یورپی یونین اور نیٹو کے اراکین ترکیہ اور امریکہ کے درمیان تعلقات کو بہتر بنانے کے لیے سرگرداں ہیں لیکن ابھی تک ترکیہ اور امریکہ کے درمیان سرد ہوائیں پوری شدت سے چل رہی ہیں ۔ ڈوئچے ویلے کی سرخی ہے “ترکیہ نیٹو پر اپنا دباو جاری رکھے ہوئے ہے۔ جبکہ یونانی میڈیا کی سرخی ہے مطلع صاف نہیں بلکہ الٹی گنتی کا آغاز ہوچکا ہے۔
ترکیہ اور امریکہ کے درمیان حالیہ عرصےکے اہم ترین اعلیٰ سطحی مذاکرات دارالحکومت واشنگٹن میں منعقد ہوئے ہیں جس کے بارے میں بین الاقوامی میڈیا اور یونانی پریس نے بڑے پیمانے پر کوریج کی۔ وزیر خارجہ میولود چاوش اولو نے واشنگٹن میں اپنے ہم منصب انٹونی بلنکن سے ملاقات کی ہے۔
بند کمرے میں ہونے والے مذکرات کے بعد وزیر خارجہ چاووش اولو نے بیان دیتے ہوئے کہا ہے کہ ترکیہ کو F-16 طیاروں کی فروخت اور سویڈن اور فن لینڈ کی نیٹو کی رکنیت کا آپس میں کوئی تعلق نہیں ہے اور امریکی کانگریس میں بھی اسے ایک دوسرے سے منسلک کرتے ہوئے پیش نہیں کیا جانا چاہیے۔
چاوش اولو نے کہا کہ اگر بائیڈن انتظامیہ ترکیہ کو F-16 طیارے دینے کے بارے میں پُر عزم ہے تو اسے اپنے اس موقف کانگرس میں پیش کرتے ہوئے ترکیہ کے حق میں فیصلہ کروانے میں مشکلات کا سامنا نہیں کرنا پڑے گا اور F-16 مسئلے کو حل کرلیا جائے گا۔ وزیر خارجہ چاوش اولو نے یاد دلایا کہ وہ شام پر دوبارہ توجہ مرکوز کرنے کے لیے امریکا کے ساتھ تعاون کرنے کے لیے تیار ہیں، لیکن واشنگٹن انتظامیہ نے ترکیہ کے ساتھ جو وعدے کیے تھے ان کو پورا نہیں کیا ہے۔
دوسری جانب انٹونی بلنکن نے اناج راہداری پر ترکیہ کی غیر معمولی کوششوں کو سراہا اور اس بات پر زور دیا کہ دونوں قریبی اتحادی اپنے درمیان مسائل کے باوجود مل کر کام کرتے ہیں۔
بلنکن – چاوش اولو ،ذاکرات کے بعد مشترکہ بیان جاری کیا گیا ہے۔
ترکیہ نے 2021 کے موسم خزاں میں امریکہ سے 40 نئے F-16 لڑاکا طیارے خریدنے کے لیے رجوع کیا تھا۔ انقرہ 80 ماڈرنائزیشن کٹس بھی خریدنا چاہتا ہے جو موجودہ F-16 کو وائپر لیول کو اپ گریڈ کرے گی۔
جو بائیڈن انتظامیہ نے 20 بلین ڈالر کی فروخت کو گرین سگنل تو دے دیا لیکن گزشتہ ہفتے اس کی منظوری کے لیے کانگریس کو درخواست بھیجی گئی ہے ۔ سینیٹ کی خارجہ تعلقات کمیٹی کے چیئرمین باب مینینڈیز، جو ترکیہ مخالفت کے لیے مشہور ہیں، کئی ماہ سے F-16 طیاروں کے بل کو ویٹو کرنے کا اظہار کرچکے ہیں۔