تحریر: ڈاکٹر فرقان حمید
(نوٹ: TR-URDU ترکیہ کی پہلی اور واحد غیر جانبدار نیوز ویب سائٹ ہے۔ اس ویب سائٹ میں ترکیہ کی بر سر اقتدار اور اپوزیشن دونوں ہی کی خبروں کو جگہ دی جا رہی ہے۔ ان تمام خبروں کے ذرائع ترک میڈیا اور ایجنسیاں ہی ہیں ۔اس ویب سائٹ کا ان خبروں اور تبصروں سے متفق ہونا ضروری نہیں ہے)
صدر رجب طیب ایردوان نےسرکاری طور پر انتخابات کو 14 مئی 2023 کروانے کا اعلان کرتے ہوئے ترکیہ کی تاریخ کے اس نازک ترین دور میں اپنی باقاعدہ انتخابی مہم کا آغاز کردیا ہے۔ترکیہ میں رائے عامہ کے تازہ ترین جائزوں کے مطابق اس بار ترکیہ میں حالات گزشتہ بیس سال کے مقابلے میں بہت مختلف ہیں او ر پہلی بار مخالفین کا اس وقت تک پلڑا نہ صرف بھاری دکھائی دیتا ہے بلکہ مخالفین کو یقین ہے کہ اس بار پارلیمانی انتخابات میں بھی وہ واضح اکثریت حاصل کرتے ہوئے ترکیہ کے صدارتی نظام کی جگہ پارلیمانی نظام کو دوبارہ بحال کروانے کے لیے مقرر کردہ اراکین کی تعداد کو بھی حاصل کرنے میں کامیاب ہو جائیں گے۔
اس وقت تک ترکیہ کے انتخابات میں صدر کے ” جمہور اتحاد ” اور اپوزیشن کے ” ملت اتحاد” کے درمیان سخت مقابلہ ہونے کی توقع کی جا رہی ہے۔ جمہور اتحاد میں صدر ایردوان کی” جسٹس اینڈ ڈولپمینٹ پارٹی” (آق پارٹی ) دولت باہچے لی کی” نیشنلسٹ موومنٹ پارٹی ” (MHP)مصطفیٰ دستی جی کی” گرانڈ یونین پارٹی “(BBP) شامل ہے۔ یہ اتحاد گزشتہ انتخابات میں 52 فیصد ووٹ حاصل کرنے میں کامیاب رہا تھا لیکن اس بار اس اتحاد کو 52 فیصد وووٹ حاصل کرنا بڑا مشکل دکھائی دیتا ہے اس کی کئی ایک وجوہات موجود ہیں جن کا آگے چل کر ذکر کیا جائے گا۔ اس اتحاد میں صدر ایردوان کے دستِ راست” دولت باہچے لی” جنہوں نے صدر ایردوان کی حمایت کو جاری رکھا ہوا ہے کی مقبولیت میں تمام سیاسی جماعتوں کے رہنماوں کے مقابلے میں بڑی تیزی سے کمی واقع ہوئی ہے جو ایردوان کے اتحاد کے لیے الارم سے کم نہیں ہے۔ اس جماعت کو گزشتہ انتخابات میں 12 فیصد ووٹ حاصل ہوئے تھے جبکہ اس بار اسے پانچ فیصد کے لح بھگ ووٹ ملنے اور پارلیمنٹ تک رسائی حاصل نہ ہونے کا خیال ظاہر کیا جا رہا جو صدر ایردوان کے لیے بڑا اپ سیٹ ہوگا۔ اس اپ سیٹ کو دیکھتے ہوئے صدر ایردوان کے ” جمہور اتحاد” میں سخت کھلبلی مچی ہوئی ہے ، جس کی وجہ سے صدر ایردوان نے اپنے اتحاد میں اب چھوٹی چھوٹی جماعتوں کو بھی شامل کرنے پر مجبور ہوئے ہیں۔