صدر رجب طیب ایردوان کی طرف سے خصوصی دعوت پر وزیراعظم پاکستان محمد شہباز شریف کا دورہ ترکیہ، پاکستان اور ترکیہ کے درمیان گہرے برادرانہ تعلقات کا اعادہ ہوگا۔ وزیراعظم پاکستان مئی 2023 کے انتخابات کے نتیجے میں صدر رجب طیب ایردوان کے ترکیہ کے دوبارہ صدر منتخب ہونے پر تقریب حلف برداری میں شرکت کر کے پاکستان کی حکومت اور عوام کی جانب سے صدر ایردوان کو تہنیتی مبارکباد پیش کریں گے۔ پاکستان اور ترکیہ کے درمیان متنوع اور کثیر جہتی تزویراتی شراکت داری کو مزید رفتار فراہم کرنے کے مقصد سے وزیراعظم پاکستان صدر رجب طیب ایردوان کو اسلام آباد میں اعلیٰ سطحی سٹریٹجک کوآپریشن کونسل (HLSCC)۔ میں شرکت کی دعوت بھی دیں گے۔
پاکستان اور ترکیہ کے تعلقات عقیدے، ثقافت اور تاریخ کی مشترکات میں گہرے طور پر جڑے ہوئے ہیں اور باہمی اعتماد اور علاقائی اور عالمی معاملات پر نظریات کے ہم آہنگی سے مضبوط ہوئے ہیں۔ قیادت کی سطح پر متواتر تبادلے دونوں ممالک کے درمیان دوستی کے لازوال رشتوں کی ایک واضح خصوصیت ہیں۔