پاکستان بھر میں تحریک انصاف کی سرکردہ قیادت کا پارٹی اور سیاست چھوڑنے کے لئے پراسرار پریس کانفرنسز کا سلسلہ جاری۔ معروف گلوکار و سماجی شخصیت ابرار الحق پریس کانفرنس کے دوران آبدیدہ۔
پاکستان بھرمیں پی ٹی آئی سرکردہ شخصیات کی یکے بعد دیگرے پارٹی و سیاست چھوڑنے کے لئے پراسرار پریس کانفرنسز جاری۔ معروف گلوکار و سماجی شخصیت ابرار الحق سیاست چھوڑنے کے لئے پریس کانفرنس کے دوران آبدیدہ۔پاکستان بھر میں تحریک انصاف سے وابستہ صف اول کی شخصیات کا پی ٹی آئی اور سیاست سے کنارہ کشی اختیار کرنے کے لئے پریس کانفرنسز کا سلسلہ جاری ہے۔ 9 مئی 2023 والے دن سابق وزیراعظم اور چیئرمین تحریک انصاف کی القادر ٹرسٹ میں رینجرز کے ہاتھوں گرفتاری کے بعد ملک بھر میں ہنگامے پھوٹ پڑے تھے اور کچھ مشکوک افراد کے اکسانے پر مشتعل مظاہرین کی کورکمانڈر ہاؤس لاہور میں نہ صرف توڑ پھوڑ کی بلکہ آگ بھی لگا دی گئی تھی۔
فائل فوٹو
اس ہنگامہ آرائی کے پس منظر میں ملک بھر میں پی ٹی آئی سرکردہ شخصیات سمیت دس ہزار سے زائد افراد کو گرفتار کیا گیا۔ دلچسپ بات یہ ہے کہ گرفتاریاں عمل میں لانے کے بعد جس سرکردہ شخصیت کو بھی اعلی عدلیہ نے ضمانت پر رہا کرنے کا فیصلہ دیا، اس کو اسی وقت دوبارہ پھر سے گرفتار کر لیا گیا اور کچھ سیاسی شخصیات کی مسلسل پانچ پانچ مرتبہ بھی گرفتاری عمل میں لائی گئی۔ لیکن حیرت کی خبر یہ ہے کہ جس شخصیت نے بھی پریس کانفرنس کر کے پی ٹی آئی یا سیاست چھوڑنے کا فیصلہ کیا اس کی دوبارہ گرفتاری نہیں ہوئی اور اسے رہائی مل گئی۔ تحریک انصاف و سیاست چھوڑنے والی سرکردہ شخصیات میں شیریں مزاری، فیاض الحسن چوہان، علی زیدی ، اسد عمر ، فردوس عاشق اعوان، فواد چوہدری سمیت راجہ شکیل، دیوان عظمت، احسن عنصر، ایم این اے خرم شہزاد، کراچی سے پی ٹی آئی کی خاتون ایم پی اے رابعہ اظفر، سینیٹر سیف اللّٰہ نیازی کے ساتھ ساتھ درجنوں افراد کا تحریک انصاف چھوڑنے کاسلسلہ جاری ہے۔ گزشتہ روز معروف گلوکار اور سماجی شخصیت ابرار الحق پریس کانفرنس نے دوران آبدیدہ ہو گئے اور کہا جب سیاست ہی چھوڑ دی تو پھر پی ٹی آئی یا کسی اور جماعت کا نام کیالینا۔
