انقرہ، کیچی اورین میں کشمیریوں کی جدو جہد آزادی پر مبنی تصویری نمائش ،ترک بھائی کشمیری بھائیوں کے شانہ بشانہ ہیں

مسئلہ کشمیر پرترکیہ اور صدر ایردوان کی حمایت کے شکر گزار ہیں

انقرہ  کی ڈسٹرکٹ  کیچی اورین میں  کشمیری مزاحمت اور آزادی کی جدو جہد پر مبنی  تصویری نمائش کا آغاز

انقرہ  کی ڈسٹرکٹ  کیچی اورین میں   مقبوضہ جموں کشمیر بھارتی انسانی حقوق کی سنگین خلاف ورزیوں اور کشمیریوں کی آزادی کی جہدو جہد پر مبنی   دو روزہ تصویری نمائش شروع ہوگئی ہے۔

اس نمائش  کا افتتاح  انقرہ کی کیچی اورین ڈسٹرکٹ  کے مئیر   ترگت  آلتن اوک  اور پاکستان کے ناظم الامور عباس سرور قریشی نے مشترکہ طور پر کیا۔

یہ نمائش چوتھے ‘یوم استحقاق کشمیر’ یعنی ‘کشمیر کے استحصال کا دن’ کے حوالے سے منعقد کی جا رہی ہے۔ اس دن  بھارتی حکومت نے بین الاقوامی قوانین بالخصوص اقوام متحدہ کی سلامتی کونسل کی قراردادوں کی خلاف ورزی کرتے ہوئے مزید غیر قانونی اور یکطرفہ اقدام  کرتے ہوئے  مقبوضہ جموں کشمیر  IIOJK کی خصوصی حیثیت کو منسوخ کر دیا، تاکہ خطے پر اس کے قبضے کو برقرار رکھا جا سکے۔

اس موقع پر خطاب کرتے ہوئےکیچی اورین بلدیہ کے مئیر آلتن اوک  نے کشمیر کاز کے لیے ترکیہ کی حمایت کا اعادہ کیا اور کہا کہ جبر اور محکومیت ، آزادی کی جدوجہد سے  ہی اپنےاختتام کو پہنچتی ہے ۔ انہوں نے زور دے کر کہا کہ کشمیر  کے مقدر میں آزادی ہے اور ایک صبح اس آزادی  کو لازمی طور پر حاصل کرلیا جائے گا، انہوں نے کہا کہ آزادی کی  اس جدوجہد میں ترک بھائی ہمیشہ اپنے کشمیری بھائیوں اور بہنوں کے شانہ بشانہ کھڑے رہیں گے۔

اس موقع پر خطاب کرتے ہوئےسفارتخانہ پاکستان کے چارج ڈی افئیر  عباس سرور قریشی نے کہا کہ اس نمائش میں دل کو ہلادینے والی  اور فکر انگیز تصاویر کی نمائش کی جا رہی ہے۔ اس  تصویری نمائش میں  بہادر کشمیریوں کے روز مرہ کے حقیقی تجربات اور ان کی ناقابل تنسیخ حق خودارادیت کی جدوجہد کو دکھایا گیا ہے۔ انہوں نے مزید کہا کہ ہر تصویر بھارتی مظالم اور انسانی حقوق کی سنگین خلاف ورزیوں کے خلاف لڑنے والے کشمیریوں کے غیر متزلزل جذبے کی مضبوط گواہی دیتی ہوئی دکھائی دیتی ہے۔

انہوں نے حاضرین  کو مخاطب  کرتے ہوئے کہا کہ وہ  ان تصاویر میں نمایاں درد اور غم کو محسوس   کرتے ہوئے ہی  کشمیریوں پر ہونے والے ظلم و ستم کو سمجھ سکتے ہیں۔ انہوں نے کہا کہ یہ نمائش بنیادی انسانی حقوق کا حصول ایک مشترکہ ذمہ داری  ہونے  کی یاد دہانی کرواتی ہے تاکہ  دنیا  انسانی حقوق کی سنگین خلاف ورزیوں   کو روک سکے۔

چارج ڈی افئیر  قریشی نے  جموں و کشمیر پر ترکیہ کے اصولی موقف کو تسلیم  کرنے اور  بین الاقوامی فورمز پر کشمیر کاز کی مسلسل حمایت پر صدر رجب طیب ای ردوان کا شکریہ ادا کیا۔

تقریب میں سفارت کاروں، سول سوسائٹی، میڈیا اور عام لوگوں نے بڑی تعداد میں شرکت کی۔