تحریر: ڈاکٹر فرقان حمید
(نوٹ: TR-URDU ترکیہ کی پہلی اور واحد غیر جانبدار نیوز ویب سائٹ ہے۔ اس ویب سائٹ میں ترکیہ کی بر سر اقتدار اور اپوزیشن دونوں ہی کی خبروں کو جگہ دی جا رہی ہے۔ ان تمام خبروں کے ذرائع ترک میڈیا اور ایجنسیاں ہی ہیں ۔اس ویب سائٹ کا ان خبروں اور تبصروں سے متفق ہونا ضروری نہیں ہے)
ترکیہ کی تاریخ میں طویل عرصے تک مقبولیت اور اقتدار قائم رکھنے میں کامیاب جسٹس اینڈ ڈولپمینٹ پارٹی کے چئیرمین اور صدر جمہوریہ ترکیہ، رجب طیب ایردوان کو اس بار ملت اتحاد نے شکست دینے کہ نہ صرف بڑے پیمانے پر پلاننگ شروع کردی ہے بلکہ فوری طور پر عملی اقدامات بھی اٹھانا شروع کردیے ہیں۔
ملت اتحاد میں شامل ” گڈ پارٹی” کی چئیر پرسن میرال آق شینیر کے صدارتی امیدوار کے نام پر مطابقت نہ ہونے اور اتحاد کو ترک کرنے کی وجہ سے ملت اتحاد میں جو مایوسی پیدا ہوچکی تھی اس پر اس اتحاد میں شامل سب سے بڑی جماعت ” ری پبلیکن پیپلز پارٹی” کے چئیرمین کمال کلیچدار اولو نے جس مدابرانہ، افہام و تفہیم اور صبرو سکون اس مسئلے کو حل کیا اس سے نہ صرف کلیچدارو اولو کی عزت و تکریم میں اضافہ ہوا بلکہ ان کی مقبولیت راتوں رات آسمان کی بلندیوں کو چھونے لگی ہے۔یاد رہے آق شینیر نے انقرہ کے مئیر منصور یاواش ( جو مختلف کمپنیوں کی جانب سے مختلف اوقات میں کروائے جانے والے سروئیز میں صدر ایردوان کو اپنے پیچھے چھوڑ چکے ہیں ) اور استنبول کے مئیر اکرم امام اولو میں سے کسی ایک کو صدارتی امیدوار کے طور پر پیش کرنے پر اصرار کیا تھا اور یہی ان دونوں رہنماوں کے درمیان اختلافات کا باعث بھی بنا تھا۔ ان اختلافات کو دور کرنے کے لیے کمال کلیچداراو لو نے بڑی سمجھداری اور فہم و فراست سے کام لیا اور انقرہ اور استنبول کے مئیرز دونوں کو انتخابات جیتنے کی صورت میں دونوں کو نائب صدر نامزد کرنے کا اعلان کردیا جس سے ملت اتحاد کی قوت میں بے پناہ اضافہ ہوگیا ہے۔
یعنی ملت اتحاد نے منصور یاواش اور اکرم امام اولو کے ووٹوں کو بھی یقینی بناتے ہوئے کمال کلیچدار اولو کے ہاتھوں کو مضوط کردیا ہے۔ منصور یاواش( جن کا تعلق دائیں بازو کی MHP سے تھا ) جو اس سے قبل بے پازاری اور بعد میں انقرہ میں صدر ایردوان ہی کی پارٹی کے گزشتہ بیس سالوں سے زاہد عرصے سے مئیر منتخب ہونے والے ملیح گیو کچیک کو شکست فاش سے دوچار کرچکے ہیں اور انقرہ کے عوام کے دلوں پر حکمرانی بھی کررہے ہیں اور اس وقت برسر اقتدار اتحاد میں شامل نیشنسلٹ موومنٹ پارٹی MHP ہی کے ووٹوں کو نہیں بلکہ کچھ حد تک آق پارٹی کے ووٹوں کو بھی حاصل کرنے کی صلاحیت رکھتے ہیں۔ صدر ایردوان جنہوں نے استنبول کے مئیر کی حیثیت سے جو شہرت اورمقبولیت حاصل کی تھی اور جس طرح استنبول کا چہرہ تبدیل کرکے رکھدیا تھا اور اسی کے نتیجے میں ایردوان کے لیے پہلے وزارتِ اعظمیٰ اور پھر صدارت کے دروازے مکمل طور پر کھل گئے تھے۔ استنبول میں ان کے بعد قادر تو پ باش نے بھی طویل عرصے تک آق پارٹی کے پرچم کو لہرانے اور استنبول کے عوام کی خدمات کا سلسلہ جاری رکھا لیکن ایردوان کے ایک غلط فیصلے نے انقرہ اور استنبول کی مئیر شپ آق پارٹی کے ہاتھوں سے نکلنے کی بنیاد رکھدی اور اس طرح ترکیہ کے بڑے بڑے شہروں پر دیکھا جائے تو ری پبلیکن پیپلز پارٹی یا ملت اتحاد ہی کے مئیرز عوامی خدمات سر انجام دے رہے ہیں۔ یہ ایک حقیقت ہے کہ اگر منصور یاواش کو کردوں کی پارٹی ڈیموکریٹک HDP سے ووٹ نہیں لے سکتے تھے جبکہ اکرم امام اولو لازمی طور پر کردوں کی جماعت ایح ڈی پی کی حمایت حاصل کرلیتے۔
