(نوٹ: TR-URDU ترکیہ کی پہلی اور واحد غیر جانبدار نیوز ویب سائٹ ہے۔ اس ویب سائٹ میں ترکیہ کی بر سر اقتدار اور اپوزیشن تمام ہی جماعتوں اور اتحاد کی خبروں کو مساوی طور پر جگہ دی جا رہی ہے۔ ان تمام خبروں کے ذرائع ترک میڈیا اور ایجنسیاں ہی ہیں ۔اس نیوز ویب سائٹ کا ان خبروں اور تبصروں سے متفق ہونا ضروری نہیں ہے)
اتاترک کی نظریات اور سیکولرازم پر سختی سے کاربند محرم اِنجے نے سب سے پہلے 1995ء کے انتخابات میں ری پبلکن پیپلز پارٹی (CHP) کی طرف سے برصا، یالووا سے پارلیمنٹ کے انتخابات میں حصہ لیتے ہوئے اپنی سیاست کا آغاز کیا لیکن وہ یہ انتخابات جیتنے میں ناکام رہے تاہم انہوں نے 1998 میں CHP کے یالووا کے صوبائی چیئرمین منتخب ہو کر اپنی سیاست کو جاری رکھا اور اس دوران علاقائی اخبار میں کالم لکھتے ہوئے شہرت حاصل کی۔
محرم اِنجے 2002 ءکے انتخابات میں CHP کے رکنِ پارلیمنٹ منتخب ہو کر قومی اسمبلی میں قومی تعلیمی کمیشن کے رکن نامزد کردیے گئے ۔انہوں نے اس دوران امام خطیب اسکولوں سے فارغ التحصیل طلبا کے یونیورسٹیوں میں داخل کے امتحانات میں ایکسٹرا مارکس کے ساتھ داخلے کی شرط کے قانون میں ترمیم کرنے کی سختی سے مخالفت کی جس پر اسلامی حلقوں میں ان کے خلاف شدید ردِ عمل ابھر کر سامنے آیا۔
ایردوان ہمیشہ محرم اِنجے کی تنقید کی زد میں رہے
محرم اِنجے کو صدر ایردوان کے خلاف سخت بیانات دینے اور مسلسل تنقید کا نشانہ بنانے کی وجہ سے بڑی شہرت حاصل ہوئی ۔25 دسمبر 2009 میں ترکیہ کی قومی اسمبلی اپنی 10 منٹ کی تقریر میں صدر ایردوان اور برسر اقتدار آق پارٹی پر سخت الفاظ کی بوچھاڑ کردی جسے اپوزیشن ہاتھوں ہاتھ لیا اور میڈیا میں محرم اِنجے کے چرچے ہونے لگے۔
محرم اِنجے نے اپنے آپ کو حکومت پر تنقید کرنے تک ہی محدود نہ رکھا بلکہ اپنی پارٹی پر بھی تنقید کے تیر برسا ئے اور 18 اگست 2014 کو پارٹی کے گروپ ڈپٹی چیئرمین کے عہدے سے مستعفی ہو کر پارٹی کے چئیرمین کے انتخابات میں حصہ لیا لیکن کمال کلیچ دارو نے انہیں شکست سے دوچار کردیا ۔
فروری 2018 میں منعقدہ CHP کی 36 ویں عام کنونشن میں انہوں نے ایک بار پھر کمال کلیچ دار اولو کو چیلنج کیا لیکن اس بار بھی کمال کلیچ دار اولو کے ہاتھوں شکست سے دوچار ہوئے ۔
4 مئی 2018 کے ترکیہ کے صدارتی انتخابات میں CHP نے ان کو صدارتی امیدوار کے طور پر نامزد کیا۔ محرم اِنجے نے 45 دنوں میں 75 صوبوں میں 107 ریلیاں کرکے ریکارڈ قائم کیا۔ انہوں نے صدارتی انتخابات میں 30.67 فیصد (15.216.199 ووٹ) ووٹ حاصل کرتے ہوئے دوسری پوزیشن حاصل کی اور اس طرح 41 سالوں بعد ری پبلکن پیپلز پارٹی (CHP) کے کسی بھی امیدوار کو پہلی بار 30 فیصد سے زاہد ووٹ حاصل ہوئے۔
محرم اِنجے نے 11 ستمبر 2019 کو ایک بار پھر 2023ء میں ہونے والے صدارتی انتخابات میں حصہ لینے کا اعلان کردیا تاہم انہوں نے 8 دسمبر 2020 کو CHP سے علیحدگی اختیار کرتے ہوئے ’’ مملکت پارٹی‘‘ کے نام سے نئی سیاسی پارٹی تشکیل دی اور 17 مئی 2021 میں وہ مملکت پارٹی کے چئیرمین منتخب ہوگئے۔
محرم اِنجے باضابطہ طور پر صدارتی امیدوار
