمجوشی نہیں دیکھی گئی تھی۔
ایردوان کے برسر اقتدار آنے کے بعد ایردوان نے سب سے پہلے اسلامی ممالک کے ساتھ اپنے تعلقات پر نہ صرف نظر ثانی کی بلکہ اسلامی تعاون تنظیم جس میں ترکیہ نے کبھی کوئی فعال کردار ادا نہیں کیا تھا ایردوان دور میں اس تنظیم میں گہری دلچسپی لی جانے لگی اور اسی کے نتیجے میں 5جون 2004 کو ترکیہ سے تعلق رکھنے والے اکمل الدین احسان اولو کو اسلامی تعاون تنظیم کا سیکرٹری جنرل منتخب کرلیا گیا جو 30 دسمبر 2013 تک اس عہدے پر فائض رہے۔ اسی دور میں ترکیہ کے اسلامی ممالک کے ساتھ بڑے قریبی سفارتی، سیاسی ،اقتصادی، تجارتی اور معاشرتی تعلقات قائم ہوئے اور یوں ترکیہ مغرب پرست گروپ سے نکل کر اسلامی ممالک میں ایک لیڈر ملک کی حیثیت سے ابھر کر سامنے آیا۔
صدرایردوان نے اس دوران نہ صرف فلسطینیوں کے لیے آواز بلند کی بلکہ انہوں نے عالمی پلیٹ فارم پر مسئلہ کشمیر کو جس طرح اٹھایا اور پھر روہنگیا کے مسلمانوں پر ہونے والے ظلم و ستم کے خلاف آواز بلند کرتے ہوئے اپنے وزیر خارجہ، اس وقت کے وزیر اعظم اور اپنی اہلیہ کو روہنگیا مسلمانوں کی امداد کے لیے خطے روانہ کیااس سے تمام مسلمانوں کے دلوں میں انہوں نے اپنے لیے مستقل طور پر جگہ بنالی اور آج بھی جہاں کہیں بھی کوئی مسلمان ظلم و ستم کا شکار ہوتا ہے تو سب سے پہلے ایردوان ہی ان سب کی مدد کو پہنچتے ہیں۔ پھر انہوں نے تمام اپوزیشن کی سخت تنقید اور مغربی ممالک کی جانب سے شامی پناہ گزینوں کے لیے دروازے بند کیے جانے پر اپنے ملک کے دروازے ان شامی پناہ گزینوں کے لیے کھول دیے اور چار ملین کے لگ بھگ شامی پناہ گزین گزشتہ گیارہ سالوں سے ترکیہ میں مقیم ہیں جس کی وجہ سے دنیا کی نگاہوں میں صدر ایردوان کی قدرو منزلت میں بے حد اضافہ ہوا ہے۔
ایک اچھا مسلمان ہونے کے ناتے صدر ایردوان نے اپنے آپ کو صرف مسلمانوں ہی کی مدد کے لیے وقف نہیں کیا ہے بلکہ انہوں نے یوکرین جنگ کے دوران جو کردار ادا کیا ہے وہ سب کے سامنے ہے۔ انہوں نے اس جنگ کو رکوانے، مہاجرین کی امداد اور اس جنگ کی وجہ سے دنیا میں پیدا ہونے والی اناج کی قلت کو دور کرنے کے لیے جس طرح روس اور یوکرین کے درمیان سفارتکاری کا بیڑہ اٹھایا اور پھر دن رات کے مذاکرات کے بعد اناج راہداری کھولنے کا بندو بست کیا اس کا سو فیصد کریڈٹ ایردوان ہی کو جاتا ہے کیونکہ دنیا کا کوئی اور لیڈر ایسا کرنے کی صلاحیت ہی نہیں رکھتاہے۔
پاکستان جس کے ہر دور میں ترکیہ کے ساتھ بڑے گہرے اور قریبی تعلقات قائم رہے ہیں ترکیہ اور صدر ایردوان کی جانب سے کی جانے والی کوششوں کا ہمیشہ ہی معترف رہا ہے اور یہی وجہ ہے کہ جیسے ہی ترکیہ کی گرانڈ نیشنل اسمبلی کے اسپیکر مصطفیٰ شَن توپ نے دارالحکومت انقرہ میں پارلیمانی رپورٹروں کے ساتھ ملاقات کے موقع پر 24 فروری سے جاری روس۔