کیا امریکہ ترکیہ کی ڈران ٹیکنولوجی سے خوفزدہ ہے؟ امریکہ میں ان دنوں اعلیٰ امریکی دفاعی حکام کے دماغوں پر ترک ڈرانز چھائے ہوئے ہیں اور امریکی میڈیا میں بھی ان ڈرانز کے خوب چرچے ہیں۔
دنیا بھر میں ترکیہ کے اثرو رسوخ میں بے پناہ اضافہ
امریکی سی این بی سی، ٹی وی کے مطابق ترک مسلح ڈرانز کی فروخت نے دنیا میں ترکیہ سے متعلق سوچ اور نظریات کو تبدیل کرکے رکھدیا ہے۔ ترک مسلح ڈرانز کی بدولت ترکیہ، وسطی ایشیا سے لے کر یورپ تک، مشرق وسطیٰ سے لے کر شمالی افریقہ تک بہت سے ممالک میں اپنی دھاک بٹھا چکا ہے اور یہ تمام ممالک ترکیہ سے ڈرانز حاصل کرنے کے لیے قطار میں کھڑے دکھا ئی دیتے ہیں ۔
سی این بی سی کے مطابق آذربائیجان میں استعمال کیے جانے والےترک مسلح ڈرانز نے تاریخ میں پہلی بار چند دنوں کے اندر اندر جنگ کا پانسہ پلٹ کر رکھدیا تھا ۔ ترکیہ نے آذربائیجان کی خواہش پر مسلح ڈرانز استعمال کرتے ہوئے آرمینیا کے زیر قبضہ قارا باغ کو آزاد کروا کر ایسا مغربی ممالک کو ایسا سبق سکھایا کہ اس کے بعد انہوں نے قارا باغ پر کبھی بھی آرمینیا کی سرزمین ہونے کا دعویٰ نہیں کیا ہے۔ ترکیہ نے آذربائیجان کی سرمین پر آرمینی قبضے کو یک طرفہ طور پر ختم کروا کر علاقے پر اپنی گرفت کو مزید مضبوط بنالیا ہے۔
ترکیہ کی خطے میں مکمل گرفت
ترکیہ اُس وقت سے اس خطے میں روس کے موجود ہونے کے باوجود اپنی بات منوانے والے ملک کی حیثیت اختیار کرچکا ہے۔ ترکیہ نے روس-یوکرین جنگ میں یوکرین کو اپنے مسلح ڈرانز Bayraktar TB2 کو فروخت کرتے ہوئے روس کے یوکرین پر قبضے کے خواب کو چکنا چور کردیا اور جس طرح ترک مسلح ڈرانز نے روس کے ٹینکوں کو تباہ کیا اور آگے بڑھنے سے روک دیا اس پر یوکرین کے عوام نے ترک ڈرانز سے متعلق بے شمار گیت لکھ ڈالے اور اس وقت سے ترک ڈرانز کے ہر سو چرچے ہی چرچے ہیں ۔
امریکی ٹیلی ویژن CNBC نے قاتل ڈرانز اور اربوں ڈالر کے سودے کے زیر عوان اپنی خبر میں بتایا ہے کہ ترکیہ کی تیزی سے ترقی کردہ دفاعی صنعت سے ترکیہ کے عالمی اثر و رسوخ میں نہ صرف اضافہ ہوا ہے بلکہ اس سے ترکیہ کے لیے بلین ڈالرز کی کمائی بھی حاصل ہو رہی ہے اور ترکیہ مالی لحاظ سے مستحکم ملک بنتا جا رہا ہے۔
ٹیلی ویژن کے مطابق ایردوان سے قبل ترکیہ میں دفاعی پیدوار کا حصہ صرف 20 فیصد کے لگ بھگ تھا جو ایردوان کے دور میں 80 فیصد تک پہنچ گیا ہےاور ترکیہ اس وقت دنیا میں تیزی سے دفاعی صنعت میں اپنا نام پیدا کرنے والے چند ایک گنے چنے ممالک کی صف میں شامل ہوچکا ہے۔
ترکیہ سے ریکارڈ برآمدات
سی این بی سی کی خبر کے مطابق 2022 میں ترکیہ نے اسلحے کی برآمدات میں ریکارڈ 4.4 بلین ڈالر کی آمدنی حاصل کی جو کہ بعض یورپی ممالک کے سالانہ دفاعی بجٹ سے بھی زیادہ ہے اور بتایا ہے کہ ترکیہ اس آمدنی میں اضافہ کرتے ہوئے 2023 تک 6 بلین ڈالر کا ہدف حاصل کرنے کی دہلیز پر پہنچ چکا ہے۔ سی این بی سی کے مطابق ماہ دسمبر میں اٹلانٹک کونسل کے شئیر کردہ اعداد و شمار کے مطابق 2020 اور 2021 کے درمیان بیرون ملک دفاعی برآمدات سے حاصل ہونے والی آمدنی میں 42 فیصد اضافہ ہوا ہے جو ترک کمپنیوں کے لیے غیر ملکی معاہدوں کی آمدنی کا 90 فیصد حصہ بنتا ہے۔
ایردوان کی 20 سالہ پلاننگ
ترکیہ میں مقامی طور پر دفاعی صنعت کی جانب منتقلی کا آغاز دراصل 20 سال پہلے ایردوان کی وزارتِ اعظمیٰ کے دور میں ہوا۔ انہوں نے اپنے دور اقتدار کی ابتدا ہی سے دیگر ترک رہنماوں سے مختلف پالیسی اختیار کی اور دفاعی صنعت کی مقامی کمپنیوں میں سرمایہ کاری کرتے ہوئے انہیں مضبوط بنایا جس کا نتیجہ برسوں بعد نکلا ہے ۔ خبر میں بتایا گیا ہے کہ اگرچہ ترکیہ اس وقت دفاعی صنعت کی پیداوار میں روس، چین اور امریکہ کی سطح تک نہیں پہنچا سکا ہے لیکن وہ دن دور نہیں جب ترکیہ بھی اس فہرست میں شامل ہوگا۔
غیر ملکی تعلقات اور اثر رسوخ
جدیدہتھیاروں اور ڈرانز اور مسلح ڈرانز نے بین الاقوامی میدان میں ترکیہ کے وقار میں اضافہ کیا اور اس کی فروخت سے ترکیہ نے ایشیا سے جزیرہ نما عرب تک، مشرق وسطیٰ سے شمالی افریقہ تک نئے اور مضبوط تعلقات قائم کیے ہیں اور ترکیہ کا خلیجی ممالک اور یورپ میں بھی اثر و رسوخ مسلسل اضافہ ہوتا جا رہا ہے۔ فروری میں ابوظہبی میں منعقدہ مشرق وسطیٰ کے سب سے بڑے ہتھیاروں کے فیسٹویل IDEX میں ترکیہ سب کی توجہ کا مرکز بنا ہوا تھا۔ ترکیہ کی مقامی طور پر تیار کردہ بکتر بند گاڑیاں، لیزر میزائل، انفنٹری رائفلیں اور آرمرز اس فیسٹویل کی نمایاں مصنوعات تھیں۔
3 ممالک کا ترکیہ میں سرمایہ کاری کرنے کا عزم
CNBC کے ترک حکام سے کیے جانے والے انٹرویوز سے مطابق متحدہ عرب امارات، سعودی عرب اور قطر نے دفاعی صنعت کی پیداوار کے لیے ترکیہ میں اربوں ڈالر کی سرمایہ کاری کے سمجھوتوں پر دستخط کیے ہیں۔