جمہور اتحاد میں مرحوم نجم الدین ایربکان کے صاحبزادے کی قائم کردہ نئی رفاہ پارٹی ( جسے صفر اعشاریہ پانچ فیصد ووٹ حاصل ہونے کی توقع ہے ) کے علاوہ ترکیہ کے مخالفین کی جانب سے دہشت گرد تنظیم قرار دی جانے والی اور حزب اللہ کے بہت قریب سمجھی جانے والی “خدا پر پارٹی ” کے شامل کیے جانے سے متعلق بھی خبریں سامنے آ رہی ہیں(اگر ایردوان نے اس جماعت کو اپنے اتحاد میں شامل کیا تو جمہور اتحاد کو ناقابلِ تلافی نقصان بھی پہنچ سکتا ہے ) صدر ایردوان نے ان جماعتوں کے علاوہ بھی کئی ایک چھوٹی چھوٹی علاقائی جماعتوں سے بھی رابطے قائم کررکھے ہیں تاکہ ان کو صدر منتخب ہونے کے لیےمقررہ 51 فیصد ووٹ حاصل کرنے میں کسی دشواری کا سامنا نہ کرنا پڑے۔
صدر ایردوان کیوں مشکلات سے دوچار ہیں؟
اقتصادی صورتِ حال
گزشتہ دو سالوں سے ترکیہ کے عوام شدید اقتصادی بحران سے دوچار چلے آرہے ہیں۔ ترکیہ میں ایک دور ایسا بھی تھا جب آق پارٹی نے ملک میں افرطِ زر (ترکیہ میں ہر دس سال بعد افرطِ زر اور ترک لیرے کی قدرو قیمت میں کمی کےمسئلے کا سامنا کرنا پڑتا ہے) کی شرح کو سنگل ڈیجٹ میں لاتے ہوئے اور ڈالر اور دیگر کرنسیوں کے مقابلے میں ترک لیرے کو “لیراں لیراں ” ہونے سے نہ صرف بچایا بلکہ ترک لیرے کے آگے سے چھ صفر ہٹا کر اور ترک لیرا مضبوط بنا کرتاریخی کارنامہ سر انجام دیا ۔ اور اب ترکیہ ایک بار پھر کم و بیش اسی صورتِ حال سے دوچار ہے اور ترک لیرا ” لیرا ں لیراں” ہوچکا ہےاور ملک کو اقتصادی بحران نے ایک بار پھر آن لپیٹا ہے۔ سرکاری اعدادو شمار کے مطابق کچھ عرصہ قبل تک ملک میں افراطِ زر کی شرح 85 فیصد تھی (جو دنیا میں دوسری بلند ترین شرح ہے ) جبکہ مخالفین کے مطابق یہ شرح 130 فیصد کے لگ بھگ ہے۔ اگرچہ ایردوان حکومت نے اس افراطِ زر کی شرح کو دیکھتے ہوئے تنخواہوں میں اضافہ تو کیا ہے لیکن یہ اضافہ افراط زر کی شرح میں اضافے کے مقابلے میں انتہائی کم ہے جس کی وجہ سے عوام اب تک شدید اقتصادی بحران کی وجہ سے عوام کا بڑا حصہ غربت کی لکیر سے بھی نچلی سطح پر زندگی بسر کرنے پر مجبور ہے۔
زلزلے کے اثرات
جیسا کہ عرض کرچکا ہوں اقتصادی بحران نے ترک عوام کو کمر توڑ کر رکھدی ہے تو زلزلے نے رہی سہی کسر بھی پوری کردی ہے۔ 6 فروری کو ترکیہ میں آنے والے اوپر تلے دو زلزلوں نے ترکیہ کو شدید جانی اورمالی نقصان پہنچایا ہے ان زلزلوں کے شہروں کے شہر اجڑ کر رہ گئے ہیں۔ اور زلزلے سے بچ جانے والے افراد شدید مشکلات میں ٹینٹوں اور کنٹیرز میں زندگی بسر کرنے پر مجبور ہیں۔ مخالفین کا دعویٰ ہے کہ اس بار حکومت ان زلزلوں کے موقع پر بر وقت اقدامات کرنے میں ناکام رہی ہے اور صدر ایردوان کا مختلف مواقع پر پہلے دو روز میں وقت پر امداد نہ پہنچانے اور اس سلسلے میں کوتاہی کے اعتراف نے اپوزیشن کو ایک ایسا مہرہ فراہم کردیا ہے جسے وہ ایردوان کی ناکامی سے تعبیر کرتی ہے۔ اگرچہ حکومت بڑے پیمانے پر زلزلہ متاثرین کے لیے اپنی امدادی کاروائیوں کو جاری رکھے ہوئے اور ایک سال کے اندر اندر تمام متاثرین کو نئے گھروں میں آباد کرنے کا وعدہ کرچکی ہے لیکن مخالفین کے مطابق یہ کام اب ایردوان حکومت کے بس کا نہیں ہے بلکہ اب ملک میں قائم ہونے والے ملت اتحاد ہی ملت کا سہار ابنے گی۔
مخالفین کا ترکیہ کی ہلالِ احمر ( قزلائی ) پر خیمے فروخت کرنے کا الزام
ترکیہ کے نہ صرف مخالفین بلکہ ترکیہ بھر کے اداکاروں گلوکاروں اور دیگر اہم شخصیات کی جانب سے ترکیہ کے اس سے قبل ہمیشہ ہی قابلِ عزت و محترم سمجھے جانے والے ادارے قزلائی کے چئیرمین کی جانب سے زلزلہ متاثرین کے لیے تیار کردہ خیموں کو مختلف این جی اوز کو فروخت کرنے کے الزامات نے ترکیہ میں ایک نیا بھونچال برپا کر رکھا ہے ۔ قزلائی کے چئیرمین اگرچہ اس بارے میں مختلف تاویلیں پیش کررہے ہیں لیکن عوام ان کی جانب سے دیے جانے والے کسی بھی بیان سے مطمئن نہیں ہیں بلکہ ان کے مستعفی ہونے کے مطالبے میں مسلسل اضافہ ہوتا جا رہا ہے جو صدر ایردوان کی حکومت پر ایک بڑ دھبہ لگنے کا باعث بنا ہے۔
زلزلے کے فوراً بعد فوج کیوں ریسکیو کے لیے نہ پہنچی؟
ترکیہ میں فوج کو بڑی اہمیت حاصل ہے۔ اگرچہ 15 جولائی 2016ء کی ناکام بغاوت کے بعد ترک فوج ملکی اقتدار پر اپنی گرفت کھوچکی ہے لیکن اس کے باوجود ترک عوام میں جس طرح ترک فوج کی تکریم کی جاتی ہے اور عزت و احترام کی نظر سے دیکھا جاتا ہے دنیا میں اس کی کوئی مثال موجود نہیں ہے۔ (پاکستان کے عوام کو بھی ترک عوام سے اس سلسلے میں بہت کچھ سیکھنے کی ضرورت ہے ) جب ہم ترکیہ کی ماضی کی تاریخ پر ایک نگاہ ڈالتے ہیں تو پتہ چلتا ہے کہ ترک فوج ہمیشہ ہی ہر مصیبت، آفت یا تباہ کاریوں کے مواقع پر سب سے پہلے عوام کی مدد اور ریسکیو کے لیے پہنچنے والا یہ ادارہ ہی ہے۔ دراصل ترکیہ میں فوجیوں کو مہمت چیک( یعنی محمد کے سپاہی ) طور پر یاد کیا جاتا ہے ۔ ہمیشہ کی طرح اس بار بھی فوجی امدادی اور ریسکیو ٹیموں ہی کو زلزلے سے متاثرہ علاقوں پہنچنے کی توقع کی جا رہی تھی لیکن مخالفین کا دعویٰ ہے کہ اس بار کہیں بھِ فوجی امدادی دستے نظر نہیں آئے ہیں۔ اگرچہ حکومت کی جانب سےامدادی فوجی دستوں کے متاثرہ علاقوں میں موجود ہونے کی کئی بار وضاحت کی جاچکی ہے لیکن اپوزیشن ابھی بھی اپنے دعوے پر مسلسل اصرار کررہی ہے ، ان کے مطابق اس کی بڑی وجہ صدر ایردوان کی جانب سے جان بوجھ کر فوجی دستوں کو سویلین ٹیموں کے پیچھے رکھنا ہے تاکہ سویلین امدادی ٹیموں کی امدادی کاروائیوں کو گرہن نہ لگ جائے۔
