صدر رجب طیب ایردوان نے عید الفطر کے موقع پر اپنے سوشل میڈیا اکاؤنٹ پر مبارکباد کا پیغام جاری کیا ہے۔
صدرایردوان نے اپنے ٹویٹر اکاؤنٹ پر ترکی اور عربی زبانوں میں اپنے پیغام میں کہا ہے کہ میں اپنی قوم اور عالم اسلام کو عیدالفطر کی مبارکباد پیش کرتا ہوں۔ میں اپنے رب کا شکر ادا کرتا ہوں کہ جس نے ہمیں ایک اور عید منانے کا موقع فراہم کیا۔ ایک بار پھر، میں زلزلے اور سیلاب میں جاں بحق ہونے والے اپنے شہریوں پر اللہ تعالیٰ سے رحمت اور ان کے لواحقین کے لیے صبر کی دعا کرتا ہوں۔ میں اس موقع پر تما م عالمِ اسلام کو عید الفطر کی مبارکباد پیش کرتا ہوں۔
آیا صوفیہ کی مسجد کبیر میں عید الفطر کی نماز کے بعد میڈیا سے گفتگو کرتے ہوئے صدر ایردوان نے کہا کہ ہم زلزلے سے متاثرہ اپنے لوگوں کے لیے اللہ سے دعا گو ہیں۔زلزلہ زدہ علاقوں میں ہمارے شہریوں کو رمضان المبارک میں فراموش نہیں کیا گیا۔ہم ان کے لیے نئے مکانات بنانے کے لیے پرعزم ہیں۔تمام ریاستی ادارے،این جی اوز ان خطوں میں زندگی کو معمول پر لانے کے لیے سرگرم ہیں۔
قدرتی گیس سے متعلق سوال کے جواب میں انہوں نے کہا کہ توانائی اور قدرتی وسائل کی وزارت کسی بھی شہر یا ضلع کو قدرتی گیس کے بغیر نہیں چھوڑے گی۔ ریزرو کی مقدار اور پیداوار کو بڑھانے کے لیے زلزلے کی تحقیق اور ڈرلنگ کا کام جاری ہے۔
ترکیہ کی مقامی الیکٹرک کار توگ سے متعلق سوال کا جواب دیتے ہوئے صدر ایردوان نے کہا کہ ڈیلیوری کا سلسلہ شروع ہوچکا ہے اور بڑی تعداد میں گاڑیاں فروخت کی جا رہی ہیں۔
انہوں نے بتا یا کہ ہم نے توگ کی پہلی گاڑیوں میں سے ایک بطور تحفہ آ ذربائیجان کے صدر الہام علی ائیف اور دوسری گاڑی ، ازبکستان کے صدر شوکت مرزائیف کو تحفے کے طور پر پیش کی ہے جبکہ دیگر رہنماوں کو بھی یہ گاڑی تحفے کے طور پر پیش کریں گے۔
انہوں نے کہا کہ توگ گاڑی ایک عالمی برانڈ بن چکا ہے جس کی مانگ میں مسلسل اضافہ ہوتا جا رہا ہے۔
صدر ایردوان نے بعد میں مسجد کے باہر جمع ہو جانے والے بچوں میں عید ی بھی تقسیم کی۔
