اسلام آباد، پاکستان (صغیر رامے ) ایف آئی اے نے یونان کشتی حادثہ کی تحقیقات کا دائر وسیع کرتے ہوے بیرون ملک فرار ہونے والے انسانی سمگلروں کی گرفتاری کے لیے مختلف ممالک سے رابطے شروع کر دیے ہیں، ذرائع کے مطابق ایف آئی اے حکام ان انسانی سمگلروں کے اس نیٹ ورک تک پہنچ چکی ہے جو مختلف ممالک میں بیٹھ کر پاکستان میں اپنے سب ایجنٹ کے ذریعے لوگوں کو لوٹنے اور ان کی زندگیوں سے کھیلنے میں ملوث ہیں، ذرائع نے بتایا ہے کہ یہ نیٹ ورک اٹلی، لیبیا، یونان اور ترکی تک پھیلا ہوا ہے اور ان بڑے ایجنٹوں کا تعلق پاکستان کے مختلف شہروں سے ہے جو یونان کشتی حادثہ کے بعد پاکستان سے فرار ہو گئے تھے
ذرائع نے بتایا ہے، یونان کشتی حادثہ کے گرفتار ہونے والے مرکزی ایجنٹ ساجد محمود جس کا تعلق منڈی بہاؤالدین سے ہے کے نیٹ ورک میں سرگودھا کا ایجنٹ سہیل انجم بھی شامل تھا جو اٹلی میں لوگوں کو ایڈجسٹ کرنے کے لیے کام کرتا تھا اور ملک کے مختلف علاقوں سے کئی لوگوں کو اٹلی بھجوانے کے لیے ان سے کروڑوں روپے لے چکا ہے، اسی طرح ایجنٹ نصراللہ اور ذوالقرنین نے بھی گرفتاری کے بعد اہم انکشاف کیے ہیں،ذرائع کے مطابق ایجنٹ ساجد محمود کا نیٹ ورک یونان اور ترکی تک پھیلا ہوا ہے ذرائع کے مطابق ایف آئی اے ایجنٹ مافیا کے بیرون ملک نیٹ ورک سے متعلق اہم پیش رفت کر رہی ہے جس میں اہم انکشافات کی توقع ہے۔
انسانی اسمگلرز کے ذریعے یورپ کے مختلف ممالک تک غیر قانونی طور پر انسانی اسمگلنگ کا یہ گورکھ دھندہ عرصہ دراز سے جاری ہے۔ ایران اور لیبیا کے راستے انسانی اسمگلنگ کا یہ کاروبار منشیات کے گلوبل گورکھ دھندے کے بعد دوسرا بڑا غیرقانونی کاروبار بن چکا ہے۔
اعدادوشمار کے مطابق غیرقانونی طور پر یونان اور اٹلی پہنچنے ک تک سلسلے میں اب تک صرف 2022 میں پچیس ہزار افراد جاں سے ہاتھ دھو بیٹھے ہیں۔ انسانی اسمگلرز یورپ کا لالچ دے کر اب تک نہ صرف کروڑوں ڈالرز کما چکے ہیں بلکہ ہزاروں خاندانوں کے چشم و چراغ کو موت کے منہ میں بھی دھکیل چکے ہیں۔
انسانی اسمگلنگ کا یہ سلسلہ اب تک بغیر کسی روز ٹوک کے جاری و ساری ہے اور انسانی اسمگلرز کا یہ نیٹ ورک پوری دنیا میں اپنے پنجے گاڑھ چکا ہے۔ پاکستان میں ایف آئی اے حکام اب تک کوئی مربوط منصوبہ بندی اور جامع حکمت عملی میں مکمل طور پر ناکام رہی ہے اور پاکستان سے غیر قانونی تارکین وطن کی ٹریفک کو نہیں روکا جا سکا۔