الیکشن کمیشن کی جانب سے جاری ہونے والے بیان میں کہا گیا کہ 30 مارچ کو پنجاب میں شفاف انتخابات کرانا ممکن نہیں ہے جب کہ الیکشن کمیشن نے پنجاب میں انتخابات 8 اکتوبر کو کرانے کا فیصلہ کیا ہے۔
پہلے یہ انتخابات 30 اپریل کو ہوناالیکشن کمیشن کے مطابق انتخابات ملتوی کیے جانے کے فیصلے سے متعلق صدر کو آگاہ کر دیا گیا ہے۔
الیکشن کمیشن نے ایک اعلان میں کہا ہے کہ وزارت خزانہ، وزارت دفاع، وزارت داخلہ اور قانون نافذ کرنے والے اداروں کی جانب سے جمع کرائی گئی رپورٹس کی روشنی میں کمیشن اس نتیجے تک پہنچا ہے کہ موجودہ حالات میں شفاف، منصفانہ، اور پرامن انتخابات کا انعقاد ممکن نہیں ہے اور اب یہ انتخابات آٹھ اکتوبر کو ہوں گے۔
الیکشن کمیشن کی جانب سے انتخابات کے ملتوی کرنے کے جاری حکم نامے میں صوبائی حکومت کی جانب سے انتخابی عملی اور امن و امان کو یقینی بنانے کے لیے قانون نافذ کرنے والے اہل کاروں کی عدم دستیاب کو جواز بنایا گیا ہے۔
اس کے علاوہ وفاق کی فنڈز کی فراہمی نہ ہونے کو بھی انتخابات کے التواء کی وجہ بتایا گیا ہے۔
الیکشن کمیشن کا کہنا ہے کہ کمیشن کی تمام تر کوششوں کے باوجود وفاقی اور صوبائی حکومتیں اور قانون نافذ کرنے والے اداروں سمیت تمام ایگزیکٹو اتھارٹیز پنجاب میں آزادانہ، منصفانہ اور شفاف انتخابات کے انعقاد کے لیے کمیشن کی مدد نہیں کر سکیں۔
سپریم کورٹ نے الیکشن کمیشن کو اپنے فیصلے کے ذریعے پنجاب و خیبر پختونخوا اسمبلیوں کے انتخابات آئین میں درج مدت کے مطابق 90 روز میں کروانے کا کہا تھا۔
تاہم عدالت عظمیٰ نے الیکشن کمیشن کو اجازت دی کہ وہ پولنگ کی ایسی تاریخ تجویز کرے جو کہ کسی بھی عملی مشکل کی صورت میں 90 روز کی آخری تاریخ سے ’کم سے کم‘ تاخیر کا شکار ہو۔
سپریم کورٹ کے فیصلے کہ روشنی میں صدر مملکت ڈاکٹر عارف علوی نے 3 مارچ کو پنجاب اسمبلی کے عام انتخابات 30 اپریل بروز اتوار کرانے کی تجویز دی تھی۔
اس سے قبل لاہور ہائی کورٹ نے الیکشن کمیشن کو پنجاب اسمبلی کے انتخابات مقررہ وقت پر کروانےکے لیے پابند کرنے کی درخواست نا قابلِ سماعت قرار دے کر مسترد کی تھی۔
الیکشن کمیشن کے جاری حکم نامے کے مطابق پنجاب اسمبلی کے انتخابات الیکشن ایکٹ 2017ء کے سیکشن 58 اور 8 سی کے تحت ملتوی کیے گئے ہیں۔
یاد رہے کہ گزشتہ سال اپریل میں عمران خان نے اپنی وزارت عظمیٰ کے خاتمے کے بعد قبل از وقت عام انتخابات کا مطالبہ کررکھا ہے اور اس مقصد کے لیے تحریک انصاف نے پنجاب و خیبرپختونخوا کی اپنی اکثریتی اسمبلیاں تحلیل کیں تھیں۔