ترکیہ کے انتخابات جیسے جیسے سر پر آتے جا رہے ہیں لوگوں میں جوش و خروش تو بڑھنے کے ساتھ ساتھ حیران کن طور پر تبدیلیاں بھی رونما ہو رہی ہیں۔
ترکیہ کی مختلف سروئیز کمپنیوں کی جانب سے کروائے جانے والے سروئیز میں اگرچہ پہلے روانڈ میں صدارتی انتخابات کا نتیجہ نہ آنے کو اجاگر کیا جا رہا تھا اور دوسرے راونڈ میں ملت اتحاد کے صدارتی امیدوار کمال کلیچ دار اولو کے انتخابات جیتنے کی پیشن کوئی کی جا رہی تھی لیکن محرم اِنجے کے یکدم انتخابات سے دستبردار ہونے کے اعلان کے بعدصورتِ حال یکسر تبدیل ہو کر رہ گئی ہے اور اب پہلے ہی راونڈ میں ملت اتحاد کے صدارتی امیدوار کمال کلیچ دارا ولو کے جیتنے کے واضح امکانات پائے جاتے ہیں۔
مملکت پارٹی کے چئیر مین محرم اِنجے نے آج صبح حیران کن طور اپنی صدارتی امیدواری سے دستبردار ہونے کا اعلان کردیا ہے۔
اتوار، 14 مئی کو ہونے والے صدارتی انتخاب اورپارلیمانی انتخابات سے چند روز قبل صدارتی امیدوار اور مملکت پارٹی کے چئیرمین محرم اِنجے نے پریس کانفرنس منعقد کرتے ہوئے اپنی امیدواری سے دستبردار ہونے کا اعلان کیا ہے۔
انہوں نے پریس کانفرنس سے خطاب کرتے ہوئے کہا ہے کہ وہ اپنی امیدواری سے دستبردار ہو رہے ہیں لیکن پارلیمانی انتخابات میں ان کی جماعت حصہ لے گی اور وہ عوام سے مملکت پارٹی کو ووٹ دینے کی اپیل کرتے ہیں۔
صدارتی امیدواری سے دستبردار ہونے کے بعد اب صدارتی انتخابی دوڑ میں صرف تین امیدوار باقی رہ گئے ہیں۔
جمہور اتحاد کے صدارتی امیدوار صدر رجب طیب ایردوان، ملت اتحاد کے صدارتی امیدوار، کمال کلیچ دار اولو اور اتا اتحاد کے صدارتی امیدوار سینان اوعان ایک دوسرے کے مدمقابل ہوں گے۔