ملت اتحاد کے رہنماوں نے اپنی انتخابی مہم میں انقرہ اور استنبول کے مئیرز کو اپنے ساتھ رکھنے کا فیصلہ کیا ہے تاکہ انتخابی مہم کو موثر بناتے ہوئے عوام میں جوش و خروش پیدا کیا جاسکے اور ان پر واضح کردیا جائے کہ اب ان انتخابات میں یقینی فتح ملت اتحاد کو ہی حاصل ہوگی۔
اگر م موجودہ صورتِ حال کو دیکھا جائے اور مختلف کمپنیوں کی جانب سے کروائے جانے والے سروئیز پر ایک نگاہ ڈالی جائے حالات واضح طور پر ملت اتحاد کے حق میں نظر آتے ہیں۔
ملت اتحاد میں اس وقت چھ جماعتیں شامل ہیں جن ملنے والے ووٹوں کی شرح کچھ یوں ہے :
ری پبلیکن پیپلز پارٹی CHP: 26 فیصد سے لے کر 30 فیصد تک
گڈ پارٹی : 15 فیصد سے لے کر 19 فیصد تک
سعادت، دیوا، فیوچر،ڈیموکریٹک پارٹیز : 3 فیصد سے لے کر 4 فیصد تک
پیپلز ڈیموکرٹیک (باہر سےسپورٹ) : 10 فیصد سے 13 لے کر فیصد تک
ملت اتحاد نے اس وقت کمال کلیچدار اولو کو صدارتی امیدوار نامزد کرتے ہوئے دراصل کردوں کی جماعت پیپلز ڈیموکریٹک پارٹی کی حمایت کو بھی حاصل کرلیا ہے اور وہ جلد ہی کردوں کی اس جماعت کے اراکین کے ساتھ مذاکرات شروع کرنے والے ہیں جبکہ کمال کلیچداراولو کے ملت اتحاد کی جانب سے صدارتی امیدوار بنائے جانے کے بعد HDP نے اپنا الگ صدارتی امیدوار نہ کھڑا کرنے کا اعلان کرتے ہوئے فضا ء ملت اتحاد کے حق میں کردی ہے۔
اگر اس وقت ان تمام جماعتوں کے ووٹوں کو جمع کیا جائے اور مختلف کمپنیوں کی کم ترین شرح ہیکو مدِ نظر رکھتے ہوئے حساب لگایا جائے تو بھی ملت اتحاد کے صدارتی امیدوار کو ملنے والے ووٹوں کی شرح یعنی 26+10+3+15 کو جمع کرنے سے 54 فیصد کے لگ بھگ ہے۔ جو کسی بھی صدارتی امیدوار کو کامیاب ہونے کی شرح سے تین فیصد زاہد ہے۔ اس کے علاوہ جیسا کہ عرض کرچکا ہوں بر سر اقتدار صدر ایردوان کے اتحاد میں شامل جماعت MHP جس کے ووٹوں کی شرح کم ہوتے ہوئے 5 فیصد کے لگ بھگ رہ گئی ہے سے بھی بڑی تعداد میں منصور یاواش اور میرال آق شینیر کی وجہ سے یہ ووٹ ملت اتحاد کو مل سکتے ہیں جبکہ بائیں بازو کی ایک دیگر جماعت ” مملکت پارٹی ” کے چئیرمین محرم انجے جو اس سے قبل صدر ایردوان کے مقابلے میں کھڑے ہوئے تھے اور گزشتہ انتخابات میں 37 فیصد ووٹ حاصل کیے تھے لیکن اپنی پارٹی کے ساتھ اختلافات کی وجہ سے انہوں نے پارٹی سے علیحدگی اختیار کرتے ہوئے نئی پارٹی تشکیل دی۔
انکے بھی اگر پہلے مرحلے میں ملت اتحاد کے کامیاب نہ ہونے کی صورت میں دوسرے مرحلے میں ملت اتحاد کا ساتھ دینے کی توقع کی جا رہی ہے۔ دوسرے الفاظ میں کہاجاسکتا ہے کہ اس بار ملت اتحاد نے اپنے پلان پر عمل درآمد شروع کردیا ہے اور اگر ان کے درمیان کوئی آخری وقت میں اختلافات پیدا نہ ہوئے تو صدر ایردوان کے خلاف ان کی کامیابی کے زیادہ اور واضح امکانات موجود ہیں۔ فیصلہ ترک عوام نے 14 مئی کو کرنا ہے اور اس بار 10 ملین کے قریب نئی نسل (جو پہلی بار اپنا ووٹ استعمال کریں گے اور نئی نسل صدر ایردوان کی جانب سے لگائی جانے والی پابندیوں کےسخت خلاف ہیں اس لیے ان کے ووٹ بھی ملت اتحاد کو ملنے کی توقع ہے ) کے ووٹ بھی ان انتخابات کا فیصلہ کرنے میں بڑا نمایا ں کردارا ادا کریں گے۔
آخر میں اتنا عرض کردوں صدر ایردوان انتخابات کے ماسٹر ہیں اور وہ گزشتہ بیس سالوں سے مسلسل انتخابات جیتنے کے فن کے ماہر تصور کیے جاتے ہیں ، انہوں نے بھی کوئی کچی گولیاں نہیں کھیلی ہوئیں، وہ آخری وقت تک اپنی جان لڑاتے ہوئے دشمن کے منہ سے نوالہ چھیننے کے ماہر ہیں۔