ترکیہ کی اپوزیشن پر مشتمل ’’ ملت اتحاد ‘‘کے صدارتی امیدوار کمال کلِچ دار اولو نے صدر ایردوان کے خلاف اپنی انتخابی مہم کے دائرہ کار میں ترکیہ کے سابق صدور سے الگ الگ ملاقات کی ہے ۔
کمال کلِچ دار اولو نے کل ترکیہ کے دسویں صدر احمد نجدت سیزر (جو صدر بننے سے پہلے آئینی کورٹ کے سربراہ بھی تھے )سے ملاقات کی ہے اور ان سے ملت اتحاد کی حمایت کرنے کی اپیل کی ۔ سابق صدر احمد نجدت سیزر نے کھل کر ملت اتحاد کے صدارتی امیدوار کی حمایت کرنے کا اعلان کیا ہے۔
ملت اتحاد کےصدارتی امیدوار کمال کلِچ دار اولو نے آج ترکیہ کے 11 ویں صدر اور جسٹس اینڈ ڈولپمینٹ پارٹی کے بانی رکن اور رجب طیب ایردوان کے قریبی ساتھیوں میں سے عبداللہ گل سے ملاقات کی ہے۔
کمال کلیچ دار اولو کی صدرعبداللہ گل سے یہ ملاقات بڑی اہمیت کی حامل ہےکیونکہ صدر عبدللہ گل کو آج بھی جسٹس اینڈ ڈولپمینٹ کے اندر سے بڑی مقبولیت حاصل ہے۔
سابق صدر عبداللہ گل اور رجب طیب ایردوان دراصل مرحوم نجم الدین ایربکان کے شاگردوں میں سے تھے ان دونوں رہنماوں اور دیگر ساتھیوں نے نجم الدین ایربکان کے خلاف علمِ بغاوت بلند کرتے ہوئے جسٹس اینڈ ڈولپمینٹ پارٹی کی بنیاد رکھی تھی اور عبداللہ گل جسٹس اینڈ ڈولپمینٹ پارٹی کے پہلے وزیراعظم منتخب ہوئے تھے اور اس کے بعد انہوں نے اس پارٹی میں وزیر خارجہ اور بعد میں صدر کے فرائض ادا کیے تھے ۔
صدر عبداللہ گل کی صدارت کی مدت پوری ہونے کے بعد ان کے اور رجب طیب ایردوان کے درمیان اختلافات پیدا ہوگئے جس کی بنا پر انہوں نے پارٹی سے نہ صرف علیحدگی اختیار کرلی تھی بلکہ سیاست ہی سے کنارا کشی اختیار کرلی تھی۔
صدر عبداللہ گل نے طویل عرصے بعدصدر ایردوان کے خلاف اپوزیشن کے قائم کردہ ملت اتحاد کے صدارتی امیدوار کمال کلیچ دار اولو سے ملاقات کی ہے اور اس ملاقات میں انہوں نے کمال کلیچ دار اولو کی حمایت کا اعلان کیا ہے۔ سابق صدر عبداللہ گل کی حمایت سے اپوزیشن کے صدارتی امیدوار کے ہاتھ مضبوط بنانے میں مدد ملے گی۔