پاکستان کے وزیر اعظم محمد شہباز شریف نے کہا ہے کہ آئی ایم ایف کی پیشگی شرائط پوری کر دی ہیں،امید ہے رواں ماہ آئی ایم ایف کے ساتھ حتمی معاہدہ ہو جائے گا،موجودہ حکومت پاکستان کے عوام اور برادرانہ اور دوست ممالک کی مدد سے بہترین انداز میں چیلنجوں سے نمٹنے میں کامیاب رہی ہے،عمران خان کو سنگین بدعنوانی اور غیر قانونی لین دین کے الزامات کا سامنا ہے جس سے قانون کے مطابق نمٹا جائے گا، پاکستان اور ترکیہ مستقبل قریب میں بائیو گیس، شمسی توانائی اور پن بجلی جیسے شعبوں پر توجہ مرکوز کرکے تجارت کو بڑھانے اور باہمی ترقی کو فروغ دینے کے لئے تعاون کو فروغ دیں گے۔
وزیراعظم میاں محمد شہباز شریف نے ان خیالات کا اظہار ترکیہ کے صدر رجب طیب ایردوان کی تقریب حلف برداری میں شرکت کے موقع پر ترکیہ کے قومی خبر رساں ادارے اناطولیہ کی نمائندہ دل آرا حمید کو تفصیلی انٹرویو دیتے ہوئے کیا۔
وزیراعظم محمد شہباز شریف نے کہا کہ ہم اب بھی بہت پرامید ہیں کہ آئی ایم ایف پروگرام عمل میں آئے گا، آئی ایم ایف کی طرف سے ہمارا 9واں جائزہ تمام شرائط و ضوابط سے مطابقت رکھتا ہے اور امید ہے کہ ہمیں اس مہینے کچھ اچھی خبر ملے گی، ہم نے تمام شرائط پوری کر دی ہیں،آئی ایم ایف کی ہر ایک شرط کو پیشگی اقدامات کے طور پر پورا کیا گیا ہے۔انہوں نے کہا کہ ان میں سے کچھ اقدامات عام طور پر بورڈ کی منظوری کے بعد پورے کئے جاتے ہیں لیکن اس بار آئی ایم ایف کا تقاضا تھا کہ ان اقدامات کو بورڈ کی منظوری سے پہلے پورا کیا جائے، اس لئے ہم نے ان کو پورا کیا۔ آئی ایم ایف کے ساتھ مذاکرات ناکام ہونے کی صورت میں ہنگامی منصوبہ کے حوالہ سے شہباز شریف نے پاکستانی قوم کے عزم اور استقامت پر زور دیا، پاکستان کے عوام نے ماضی میں چیلنجز کا سامنا کیا ہے اور اگر ضرورت پڑی تو ہم اپنی کمر کس لیں گے اور کھڑے ہوں گے۔
فوجی تنصیبات پر حملہ کرنے والوں پر فوجی ایکٹ کے تحت مقدمہ چلایا جائے گا
گزشتہ ماہ کرپشن کیس میں خان کی گرفتاری کے بعد سے پاکستان بدامنی کی لپیٹ میں ہے، جس نے ملک بھر میں پرتشدد مظاہروں کو جنم دیا اور ملک بھر میں فوجی تنصیبات پر حملے بھی کیے گئے۔
ملک کی اعلیٰ ترین عدالت کی جانب سے گرفتاری کو غیر قانونی قرار دیے جانے کے بعد انہیں رہا کر دیا گیا تھا، تاہم اس کے بعد سے ان کی پاکستان تحریک انصاف (پی ٹی آئی) پارٹی کے ہزاروں کارکنوں اور رہنماؤں کو حراست میں لے لیا گیا ہے۔
ان میں سے بہت سے پارٹی چھوڑ چکے ہیں، یا سیاست مکمل طور پر چھوڑ چکے ہیں۔ حکومت کے مطابق، تشدد میں ملوث کچھ افراد کے خلاف فوجی عدالتوں میں مقدمہ چلایا جائے گا۔
کیا کوئی بھی مہذب ملک ریاست کے خلاف اس طرح کی توڑ پھوڑ کی اجازت دے گا، جو پاکستان میں 9 مئی کو ہوا؟
ترکیہ- پاکستان یک جان دو قالب
ترکیہ اور پاکستان کے درمیان تعلقات کا ذکر کرتے ہوئے وزیراعظم شہباز شریف نے سب سے پہلے ترکیہ کے عوام اور صدر ایردوان کے دوبارہ منتخب ہونے پر مبارکباد دی، اور اسے بہت اہم پیش رفت قرار دیا ہے۔
انہوں نے کہا کہ وہ اپنے بھائی صدر رجب طیب ایردوان جو ایک صاحبِ بصیرت رہنما اور عوامی خدمت پر یقین رکھنے والے انسان ہیں کے ساتھ قریب سے کام کرنے کو بڑی اہمیت دیتے ہیں ۔ مجھے امید ہے کہ ہمارے تعلقات بھائی چارے، افہام و تفہیم اور اقتصادی تعاون کے لحاظ سے بہت فروغ پاتے رہیں گے۔
انہوں نے کہا کہ میں ہمیشہ دونوں ممالک کو یک جان دو قالب کہتا ہوں اور دونوں کے دل ایک ایک ساتھ دھڑکتے ہیں۔
انہوں نے کہا کہ پاکستان اور ترکیہ مستقبل قریب میں بایوگیس، شمسی توانائی اور پن بجلی جیسے شعبوں پر توجہ مرکوز کرکے تجارت اور باہمی ترقی کو فروغ دینے کے لیے تعاون کو فروغ دیں گے۔