استنبول کے جن علاقوں میں بڑے پیمانے پر تباہی اور سونامی کا خطر لا حق ہے ان میں ذیتین برنو Zeytinburnu ، کچک چیک مجے Küçükçekmece ،عزاپلی Azaplı اسپارتا کُلے Ispartakule ، کناریہ Kanarya ، ایسن کینت Esenkent ، آوجی لر Avcılar ، امبارلی، حرامی درے Ambarlı Haramidere، اتا قوئے Ataköy فلوریہ Florya اور ایسن یُرت Esenyurt کے علاقوں کو زلزلے کا شدید خطرہ لاحق ہے اور ان علاقوں کے مکانات کو سب سے پہلے زلزلے سے محفوظ علاقوں میں قائم کیے جانے والے مکانات میں بسایا جائے گا۔ ان علاقوں کے علاوہ بھی استنبول کے کئی دیگر علاقوں میں خطرہ لاحق ہے۔
حکومت نے اعلان کیا ہے کہ ان علاقوں کے مکانات میں مکین افراد کو سب سے پہلے زلزلے سے محفوظ علاقوں میں قائم کیے جانے والے مکانات میں بسایا جائے گا۔ حکومت کی جانب سے ان علاقوں کو ریڈ زون قرار دے دیا گیا جس کی وجہ سے راتوں رات ان علاقوں میں مکانات کی قیمتوں میں بڑے پیمانے پر کمی آ گئی ہے اور اب لوگ ان گھروں کو خریدنے سے ہچکچا رہے تاہم اس دوران پراپرٹی ڈیلرز نے غیر ملکیوں کو اونے پونے داموں میں ان مکانات کی فروخت کے لیے مختلف سکیمیں شروع کردی ہیں جن سے پاکستانیوں کو کم از کم گریز کرنے کی ضرورت ہے کیونکہ پراپرٹی کے ساتھ ساتھ ان علاقوں میں جانوں کو بھی خطرہ لاحق ہے ۔
ترکیہ 6 فروری سے مسلسل زلزلوں کی لپیٹ میں آیا ہوا ہے۔ قہرامان ماراش اور حطائے مرکز میں آنے والے زلزلوں کے نتیجے میں اب تک 44 ہزار سے زاہد افراد ہلاک، ہزاروں کی تعداد میں بے گھر ہو چکے ہیں جبکہ 11 صوبوں میں ان زلزلوں کے بعد تباہی کی وجہ سے 3 ماہ کے لیے ہنگامی حالات کا اعلان کیا جاچکا ہے۔
اس تباہی کے بعد ترکیہ کے تمام ہی ماہرین ِ ارضیات مرمرہ فالٹ لائن جس کی لپیٹ میں استنبول ہے بڑے پیمانے پر زلزلے آنے کے خدشات کا اظہار کررہے ہیں۔
حکومت نے فوری طور پران ماہرین کی وارننگ کے نتیجے میں استنبول کی اپنی بھر پور توجہ مرکوز کرلی ہے۔ اس سلسلے میں ترکیہ کے ماحولیات، شہری آبادکاری اور موسمیاتی تبدیلی کے امور کے وزیر مرات کورم نے استنبول میں ممکنہ زلزلے میں خطرہ بننے والی عمارتوں کے حوالے سے بڑا اہم بیان جاری کیا ہے ۔
مرات کورم نے کہا ہے کہ استنبول زلزلے کے خدشات جس کی ماہرین نشاندہی کرچکے ہیں ہم استنبول میں 1.5 ملین پرخطر مکانات جو استنبول کے ایشیا اور یورپ دونوں ہی حصوں میں موجود ہیں کو وقت سے قبل مسمار کرتے ہوئے ان کے مکینوں کے لیے استنبول کے فالٹ لائن سے دور دونوں ہی حصوں میں نئے مکانات تعمیر کرتے ہوئے ان کو وہاں آباد کرنے کی منصوبہ بندی شروع کرچکے ہیں ۔
اس سلسلے میں صدر ایردوان بھی استنبول کے پُر خطر علاقوں مکانات کو خالی کرنے اور زلزلے سے محفوظ علاقوں میں جلد از جلد منتقل کرنے کی ہدایات جاری کرچکے ہیں ۔
مرات کورم نے کہا کہ ان تمام مکانات کی تعمیر کے لیے 94 ہزار منصوبے تیار ہیں جن کو جلد ہی عملی جامہ پہنایا جائے گا اور سب سے پہلے تین لاکھ گھر بسائے جائیں گے۔ اس سلسلے میں قومی اور مقامی حکمت عملی کے منصوبوں کے دائرہ کار میں نئے لاجسٹک روٹس کے ساتھ زلزلوں کی شدت کا مقابلہ کرنے والے صنعتی علاقے قائم کیے جانے کے علاوہ ہم وطن کے 780,000 مربع کلومیٹر کے اندر ان تمام منصوبوں پر عمل درآمد ہوتے ہوئے دیکھیں گے۔