اس وقت دنیا بھر کی نظریں ترکیہ میں ہونے والے صدارتی اور پارلیمانی انتخابات پر مرکوز ہیں اور عالمی میڈیا اس بارے میں ایک دوسرے سے بالکل مختلف تجزیے اور خبریں بھی پیش کررہا ہے ۔خاص طور پر مغربی میڈیا میں اور برطانوی میگزین دی اکانومسٹ جو اس سے قبل ملت اتحاد کے صدارتی امیدوار کی کامیابی کے زیادہ چانسز ہونےکا دعویٰ کر تا رہا ہے نے پلٹا کھاتے ہوئے اپنی حالیہ اشاعت میں جمہور اتحاد کی بڑھتی ہوئی طاقت اور مقبولیت کا ذکر کرتے ہوئے لکھا ہے کہ ملت اتحاد میں پیدا ہونے والے حالیہ اختلافات کے منفی اثرات ملت اتحاد پر مرتب ہوئے ہیں اور ترک عوام نے بھی اپنی سوچ میں تبدیلی لاتے ہوئے ملت اتحاد کے اختلافات سے تنگ آکر صدر ایردوان کو ووٹ دینے کو ملک کے استحکام کے لیے بہترین چوائس قرار دیا ہے۔
اب جبکہ ترکیہ کے صدارتی اور پارلیمانی انتخابات میں صرف ڈیڑھ ماہ سے بھی کم عرصہ باقی رہ گیا ہے ترکیہ کے ووٹرز میں ہیجان خیز کیفیت ابھر کر سامنے آرہی ہے اور جو ووٹرز اس سے قبل غیر جانبدار ہونے اور خاموش رہنے کو ترجیح دیتے رہے ہیں نے بھی صدر ایردوان کے حق میں اپنا ووٹ دینے کا برملا اظہار کرنا شروع کردیا ہے۔ترکیہ کے انتخابات میں عالمی میڈیا نے گہری دلچسپی لینے کا سلسلہ جاری رکھا ہوا ہے اور ترکیہ کے انتخابات کے بارے میں بڑی تعداد میں تجزیے پیش کیے جا رہے ہیں ۔
ایردوان ایک بار پھر صدر منتخب ہو جائیں گے
برطانوی میگزین دی اکانومسٹ نے ترکیہ کے انتخابات کے بارے میں اپنے انتخابی تجزیے میں پہلے سے ہٹ کر نکتہ نظر پیش کیا ہے۔ اکانومسٹ انٹیلی جنس یونٹ (EIU)، لندن میں مقیم میگزین کے تحقیق اور تجزیہ کے شعبے کے تیار کردہ تجزیے میں 14 مئی کے انتخابات میں صدر ایردوان کی کامیابی کے واضح امکانات موجود ہونے کا ذکر کیاہے۔
EIU کے سینئر ریسرچر Agathe Demarais اور Adeline VanHoutte کی جانب سے پیش کردہ تجزیے میں کہا گیا ہے اس بار ترکیہ میں صدارتی معرکہ موجودہ صدر ایردوان اور اپوزیشن لیڈر کمال کلیچ دار اولو کے درمیان ہے۔
تجزیے میں کہا گیا ہے کہ صدر ایردوان کی عوامی حمایت میں مسلسل اضافہ ہوتا جا رہا ہے اور جیسے جیسے انتخابات قریب آرہے ہیں صدر ایردوان نے اپنی مقبولیت میں اضافہ کرنے کے لیےٹھوس اقدامات اٹھانے کا سلسلہ جاری رکھا ہوا ہے اور اب انہوں نے معیشت کے استحکام کی جانب خصوصی توجہ دینی شروع کردی ہے اور اس کے نتائج بھی برآمد ہونا شروع ہوگئے ہیں جبکہ جن ووٹرز نے چھ مختلف جماعتوں کے اتحاد کی جانب رجوع کیا تھا اب وہ آہستہ آہستہ ایک بار پھر ایردوان کی جانب واپس آرہے ہیں ۔
تجزیے میں کہا گیا ہے کہ ملت اتحاد کے آپس کے اختلافات اور اس کے علاوہ بائیں بازو کی جماعت ری پبلکن پیپلز پارٹی سے تعلق رکھنے والے محرم اِنجے کے بھی صدارتی امیدوار کے طور پر ابھر کر سامنے آنے سے ملت اتحاد کے لیے حالات پہلے جیسے سازگار نہیں رہے ہیں۔ تجزیے سے پتہ چلتا ہے کہ 6 جماعتی اتحاد کے بارے میں مغربی میڈیا کے نظریات میں تبدیلی آنا شروع ہوگئی ہے اور اب ایک بار پھر مغربی میڈیا نے صدر ایردوان کے کامیابی کے واضح امکانات موجود ہونے کے بارے میں خبروں اور تجزیوں کو جگہ دینی شروع کردی ہے۔