محرم اِنجے نے 14 مئی 2023 کے صدارتی انتخابات میں حصہ لینے کے لیے ترکیہ کے سپریم الیکشن کمیشن کی جانب سے عائد ایک لاکھ دستخط حاصل کرنے کی شرط کو پہلے دو دنوں ہی میں پوری کرتے ہوئے چار صدارتی امید واروں کی فہرست میں جگہ بنالی ہے۔
محرم اِنجے جو بائیں بازو سے تعلق رکھتے ہیں اور ہمیشہ کمال ازم اور سیکولرازم کا پرچار کرتے ہیں بائیں بازو کی جماعتو ں کے شدید دباو کے باوجود آخری دم تک صدارتی انتخابات میں حصہ لینے پر اصرار جاری رکھے ہوئے ہیں اور وہ اس وقت ملت اتحاد کے جیتنے کی راہ میں سب سے بڑی رکاوٹ سمجھے جا رہے ہیں۔ کچھ عرصہ قبل تک کروائے جانے والے سروئیز میں ان کو 4 سے 6 فیصد ووٹروں کی حمایت حاصل تھی جیسے جیسے انتخابات قریب آتے جا رہے ہیں مختلف سروئے کمپنیاں ان کے ووٹروں کی تعداد میں مسلسل اضافہ ہونے سے آگاہ کررہی ہیں۔ اپوزیشن کا خیال ہےایسا جان بوجھ کر کیا جا رہا ہے اور ایسا کرنے کے پیچھے دراصل صدر ایردوان کا ہاتھ ہے۔ ایردوان کو ملت اتحاد سے سخت تشویش لاحق ہے اور وہ اس اتحاد کو شکست سے دوچار کرنے کے لیے اپوزیشن کے ووٹ تقسیم کرنے اور اپنی کامیابی کو یقینی بنانے کی ہر ممکنہ کوششیں جاری رکھی ہوئی ہیں۔ اپوزیشن کے مطابق کوئی بھی صدارتی امیدوار چند دنوں کے اندر اندر اتنی مقبولیت حاصل نہیں کر پاتا جتنی مقبولیت محر م اِنجے کے سروئے میں دکھائی جا رہی ہے۔ ان کے مطابق آق پارٹی کے سپورٹر دراصل محرم اِنجے کے حق میں ووٹ استعمال کررہے ہیں تاکہ محرم اِنجے کی مقبولیت کو بڑھا چڑھا کر پیش کیا جائے اور ان کو صدارتی انتخابات کی دوڑ میں شامل رکھا جائے اور اس طرح ملت اتحاد کے ووٹوں کو تقسیم کرکے صدر ایردوان کی جیت کو یقینی بنایا جاسکے۔
اپوزیشن کے مطابق محرم اِنجے کو ابھی بھی 4 سے 6 فیصد تک ہی ووٹ حاصل ہیں اور یہ 4 سے 6 فیصد کے لگ بھگ ووٹ بھی ملت اتحاد کی کامیابی کے لیے بڑی اہمیت کے حامل ہیں ۔
محرم اِنجے کا مستقبل
ادھر سروئیز کمپنیوں کا خیال ہے جنگ اور سیاست میں ہر چیز جائز ہےلیکن یہ بھی ایک حقیقت ہے کہ اگر محرم اِنجے صدارتی انتخابات میں حصہ لینے سے باز نہیں آتے اور ان کی وجہ سے ملت اتحاد شکست سے دوچار ہوتا ہے تو محرم اِنجے کا مستقبل ہمیشہ ہمیشہ کے لیے تاریک بھی ہوسکتا ہے اور وہ کسی کو منہ دکھانے کے بھی لائق نہیں رہیں گے کیونکہ اپنے آپ کو اتاترک اور سیکولر ازم کا داعی سمجھنے والے محرم اِنجے کی سیاست پر ایک ایسا دھبہ لگ جائے گا جس کو وہ کبھی بھی نہیں دھو سکیں گےاور سیاست سے کنارا کشی پر مجبور ہو سکتے ہیں جبکہ ملت اتحاد کا ساتھ دینے کی صورت میں آئندہ چل کران کے لیے ری پبلکن پیپلز پارٹی کے چئیر مین بننے کی راہ بھی ہموار ہوسکتی ہے اور مستقبل میں ان کے لیے اقتدار کے دروازے بھی کھل سکتے ہیں۔
یہ انتخابات ایک طرف ترکیہ کی تاریخ میں بہت بڑے معرکے کی حیثیت بھی رکھتے ہیں تو دوسری طرف یہ انتخابات محرم اِنجے کی مستقبل کی سیاست کا تعین کرنے کے لحاظ سے بھی بڑی اہمیت کے حامل ہیں۔اپوزیشن کے مطابق فیصلہ محرم اِنجے نے کرنا ہے۔ اپوزیشن کا کہنا ہے کہ محرم اِنجے کے پاس دو ہی متبادل موجود ہیں ، ان میں سے ایک ایردوان کی گرتی ہی دیوار کو سہارا دینا ہے یا پھر دوسرا راستہ ملت اتحاد کا ساتھ دیتے ہوئے ملک میں ڈیموکریسی کو مضبوط بنانا ہےاور تاریخ رقم کرنا ہے ؟