امریکہ اور یورپ کے 31 ممالک پر مشتمل نیٹو (شمالی اٹلانٹیک اتحاد) جو 4 اپریل 1949 میں سویت یونین کے خلاف قائم کیا گیا تھا ترکیہ نے یونان کے ساتھ 18 فروری 1952 میں اس اتحاد میں شرکت کی اور اس وقت سے ترکیہ اس اتحاد میں واحد اسلامی ملک کی حیثیت برقرار رکھے ہوئے ہے ۔
امریکہ کے بعد عسکری قوت کے لحاظ سے مضبوط ترین ملک ترکیہ
ترکیہ کو اس اتحاد میں امریکہ کے بعد عسکری افرادی قوت کے لحاظ سے سب دیگر تمام رکن ممالک پر برتری حاصل ہے۔ اگرچہ یورپ کے کئی ایک ممالک نے مختلف اوقات میں ترکیہ کی نیٹو رکنیت ختم کرنے کے بارے میں مہم بھی چلائی لیکن امریکہ کے قریبی اتحاد ملک ہونے کے ناتے ترکیہ کو کبھی نیٹو سے باہر کرنے کی کوشش نہ کی گئی کیونکہ نیٹو کوریا کی جنگ سے لے کر اب تک مختلف جنگوں ، جھڑپوں اور نیٹو آپریشن میں بڑھ چڑھ کر حصہ لیتا چلا آرہا ہے۔
روس کے یوکرین پر حملے کے بعد فن لینڈ اور سویڈن کا نیٹو رکنیت کا معمہ
روس کے یوکرین پر حملے اور جنگ کی وجہ سے فن لینڈ اور سویڈن دونوں نے بھی یوکرین کی طرح کسی وقت بھی روس کے پنجے میں آنے کے خطرے کے پیش نظر نیٹو کی رکنیت کے لیے اکھٹے ہی رجوع کررکھا ہے ۔ نیٹو کی رکنیت حاصل کرنے کے لیے رجوع کرنے والے ملک کو نیٹو کے تمام ہی رکن ممالک منظوری حاصل کرنا ضروری ہوتا ہے یعنی دوسرے معنیٰ میں تمام ہی رکن ممالک کو ایک لحاظ سے ویٹو کی پاور حاصل ہوتی ہے۔
ترکیہ کی شرائط
اس لیے ترکیہ نےاس موقع سے استفادہ کرتے ہوئے اپنی شرائط جن میں ان دونوں ممالک میں موجود ترکیہ کی دہشت گرد تنظیموں کے حامیوں کے مالی امداد جمع کرنے اور مظاہرہ کرنے پر پابندیاں لگانے اور ان ممالک میں ترکیہ کی جانب سے مطلوب دہشت گردوں کو ترکیہ کے حوالے کرنے جیسی شرائط شامل ہیں پر عمل درآمد کرنے ہی کی صورت ہی میں رکنیت کی منظوری دینے کا اعلان کررکھا ہے۔ اگرچہ ابتدا میں ترکیہ کی ان شرائط کو سنجیدہ نہ لیا گیا لیکن صدر ایردوان کے سخت موقف نے ان دونوں ممالک کو اپنی ہٹ دھرمی سے باز رہنے پر مجبور کیا اور فن لینڈ نے طویل مذاکرات کے بعد اپنے قوانین میں تبدیلی کرتے ہوئے ترکیہ کی تمام شرائط کو پورا کردیا ہے اور سویڈن نے بھی شرائط کو پورا کرنے کی یقین دہانیاں کروائی ہیں لیکن فن لینڈ کی طرح اس پر سویڈن نے تا حال عمل درآمد شروع نہیں کیا ہے جس پر دونوں ممالک کو ایک ساتھ ہی نیٹو کی رکنیت دینے کی جو پلاننگ کی گئی تھی اس پر عمل درآمد نہیں ہوسکا ہے، اس لیے ترکیہ کی جانب سے صرف فن لینڈ ہی کو رکنیت کی منظوری دیے جانے پر فن لینڈ نیٹو کا باقاعدہ رکن بن چکا ہے جبکہ سویڈن ، امریکہ اور یورپی ممالک کے شدید دباو کے باوجود ترکیہ کے سویڈن کے خلاف ویٹو ا ستعمال کیے جانے کی وجہ سے اب تک سویڈن نیٹو کی رکنیت حاصل کرنے سے قاصر ہے ۔ امریکی صدر بائیڈن نے اس سلسلے میں صدر ایردوان سے کئی بار ٹیلی فون پر رابطہ بھی قائم کیا ہے لیکن تا دم تحریر اس مسئلے کو حل نہیں کیا جاسکا ہے ۔ ترکیہ نے سویڈن کی جانب سے ترکیہ کی تمام شرائط پر بلا حیل و حجت عمل درآمد کرنے پر ہی نیٹو کی رکنیت کی منظوری دینے سے آگاہ کیا ہے۔ اسی دوران ترکیہ اور سویڈن کے اعلیٰ حکام کے درمیان ان مسائل کو حل کرنے کے بارے میں مذاکرات کا سلسلہ جاری تھا کہ عید کے موقع پر سویڈن میں قرآن کریم کو نذر آتش کرنے کے واقعے نے ترکیہ میں پائے جانے والے سخت غم و غصے کی وجہ سے ترکیہ کو ایک بار پھر سویڈن کی رکنیت پر نظر ثانی کرنے پر مجبور کردیا ہے۔
سویڈن میں پولیس کی نگرانی میں قرآن کریم کو نذر آتش کرنا
صدر ایردوان نے قرآن کریم کو نذر آتش کرنے کے اس افسوسناک واقعے پرجسٹس اینڈ ڈولپمینٹ پارٹی کے ارکان کے ساتھ عیدملن کے موقع پر خطاب کرتے اپنے شدید ردِ عمل کا اظہار کرتے ہوئے کہا کہ مسلمانوں کے مقدسات کی تحقیر کسی بھی صورت آزادی رائے کےزمرے میں نہیں آتی ہے۔ انہوں نے کہا کہ اپنے آپ کو مہذب دنیا کے چمپئین کہلوانے والے ان مغربی گھمنڈوں کو ہم کس طرح مقدسات کا احترام کیا جاتا ہے کو سکھا کر ہی دم لیں گے۔ انہوں نے کہا کہ قرآن کریم کو نذر آتش کرنا اور مقدسات کی توہین کرناہماری ریڈ لائین ہے اور ہم کسی بھی صورت آزادی رائے کے نام اس قسم کی اشتعال انگیزی اور دھمکیوں کی سیاست کی اجازت نہیں دیں گے ۔انہوں نے کہا کہ جو لوگ آزادی فکر کی آڑ میں اس جرم کی اجازت دیتے ہیں اور بے ہودہ اور لغو سوچ کی بنیادرکھتے ہیں وہ کبھی بھی اپنے مقاصد میں کامیاب نہیں ہوسکیں گے۔
اگرچہ عید سے قبل ترکیہ اور سویڈن کے درمیان جاری مذاکرات میں نیٹو کی رکنیت کے بارے میں مثبت پیش رفت دیکھی جا رہی تھی لیکن سویڈن میں قرآنِ کریم کو نذرآتش کرنے کے واقعے نے جلتی پر تیل کا کام کیا ہے۔
