صدر رجب طیب ایردوان صدارتی انتخابات جیتنے کے بعد اب نئی دوڑ شروع کرچکے ہیں اور صدارتی محل میں اس سلسلے میں مسلسل صلاح و مشورے کا سلسلہ جاری ہے۔ صدر ایردوان اپنی کابینہ کے اکثر وزراء اور نائب صدر فواد اوکتائے کو پارلیمنٹ کی نشستیں دلوانے میں کامیاب رہے ہیں جس کا مطلب یہ ہے کہ جو وزراء پارلیمنٹ کے اراکین منتخب ہوچکے ہیں ان کاوزیر بننے کا کوئی چانس نہیں ہے( یا پھر نشست سے دستبردار ہونا پڑے گا ) جبکہ نائب صدر فواد اوکتائے کو پارلیمنٹ کا اسپیکر بنائے جانے کا خیال ظاہر کیا جا رہا ہے اور اسی طرح پارلیمنٹ کے سابق اسپیکر مصطفیٰ شَن توپ کو نائب صدر بنائے جانے کے قوی امکانات ہیں ۔
صدر ایردوان کے پرانے ساتھی اور ان کی کابینہ میں صدر کے داماد بیرات البائراک سے قبل وزیر خزانہ کے فرائض ادا کرنے والے مہمت شمشیک کو ملک کی خراب ہوتی ہوئی اقتصادی صورتِ حال کو بہتر بنانے کے لیے آخر کار مہمت شمشیک کو ایک بار پھر راضی کرلیا گیا ہے۔ملنے والے اطلاعات کے مطابق مہمت شمشیک کے اس عہدے کو قبول کرنے کے لیے انہیں آزادی سے کام کرنے، اور ان کے اور ان کی ٹیم کے کام میں کسی کو مداخلت نہ کرنے کی شرط پر اس عہدے کو قبول کرنے کا خیال ظاہر کیا جا رہا ہے۔
صدر رجب طیب ایردوان آج آخری بار موجودہ کابینہ کے اجلاس میں شرکت کریں گے۔ کابینہ اجلاس کے بعد اب نظریں الیکشن جیتنے والی نئی کابینہ پر ہیں۔ نئی کابینہ میں صدر ایردوان کی اے ٹیم میں کون ہوگا؟ صدر ایردوان نئی ترک صدی کے آغاز کے موقع پر ایک مضبوط اور اپنے امور کے ماہر وزراء پر مشتمل کابینہ کو جگہ دینا چاہتے ہیں۔
یہاں اپنے قارئین کو یہ بھی بتاتا چلوں ترک صدر ایردوان مسلسل 17 ویں بار انتخابات جیتتے ہوئے نا قابلِ تسخیر لیڈر ہونے کا ریکارڈ قائم کرچکے ہیں۔
ترکیہ کی نئی کابینہ کا نئی ترک صدی کی جانب سفر
نئی کابینہ میں کتنی تعداد میں پرانے تجربہ کار وزراء شامل ہوں گے؟ نئی کابینہ میں کتنے نئے وزراء شامل کیے جا رہے ہیں؟
تما م ترکوں کی نظریں نئی کابینہ پر ۔۔۔
ترکیہ کے صدارتی انتخابات کے بعد اب تمام ترکیہ کی نظریں نئی ترک کابینہ پر مرکوز ہو کر رہ گئی ہیں۔
نئے وزراء کے ناموں کے بارے میں مختلف دعوے
لیکن یہ بھی ایک حقیقت ہے صدر ایردوان کو قریب سے جاننے والے افراد یہ بات اچھی طرح جانتے ہیں کہ صدر ایردوان اس وقت تک وزراء کے بارے میں کسی کو کانوں کان خبر نہیں ہونے دیتے جب تک اس وزیر کے نام کو کنفرم نہ کردیا جائے ۔اس لیے جب تک صدر کے آفس کے ڈائیریکٹر حسن دوان جب تک ٹیلی فون کرتے ہوئے کسی نام کو کنفرم نہیں کردیتے اس وقت تک تمام ناموں کو افواہ ہی سمجھا جاتا ہے۔
کابینہ میں بڑے پیمانے پر تبدیلیاں
اس وقت جو بات عیاں ہے وہ نئی کابینہ میں بڑی تعداد میں نئے نام سامنے آنے کی توقع ہےالبتہ اس نئی کابینہ میں پرانے تجربہ کار وزراء جنہوں نے پارلیمنٹ کی کوئی نشست حاصل نہیں کی ہے ان کو بھی شامل کیے جانے کا خیال ظاہر کیا جا رہا ہے۔
ترکیہ میں طویل عرصے بعد وزارتی ڈھانچوں میں نظر ثانی
ملنے والی اطلاعات سے پتہ چلتا ہے کہ صدر ر رجب طیب ایردوان اس بار وزارتوں کے ڈھانچے میں نظرثانی کرنے کا ارادہ رکھتے ہیں اور اس پر کام بھی جاری ہے۔ موجودہ کابینہ میں نائب صدر سمیت 17 وزراء موجود ہیں جبکہ ترکیہ کے پرانے نظام میں21 وزارتیں ہوا کرتی تھیں لیکن ملک میں صدارتی نظام کو متعارف کروانے کے بعد کئی ایک وزارتوں کو ایک دوسرے میں ضم کردیا گیا اور یوں وزارتوں کی تعداد 16 کردی گئی تھی۔
مثال کے طور پر یورپی یونین کی وزارت کو وزارتِ خارجہ میں ضم کردیا گیا تھاجبکہ وزارتِ جنگلات کو وزارتِ زراعت میں ضم کردیا گیا جبکہ ٹریژری اور فنانس منسٹریز کو وزارتِ خزانہ میں کی چھت تلے یکجا کردیا گیا۔
اب ان میں سے کچھ وزارتوں کو ایک بار پھر ایک دوسرے سے الگ کرنے اور کچھ نئی وزارتوں کا قیام بھی ایجنڈے میں شامل ہے۔
اطلاعات کے مطابق اس نئے دور میں وزارتِ آفت اور وزارتِ سرمایہ کاری کے بھی تشکیل دیے جانے کا خیال ظاہر کیا جا رہا ہے۔ویسے بھی صدر ایردوان نے صدارتی انتخابات کے دوسرے مرحلے میں ان کے اتحاد میں شامل ہونے والے اتا اتحاد کے صدارتی امیدوار سینان اوعان سے ملاقات کے موقع پر وزارتِ آفت کے قیام کا عندیہ دیا تھا۔
فی الحال قدرتی آفات اور ان کا انتظام ڈیزاسٹر اینڈ ایمرجنسی مینجمنٹ پریذیڈنسی (AFAD) کے ذریعے کیا جا رہا ہے ۔ اطلاع کے مطابق ترکیہ میں غیر ملکی سرمایہ کاری کے مسلسل بہاو کو جاری رکھنے اور غیر ملکی سرمایہ کاروں کو ترغیب دینے کے لیے وزارتِ سرمایہ کاری کی ضرورت محسوس کی جا رہی ہے۔
سپریم الیکشن کمیشن کی جانب سے حتمی نتائج کے اعلان کے بعد صدر ایردوان کے دو مئی کو حلف اٹھانے ، حکومت تشکیل دینے اور نئی کابینہ کے قیام کا اعلان کیے جانے کی توقع کی جا رہی ہے۔
دیکھتے ہیں نئی کابینہ میں کون کون شامل ہوتا ہے۔ صدارتی انتخابات کے بعد اس ہیجان خیز کیفیت کا انتظار کیا جا رہا ہے۔