یوکرین جنگ کے خاتمے یوکرینی اناج کو دنیا کو تک پہنچانے اوراس کے لیے ترکیہ میں راہداری قائم کرنے کی کوششوں کو سراہتے ہوئے صدر ایردوان کو نوبل امن ایوارڈ کے لئے نامزد کرنے کے لیے دنیا کی مختلف ممالک کی پارلیمنٹوں کے سربراہان کو خطوط روانہ کیے تو سب سے پہلے پاکستان سینیٹ کے چئیرمین محمد صادق سنجرانی نے ناروے کی نوبل کمیٹی کو خط ارسال کرتے ہوئے روس – یوکرین جنگ، اس جنگ کے تیزی سے ایٹمی فلیش پوائنٹ میں تبدیل ہونے سے روکنے کے لیے صدر رجب طیب ایردوان کی کوششوں کے نتیجے میں انہیں بین الاقوامی نوبل امن انعام کیلئے نامزد کرنے کی درخواست کی ہے۔ اس حوالے سے چیئرمین سینیٹ کا کہنا ہے کہ نوبل انعام امن یا جاری تنازعات کے حل میں غیرمعمولی اقدام پر دیا جاتا ہے، ترک صدر نے روس، یوکرین تنازع کے تناؤ میں کمی کیلئے بڑا اہم کردار ادا کیا ہے ۔ صادق سنجرانی نے کہا کہ روس یوکرین جنگ پوری دنیا کے لیے بڑی تباہی کا باعث بن سکتی تھی، ترک صدر نے فریقین کے ساتھ بروقت اور مؤثر رابطہ کاری سے دنیا کو بڑی تباہی سے بچایا ہے۔ ان کا مزید کہنا تھا کہ بلیک سی گرین منصوبے نے بھی اس خطے کو تباہ کن قحط سے بچایا، ترک صدر رجب طیب ایردوان ایک سچے اور بڑے عوامی رہنما ہیں۔صادق سنجرانی نے کہا کہ صدر ایردوان نہ صرف اپنے ملک بلکہ خطے اور بالعموم پوری دنیا کی بہتری اور خوشحالی کے لیے ہمیشہ کوشاں رہتے ہیں۔ صدر رجب طیب ایردوان تمام انسانیت کے لیے امن، رواداری اور محبت کے حضور نبی اکرم صلی اللہ علیہ وآلہ وسلم کے حقیقی پیغام اور تعلیمات کو لے کر چلتے ہیں۔ صدر اردوان کی اسلامی تعلیمات سے متعلق غلط فہمیوں کو دور کرنے کیلئے کوششیں باعث فخر ہیں۔ چیئرمین سینیٹ نے کہا کہ صدر رجب طیب ایردوان کو نوبل انعام کے لیے نامزد کرنے پر خوشی محسوس کر رہا ہوں۔ مجھے امید ہے کہ نارویجین نوبل کمیٹی صدر ایردوان کی عالمی امن کیلیے غیر معمولی اور بے مثال کوششوں کو ضرور زیر غور لائے گی۔
صدر ایردوان نے 24 فروری سے جاری روس – یوکرین جنگ کے آغاز ہی سے اس جنگ کو رکوانے کے لیے اور خطے میں امن کے قیام کے لیے اپنی کوششوں کا آغاز کردیاتھا ۔ یہ اعزاز صدر ایردوان ہی کو حاصل ہے کہ انہوں نے روس کے صدر پوتن اور یوکرین کے صدر زیلنیسکی کے ساتھ مسلسل رابطہ قائم رکھا ہوا ہے اوہ وہ کئی بار ان دونوں ممالک کا دورہ بھی کرچکے ہیں۔ اگرچہ کئی دیگر رہنماوں نے روس اور یوکرین کے درمیان جنگ بند کروانے کی کوششیں کی ہیں لیکن دونوں رہنماوں کی نظر میں صدر ایردوان کو جو عزت وقار حاصل ہے وہ شاید کسی دیگر رہنما کو حاصل نہیں ہے۔ صدر ایردوان نے روس کی اجازت سے ترکیہ میں غلے کی راہداری کھول کر نہ صرف دنیا پر احسان کیا ہے بلکہ غلے کے قحط یا قلت کی وجہ سے دنیا میں جو بے چینی پیدا ہونی تھی اور غلے کی قیمتوں میں ہوشربا جو اضافہ ہونا تھا اس کی پیش بندی کرتے ہوئے انسانیت پر بہت بڑا احسان کیا ہے۔
پاکستان پہلا ملک ہےجس نے اپنے برادر اور دوست ملک اور پاکستان کے خیر خواہ صدر رجب طیب ایردوان کو نوبل امن ایوارڈ دلوانے کے لیے بین الاقوامی سطح پر اپنی کوششوں کا آغاز کیا ہے اور صدر ایردوان کو یہ نوبل امن ایوارڈ دلوانے تک اپنی کوششوں کو جاری رکھنے سے بھی آگاہ کیا ہے۔