(نوٹ: TR-URDU ترکیہ کی پہلی اور واحد غیر جانبدار نیوز ویب سائٹ ہے۔ اس ویب سائٹ میں ترکیہ کی بر سر اقتدار اور اپوزیشن دونوں ہی کی خبروں کو جگہ دی جا رہی ہے۔ ان تمام خبروں کے ذرائع ترک میڈیا اور ایجنسیاں ہی ہیں ۔اس ویب سائٹ کا ان خبروں اور تبصروں سے متفق ہونا ضروری نہیں ہے)
رائٹرز کی جانب سے اواخر ہفتہ جاری کردہ سروئے کے نتائج کے مطابق 14 مئی کو ایک ساتھ منعقد ہونے والے صدارتی اور پارلیمانی انتخابات میں ’’ ملت اتحاد‘‘ کے صدارتی امیدوار کمال کلیچدار اولو جن کے نام کی چند روز قبل ہی منظوری دی گئی ہے نہایت ہی مختصر عرصے میں بیس سال سے برسر اقتدار رجب طیب ایردوان سے 10 پوائنٹس آگے نکل چکے ہیں۔
مارچ کے اوائل میں حزب اختلاف کے ’’ ملت اتحاد‘‘میں شامل گڈ پارٹی کی چئیر پرسن میرال آق شینیر کی جانب سے کمال کلیچدار اولو کے نام کی مخالفت کر تے ہوئے اتحاد ہی سے علیحدگی اختیار کرلی تھی ، جس کی وجہ سے ملت اتحاد کی کامیابی کے امکانات ختم ہو کر رہ گئے تھے۔
ملت اتحاد کے رہنماوں نے دانشمندی کا ثبوت دیتے ہوئے بہت جلد اس بحران پر قابو پالیا اور 6 مارچ کو کمال کلیچدار اولو کو صدر ایردوان کے مقابلے میں صدارتی امیدوار کے طور پر پیش کردیا۔
رائٹرز کی جانب سے کروائے جانے والے سروئے سے پتہ چلتا ہے کہ اس بار پارلیمنٹ کے انتخابات میں بھی ملت اتحاد صدر ایردوان کے جمہور اتحاد سے 6 پوائنٹس سے لے کر دس پوائنٹس تک آگے ہےجبکہ کردوں کی جماعت ” پیپلز ڈیموکریٹک پارٹی HDP کو بھی دس فیصد سے زاہد ووٹ ملنے کی توقع ہے۔
ملک میں اقتصادی بحران، مہنگائی اور لوگوں کی قوتِ خرید میں ہونے والی کمی کی وجہ سے ایردوان کو پہلی بار مشکل ترین انتخابات کا سامنا کرنا پڑرہا ہےجبکہ گزشتہ ماہ آنے والے زلزلے کی تباہکاریوں اور بر وقت امداد نہ ملنے کی وجہ سے بھی آق پارٹی کے اپنے ووٹر آق پاررٹی سے دور ہوتے ہوئے دکھائی دے رہے ہیں۔
یہ انتخابات کلیچدار اولو کی فتح پر منتج ہوں گے
ریسرچ ادار ے TENEO کے چئیرمین وولفنگو پیکولی نے رائٹرز کو اپنے جائزے میں ملت اتحاد کی پر فارمنس سے مطمئن ہونے سے آگاہ کیا ہےاور کہا کہ 60 دنوں بعد ہونے والے انتخابی مہم کے دوران صدر ایردوان، کمال کلیچدار اولو کے خلاف جارحانہ رویہ اختیار کریں گے اور اس عرصے کے دوران ملت اتحاد اور ان کے رہنماوں کی پر فارمنس بھی بڑی اہمیت کی حامل ہوگی اور صرف ایردوان ہی کی وجہ سے ملک کے حالت خراب ہونے کے الزامات ہی کافی نہیں ہوں گے۔
ایردوان کو مقبولیت میں مسلسل کمی
ماضی کے انتخابات میں صدر ایردوان نے حیران کن انتخابی مہم چلائی ہےجس سے ان کی غیر معمولی صلاحیت ظاہر ہوتی ہےلیکن حالیہ صورتِ حال سے پتہ چلتا ہے کہ وہ پہلے کے طرح انتخابی مہم چلانے میں پوری طرح کامیاب نہیں ہوسکے ہیں بلکہ ان کی مقبولیت میں مسلسل کمی آتی جا رہی ہے۔
رائٹرز کے مطابق ترکیہ کی ایک دیگر فرم آق سوئے ریسرچ کے 8 مارچ کے سروئے میں ایردوان کے 44 فیصد ووٹوں کے مقابلے میں کمال کلیچدار اولو کو 55 فیصد ووٹروں کی حمایت حاصل ہےجبکہ پارلیمانی انتخابات میں ملت اتحاد کو 44 فیصد، باہر سے حمایت کرنے والی HDP کو 10٫3 فیصد ووٹ حاصل ہوں گے اور صدر ایردوان کے جمہور اتحاد کو پارلیمنٹ میں 38٫2 فیصد ووٹ حاصل ہونے کی توقع کی جا رہی ہے۔
6-7 مارچ کو آلف ریسرچ کی جانب سے کروائے جانے والے سروئے میں کلیچدار اولو کو55٫1 فیصد اور صدر ایردوان کو 44٫9 فیصد ووٹ ملتے ہوئے دکھائے گئے ہیں۔ آلف ریسرچ کے پارلیمانی انتخابات سے متعلق سروئے میں CHP کو 31٫8 فیصد ، آق پارٹی کو 31 فیصد جبکہ ملت اتحاد کو 43٫5 فیصد HDP کو 11٫3 فیصد جبکہ صدر ایردوان کے جمہور اتحاد کو 37٫5 فیصد ووٹ ملنے کی توقع ہے۔
رائٹرز کے مطابق ایک دیگر ریسرچ کمپنی PIAR کے دس مارچ کو کروائے جانے والے سروئے سے پتہ چلتا ہے کہ کمال کلیچدار اولو کو 57٫1 فیصد اور صدر ایردوان کو 42٫9 فیصد ووٹ پڑ سکتے ہیں۔ پارلیمانی انتخابات میں CHPکو 32٫3 فیصد، آق پارٹی کو 30٫8 فیصد، HDP کو 11٫6 فیصد ملنے کی توقع ہے جبکہ ملت اتحاد کو پارلیمانی انتخابات میں 46٫4 فیصد اور جمہور اتحاد کو 37٫8 فیصد تک کی سطح تک ووٹ پڑ سکتے ہیں۔
ایک دیگر سروئے کرنے والی کمپنی ORCکے سروئے کے نتائج کے مطابق کمال کلیچدار اولو کو 56٫8 فیصد جبکہ صدر ایردوان کو 43٫2 فیصد ووٹ پڑ سکتے ہیں۔
اپوزیشن کے جیتنے کی کئی ایک وجوہات
واشنگٹن میں قائم مڈل ایسٹ ڈیموکریسی پروجیکٹ کی ترکیہ مینیجر مروہ طاہر اولو نے کہا کہ ملت اتحاد میں موجود تمام ہی نمائندئے ترکیہ کے مختلف طبقات کی نمائندگی کررہے ہیں۔
ایک کانفرنس سے خطاب کرتے ہوئے، طاہر اولو نے کہا کہ گزشتہ 20 سالوں کے مقابلے میں اس بار اپوزیشن کے انتخابات میں جیتنے کے لیے کئی ایک وجوہات موجود ہیں۔