زندہ قوموں کی شان یہ ہوتی ہے کہ وہ اپنے محسنوں کو ہمیشہ یاد رکھتی ہیں اور ان کو نئی نسل کےلئے رول ماڈل بنا کر پیش کرتی ہیں تا کہ قوم او ملک اس سے استفادہ حاصل کرسکیں۔
اس کی تازہ مثال تر کیہ کے صدر طیب ایردوان کی ہے ، جنہوں نے انقرہ میں جنگ اور جیو کے نمائندے ڈاکٹر فرقان حمید کو ان کی اعلی خدمات کے اعتراف میں ایک منفرد اعزاز سے نوازا ہے اور ان کے جنگ میں شائع ہونے والے کالموں میں سے بعض کو صدر طیب ایردوان کے بارے میں کتاب طیب ایردوان۔صدی کا لیڈر میں شامل کیا ہے۔
یہ کسی بھی پاکستانی کےلئے بہت بڑا اعزاز ہے۔ اگر ان کی ترکیہ میں 1988 سے اب تک 32سال کی انقرہ یونیورسٹی، ترکیہ کے سرکاری ٹیلی وژن ٹی آر ٹی،جنگ اور جیو کے ترکیہ میں نمائندہ اور خاص طور پر ترکیہ کے صدر اور وزیر اعظم اور پاکستان کے صدور اور وزرا ئے اعظم کے ترجمان کی حیثیت سے پاکستان اور ترکیہ کے درمیان تعلقات کو قریب لانے اور بہتر بنانے میں خدمات اور کارکردگی کا جائزہ لیا جائے تو بجا طور پر ان کو ترکیہ میں پاکستان کا مستقل اور حقیقی سفیر قرار دیا جا سکتا ہے۔جن کی خدمات پاکستان کے ترکیہ میں متعین سفیروں اور سفارتی عملے کی کوششوں سے کہیں زیادہ ہیں۔
ان کا ایک اور بڑا کارنامہ ترکی- اردو اور اردو –ترکی ڈکشنری کی تصنیف بھی ہے۔ اس سے پہلے ایسی کسی ڈکشنری کا وجود نہیں تھا۔ اس ڈکشنری کی تقریب رونمائی میں ترکیہ کےاس وقت کے صدر عبداللہ گل اور اس وقت پاکستان کے صدر آصف علی زرداری نے مہمانان خصوصی کی حیثیت سے شرکت کی تھی۔
ڈاکٹر فرقان حمید بڑے خلیق، ملنسار، ہنس مکھ اور بڑے مہمان نواز ہیں۔ پاکستان سے جو بھی صحافی یا کوئی اور اہم شخصیت انقرہ آتی ہے وہ اس کا خوش دلی سے ہمیشہ استقبال کرتے ہیں۔ وہ ہمارے بھی بڑے اچھے دوست ہیں۔ان سے فون پر مسلسل رابطہ رہتا ہے گزشتہ سال اکتوبر میں ہم نے ترکیہ کے دس شہروں کا دورہ کیا تو ان کے اصرار پر دو دن انقرہ بھی رکے تھے۔انہوں نے اپنے گھر پر ہمارے آرام کا بڑا خیال رکھا۔ ہمارے ساتھ ہمارے ترجمان نوجوان احمد جان جاوید بھی تھا۔ہمارے اعزاز میں ایک اچھے ریسٹوران میں شاندار ضیافت بھی دی جس میں مقبوضہ کشمیر کے مشہور صحافی اور قائد حریت کشمیر علی گیلانی مرزا کے داماد افتخار گیلانی اور شفیق احمد نے بھی شرکت کی۔فرقان حمید نے ہمیں انقرہ کے تاریخی مقامات اور قلعہ کی سیر بھی کرائی۔پورے دو دن ہمارے ساتھ ہی گزارے۔ ہمیں ٹی آر ٹی کے دفاتر اور اپنے دفتر کا دورہ بھی کرایا۔
ڈاکٹر فرقان حمید کا تعلق راولپنڈی سے ہے جہاں ان کا خاندان تقسیم ہند کے وقت مشرقی پنجاب سے ہجرت کے بعد آباد ہواتھا۔ انہوں نے 1986 میں اسلام آباد میں اپنی تعلیم مکمل کی۔انہیں شروع ہی سے ترکیہ اور اس کی زبان سے ایک تعلق خاطر پیدا ہوگیا تھا اور ترکی زبان سیکھ لی تھی۔
انہوں نے اسلام آباد کے جدید زبانوں کے نیشنل انسٹیٹیوٹ آف ماڈرن لینگوئج ( جو موجودہ دور میں نیشنل یونیورسٹی آف ماڈرن لینگوئج بن چکا ہے ) میں ترکی زبان کے ایک ماہر کی حیثیت سے پاکستان اور ترکیہ کے عوام کو ایک دوسرے کے قریب لانے کا کام شروع کیا۔وہ اپنی ان خدمات کی وجہ سے جلد ہی پاکستان میں پاک ترک دوستی کی ایسوسی ایشن کے سیکرٹری جنرل منتخب کر لئے گئے۔اس دوران وہ ترکیہ سے آنے والے حکومتی اور غیر سرکاری اہم شخصیات کے دوروں کے دوران مترجم کے فرائض بھی انجام دیتے رہے۔