نیٹو کی رکنیت کے بارے میں 11 تا 12 جولائی لیتھوانیا کے دارالحکومت ولنیئس میں سربراہی اجلاس منعقد ہو رہا ہے اور خیال یہی ظاہر کیا جا رہا تھا کہ اس سربراہی اجلاس کے موقع پر سویڈن کو نیٹو کی رکنیت کی منظوری حاصل کرلی جائے گی لیکن سویڈن میں قرآنِ کریم کو نذرِ آتش کرنے کے واقعے اور ترکیہ اور صدر ایردوان کے موقف نے سویڈن کی امیدوں پر پانی پھیر دیا ہے اور اس اشتعال انگیزی نے ایک بار پھر تناؤ بڑھا دیا اور سکینڈے نیویا کےاس ملک کے فوجی اتحاد میں جلد شمولیت کے امکانات پر بادل چھائےہوئے دکھائی دیتے ہیں۔ اس لیے امریکی صدر جو بائیڈن نے اس مسئلے کو حل کرنے کے لیے 4 جولائی کو سویڈن کے وزیر اعظم الف کرسٹرسن کو وائٹ ہاوس مدعوکیا ہے تاکہ نیٹو کی رکنیت کے بارے میں بات چیت کی جاسکے۔ اس کے اگلے ہی روز 6 جولائی کو برسلز میں نیٹو ہیڈ کوارٹر میں ترکیہ، سویڈن اور فن لینڈ کے وزرائے خارجہ اور انٹیلی جنس سربراہان کا اجلاس بھی منعقد ہو رہا ہے۔ تاہم ذرائع کے مطابق اس وقت صدر ایردوان کے ہاتھ بہت مضبوط ہیں ایک تو وہ دوبارہ صدر منتخب ہو کر نیا مینڈٹ حاصل کرچکے ہیں اور امریکہ کے ساتھ ایف سولہ خریدنے سے متعلق اور ایف-35 طیاروں کی مشترکہ تیاری کے بارے میں جو رکاوٹیں موجود ہیں صدر ایردوان اس موقع پر غنیمت سمجھتے ہوئے سویڈن کی رکنیت کی منظوری سے قبل اس سلسلے میں کوئی حتمی فیصلہ کروانے میں کامیاب رہیں گے علاوہ ازیں عالمِ اسلام کے معتبر ر ہنما ہونے کی حیثیت سے وہ اس بار مسلمانوں کے مقدسات کی بے حرمتی کو رکوانے کے بارے میں یورپی رہنماوں سے اس سلسلے میں مذاکرات کرنے کے بعد ماہ ستمبر میں اقوام متحدہ کی جنرل اسمبلی کے اجلاس میں قراردداد پیش کرتے ہوئے اس مسئلے کو بھی حل کروانے کا ارادہ رکھتے ہیں ۔اس سلسلے میں اسلامی تعاون تنظیم کے اجلاس ہی کے فیصلے اور قرارداد کو اقوام متحدہ میں پیش کیے جانے کا خیال ظاہر کیا جا رہا ہے۔
وزیر خارجہ حقان فیدان کا بیان
ترکیہ کے نئے وزیر خارجہ حقان فیدان نےایک بیان دیتے ہوئے کہا ہے کہ سویڈن کا سیکورٹی نظام، اشتعال انگیزی کو روکنے کے قابل نہ ہونے کی وجہ سےاس کی اسٹریٹیجی اور سیکورٹی پر شک و شبہ ہےجس نے ہمیں سوچنے پر مجبور کردیا ہے۔ سویڈن کی نیٹو کی رکنیت نیٹو کے لیے بوجھ ہے یا مفید ؟ اس پر اب ہمیں کھلے عام بحث و مباحثہ کرنے کی ضرورت ہے۔
صدر ایردوان کے اتحادی دولت باہچےلی کا سخت بیان
پروگرام کے آخر میں صدر ایردوان کے جمہور اتحاد میں شامل نیشنسلٹ موومنٹ پارٹی کے چئیرمین دولت باہچے لی نےقرآن کریم جلانے کے واقعے کے بارے میں کہا ہے کہ قراِ کریم جلانے والے نامراد شخص نے قرآنِ کریم نہیں جلایا بلکہ اُس نے اپنے آپ کا جلا لیا ہے۔