ترکیہ میں چھ فروری کو آنے والے 7٫7 اور 7٫6 کی شدت کے دو زلزلوں جسے ’’صدی کی آفت‘‘ قراردیا گیا ہےکے بعد دنیا بھر سے ترکیہ کو ریسکیو ٹیمیں روانہ کرنے کے ساتھ ساتھ امداد فراہم کرنے کا سلسلہ جاری ہے۔
اس سلسلےمیں پاکستان کی ریسکیو ٹیموں اور امداد کے بارے میں معلومات فراہم کرنے کی غرض سے پاکستان کے دارالحکومت اسلام آباد میں ترکیہ کے سفیر مہمت پاچاجی نے پریس بریفنگ کا اہتمام کیا۔
ترکیہ کے سفیر مہمت پاچاجی نے کہا کہ پاکستان کے وزیر اعظم شہباز شریف کی ہدایت پر فضائی ، بری اور بحری پل بھی قائم کیا جا رہا ہے۔
انہوں نے مزید کہا کہ پاکستان کی نیشنل ڈیزاسٹر اینڈ منیجمنٹ اتھارٹی نے تباہی کے پہلے دن سے اب تک تقریباً 4 ہزار سے زاہد ونٹر ٹینٹ اور 8 ہزار سے زیادہ کمبل ترکیہ روانہ کیے ہیں۔
انہوں نے کہا کہ پاکستان کی جانب سے فوری طور پر ترکیہ کو ریسکیو ٹیمیں اور امدادی سازو سامان روانہ کرنا پاک ترک دوستی کا منہ بولتا ثبوت ہے۔
ترک سفیر کا کہنا تھا کہ ترکیہ زلزلے میں 41 ہزار سے زائد افراد جان بحق اور 1 لاکھ سے زائد افراد زخمی ہیں جن کا مختلف ہسپتالوں میں علاج و معالجہ جاری ہے۔
انہوں نے کہا کہ ڈھائی لاکھ سے زائد سرچ اور ریسکیو اہلکار اس وقت ترک ڈیزاسٹر اینڈ ایمرجنسی مینجمنٹ اتھارٹی کے ساتھ مل کر کا م کر رہے ہیں۔
انہوں نے کہا کہ زلزلہ متاثرین کے لیے 3 ہزار 5 سو ونٹر ٹینٹ اور امدادی سازو سامان پر مشمل پاک بحریہ کا جہاز مارچ کے پہلے ہفتے ترکیہ روانہ ہوگا اور 13 دنوں میں ترکیہ کی بندرگاہ مرسین پہنچے گا۔
اسکے علاوہ، انہوں نے کہا کہ پاکستان سمیت دنیا کے مختلف حصوں سے 3 ہزار سے زائد غیر ملکی اہلکار بھی بچاؤ اور امدادی سرگرمیوں میں مصروف ہیں۔
مزید 3 ہزار ونٹر ٹینٹ اور 25 ہزار کمبل بذریعہ سڑک ترکیہ روانہ کیے گئے ہیں۔ یہ قافلہ 23 فروری کو ترکیہ کے صوبہ حطائے پہنچنے والا ہے، جو کہ سب سے زیادہ متاثرہ علاقوں میں سے ایک ہے۔
انہوں نے مزید کہا کہ اگلے دو ہفتوں میں چارٹرڈ کارگو پروازوں کے ذریعے 4 ہزار سے زائد ونٹر ٹینٹ ترکیہ بھیجے جائیں گے۔
انہوں نے پاکستان کے امدادی اداروں کی تعریف کرتے ہوئے کہا کہ پاکستان ریڈ کریسنٹ، پاک آرمی اور الخدمت نے ترکیہ میں انسانی جانوں کو بچاکر ترکوں کے دل جیت لیے ہیں۔ انہوں نے کہا کہ پاکستان کے تعلیمی ادارے بھی ترک سفارت خانے اور قونصل خانوں کے ساتھ رابطے میں ہیں اور زلزلہ زدگان کے لیے ادویات، خوراک، طبی آلات اور دیگر امدادی سامان فراہم کر رہی ہیں۔
انہوں نے بریفنگ کے اہتمام پر پاکستانی بھائیوں اور بہنوں کی دعاؤں اور نیک خواہشات پر شکریہ ادا کرتے ہوئے کہا کہ ہمیں یقین ہے کہ اس تعاون اور امداد کے نتیجے میں ترکیہ جلد ہی اپنی ان مشکلات پر قابو پالے گا۔