جس سے ان کی شہرت اور واقفیت دونوں ملکوں کے حکمرانوں تک بھی ہوگئی۔ ترکیہ کے اس وقت کے صدر کنعان ایورن نے ان کی دونوں ملکوں کو قریب لانے کی خدمات کے پیش نظر انہیں ترکی زبان میں ماسٹر اور پی ایچ ڈی کرنے کا اسکالرشپ پیش کیا اور 1988 میں وہ ترکی زبان میں ماسٹرز اور ڈاکٹریٹ کی تعلیم کے لئے ترکی آگئے وہ پہلے پاکستانی تھے جنہوں نے ترکی زبان میں ماسٹرز اور پی ایچ ڈی کیا اور سو فیصد مارکس حاصل کرتے ہوئے ایسا ریکارڈ قائم کیا ہے جو برابر تو ہوسکتا ہے ٹوٹ نہیں سکتا۔
انقرہ یونیورسٹی نے ان کی امتیازی تعلیمی لیاقت اور قابلیت کی بنا پر ملازمت کی پیشکش کی جوانہوں نے قبول کرلی اور ترک اور دوسرے ملکوں کے طلبہ کو اردو پڑھانے لگے۔
انہوں نے انقرہ یونیورسٹی میں بہار پاکستان کے نام سے ایک ڈرامہ لکھا جس میں ترک طلبہ نے حصہ لیا اور اسے ترکیہ کے سر کاری ٹی وی ٹی آرٹی نے ٹیلی کاسٹ کیاجو کسی بھی پاکستانی کی جانب سے TRT پر پیش کیا جانے والا ابھی تک پہلا اور واحد میوزیکل ڈرامہ ہے۔وہ پاکستان کے نامور کالم نگار عطا الحق قاسمی کی کلاسک کہانیوں کی کتاب کا ترکی زبان میں ترجمہ بھی کر چکے ہیں جس کا ترکی زبان میں نام Güler Mısın Ağlar Msın ہے۔
ڈاکٹر فرقان 25 برسوں سے جنگ میں یار من ترکی کے نام سے ترکی کے سیاسی حالات، معاشی اور سماجی مسائل کے بارے میں ایک مقبول کالم لکھ رہے ہیں۔ انہوں نے کشمیر اور پاکستان کے مسائل کو اجاگر کرنے میں بھی بڑا کردار ادا کیا۔بھارت نے 5 اگست 2019 کو مقبوضہ کشمیر کی متنازعہ حیثیت ختم کر نے کے بعد کشمیر یوں کے خلاف ظالمانہ اقدامات کئے تو ڈاکٹرفرقان حمید نے نومبر 2019 میں ترکی کے تھنک ٹینک انسٹیٹیوٹ آف اسٹریجک تھنکنگ اور پاکستان کے تھنک ٹینک لاہور سنٹر فار پیس ریسرچ کے اشتراک سے انقرہ ترکیہ میں تین روزہ بین الاقوامی سطح پر کشمیر کانفرنس منعقد کرائی جس میں اس وقت کے صدر آزاد جموں و کشمیر سردار مسعود خان، امریکہ،پاکستان ترکیہ، آذربائیجان، بوسنیا ہرزیگووینیا،انڈونیشیا،ایران ، ملائشیا، فرانس، نیدرلینڈ، رومینیا، ازبکستان،مصر، برطانیہ،روس، تونشیااور سری لنکا کے نمائندوں،ترکی کے وزیروں اور اسلامی اور غیر اسلامی ملکوں کے سفیروں اور سفارتی عملے نے شرکت کی۔
جب بھی پاکستان کے بارے میں کوئی ٹالک شو یا کوئی بڑی خبر آتی ہے تو ترکیہ کے ٹی وی چینل حقائق جاننے کےلئے ان کو ہی مدعو کرتے ہیں۔وہ دو عشروں سے زیادہ ترکیہ کے صدور اور وزرائے اعظم کے اردو اور پاکستان کے صدور اور وزرا ئے اعظم کے ترکی مترجم کی حیثیت سے خدمات انجام دے رہے ہیں۔
اس وقت وہ TR-URDUکے نام سے اپنا ایک مقبول یوٹیوب چینل اور ویب سائٹ چلارہے ہیں اور اس کے ساتھ ترکیہ کے سرکاری ٹی وی چینل ٹی آر ٹی میں اردو سیکشن کے سربراہ بھی ہیں۔
ان کو پاکستان کے متعدد صدور اور وزرائے اعظم اور مقبول ترک ڈرامہ سیریز ارطغرل غازی کا کردار ادا کرنے والے اداکار اینگن آلتان دوزیاتان کے انٹرویو کرنے کا بھی اعزاز حاصل ہے۔آج کل وہ انقرہ میں پاکستان- ترک کلچرل ایسوسی ایشن میں سیکریٹری جنرل کے طور پر خدمات انجام دے رہے ہیں ۔انہوں نے ترکی اور پاکستان کے تعلقات اور دونوں ملکوں کے عوام کو قریب تر لانے کےلئے ایک سو سے زیادہ آرٹیکل لکھے ہیں۔ان میں سے بعض آرٹیکل صدر طیب ایردوان پر شائع ہونے والی کتاب طیب ایردوان۔صدی کا لیڈر میں شامل کیے گئے ہیں۔ جو کسی بھی پاکستانی کےلئے ایک بہت بڑا اعزاز ہے۔