اپوزیشن کے بلدیاتی اداروں کی ریسکیو ٹیموں اور سازو مان وقت پر متاثرہ علاقوں میں پہنچنے کی اجازت کیوں نہیں دی گئی؟
اپوزیشن نے حکومت کو آڑے ہاتھوں لیتے ہوئے کہا ہے کہ حکومت نے پہلے روز بودرم اور کئی دیگر شہروں کے بلدیاتی اداروں کی ریسکیو ٹیموں اور امدادی سازو سامان کو متاثرہ علاقوں میں پہنچنے اجازت نہ جبکہ یہ ٹیمیں متاثرہ علاقوں کے باہر حکومت کے آرڈر کی منتظر تھیں لیکن حکومت نے ڈزاسٹر اینڈ مینجمنٹ ادارے AFAD کی ریسکیو ٹیموں کے پہنچنے تک ان کو متاثرہ علاقوں کے باہر ہی روکے رکھا۔ اپوزیشن کا کہنا ہے کہ 72 گھنٹے زلزلے کے بعد عمارتوں سے افراد کو زندہ بچانے کے لیے بڑی اہمیت کے حامل ہوتے ہیں اور اپوزیشن کے بلدیاتی اداروں کی ریسکیو ٹیمیں جوبر وقت متاثرہ علاقے پہنچ چکی تھیں کو اگر امداد ی کاروائیاں جاری رکھنے کی اجازت دے دی جاتی تو بڑی تعداد میں لوگوں کو زندہ بچایا جاسکتا تھا۔
حطائے سے ری پبلیکن پیپلز پارٹیCHPکی رکنِ پارلیمنٹ کے جذباتی اور رقت آمیز خطاب نے پارلیمنٹ کوہلا کر رکھ دیا
پارلیمنٹ سے خطاب کرتے ہوئے ری پبلیکن پیپلز پارٹی CHPکی حطائے سے رکنِ پارلیمنٹ سوزان شاہین کے رقت آمیز خطاب نے پارلیمنٹ میں سکتہ طاری کردیا ۔ سوزان شاہین نے اپنے خطاب میں حکومت کی نااہلی کا پردہ چاک کرتے ہوئے زلزلہ متاثرین کو اس وقت جبکہ ڈیڑھ ماہ کا عرصہ بیت چکا ہے کو امدادہ نہ ملنے زلزلے کے وقت حکومت کے خوابِ خرگوش میں غرق ہونے کا ذکر کرتے ہوئے کہا کہ ایسی کسی بھی حکومت کو اپنی نا اہلی کو قبول کرتے ہوئے فوری طور پر مستعفی ہونے کی ضرورت تھی لیکن حکومت کی کسی بھی ایک رکن حتی کہ قزلائی کے چئیرمین تک نے مستعفی ہونے کی جسارت نہیں دکھائی ہے اور حکومت کی اس نالائقی اور نا اہلی کا جواب عوام آئندہ انتخابات کے موقع پر دیں گے۔
یہ تمام الزامات اپوزیشن کی جانب سے حکومت پر لگائے گئے ہیں جبکہ حکومت نے ان تمام الزامات کا یکسر مسترد کردیا ہے اور کہا ہے کہ حکومت پہلے روز ہی سے زلزلے سے متاثرہ علاقوں میں عوام کو امداد فراہم کرنے کا سلسلہ جاری رکھے ہوئے ہے۔ جس طرح اس حکومت نے ماضی میں وان میں اور دیگر علاقوں میں آنے والوں زلزلے میں عوام کو نئے گھروں میں آباد کیا اب بھی وہ ان کو بالکل اسی طرح آباد کرے گئی۔
اب دیکھنا یہ ہے کہ ترکیہ کی تاریخ کے اس نازک ترین انتخابات میں کون کامیاب ہوتا ہے؟ یہ انتخابات حکومت کی کارگردگی سے مطمئن افراد یا یا پھر اپوزیشن کے الزامات اور عوام سے کیے گئے وعدوں سے امید وابستہ کرنے والوں کے درمیان امتحان کی حیثیت رکھتے ہیں ۔