ترک صدر رجب طیب ایردوان چار سال کے طویل عرصے کے بعد وزیرِ اعظم پاکستان میاں محمد شہباز شریف کی دعوت پر آج دو روزہ اسلام آباد پہنچ رہے ہیں جہاں ان کے ہمراہ اعلیٰ سطح کا وفد بھی ہوگا۔
صدر رجب طیب ایردوان( پاکستانی میڈیا ، خاص طور پر الیکٹرونک میڈیا سے درخواست ہے ترک صدر کا نام درست تلفظ کیا جائے اُردوان کی بجائے اسے ایردوان ، اردوان Erduvanپڑھا جائے اور ترکی جس کا سرکاری نام اب ” ترکیہ ” ہو چکا ہے کو ترکی یا ترکیے لکھنے سے گریز کیا جائے ہاں البتہ آپ ترکیہ لکھتے وقت بریکٹ میں پڑھنے میں سہولت کی خاطر (ترکیے) لکھ سکتے ہیں لیکن اُردو زبان میں سرکاری طور پر ہمیشہ ترکیہ ہی لکھا جائے گا ) وہ پہلے ملائیشیا اور اس کے بعد انڈونیشیا کا دورہ مکمل کرنے کے بعد بارہ فروری کو رات گئے اسلام آباد پہنچیں گے اس لیے رات کو ان کی کوئی سرکاری مصروفیات کا کوئی شیڈول وضع نہیں کیا گیا ہے تاہم اگلا روز اُن کا اسلاام آباد میں بہت مصروف دن گزرے گا۔
صدر ایردوان اپنے اس دورے کے دوران وزیر اعظم شہباز شریف اور صدر آصف علی زرداری سے بھی دو طرفہ ملاقاتیں کریں گے۔ صدر ایردوان کی آرمی چیف جنرل عا صم منیر سمیت عسکری قیادت سے بھی ملاقات کی توقع کی جا رہی ہے۔ وہ میزبان ملک پاکستان کے کاروباری رہنماؤں سے بھی ملاقات کریں گے۔
صدر ایردوان اور وزیر اعظم شہباز شریف پاک ترک اعلیٰ سطح سٹریٹجک کوآپریشن کونسل (HLSCC) کے ساتویں اجلاس کی مشترکہ صدارت کریں گے۔ دوطرفہ تعلقات کے مختلف پہلوؤں پر بات چیت کریں گے اور مختلف شعبوں میں تعاون بڑھانے پر توجہ دی جائے گی۔
سیشن کے اختتام پر ایک مشترکہ اعلامیہ جاری کیا جائے گا، اور متعدد اہم معاہدوں/ایم او یوز پر دستخط متوقع ہیں۔
ہائی لیول اسٹریٹجک کوآپریشن کونسل (HLSCC) فیصلہ سازی کا اعلیٰ ترین فورم ہے، جو دونوں ممالک کے درمیان دوطرفہ تعلقات کو مزید مضبوط بنانے کے لیے اسٹریٹجک سمت فراہم کرتا ہے۔
اب تک ایچ ایل ایس سی سی کے چھ اجلاس منعقد ہو چکے ہیں، اور آخری اجلاس 13تا14 فروری 2020 کو اسلام آباد میں ہوا تھا۔
صدر ایردوان وزیر اعظم شہباز شریف کے ساتھ پاکستان ترکیہ بزنس اینڈ انویسٹمنٹ فورم سے بھی خطاب کریں گے، جس میں دونوں اطراف کے سرکردہ سرمایہ کاروں، کمپنیوں اور کاروباری افراد کو اکٹھا کیا جائے گا۔
دریں اثنا اس سے قبل صدر آصف علی زرداری نے استنبول ایئرپورٹ پر مختصر قیام کے دوران ترک ہم منصب سے ملاقات کی تھی۔
ملاقات کے دوران دونوں رہنماؤں نے دوطرفہ تعلقات و باہمی دلچسپی کے امور پر تبادلہ خیال کیا۔
صدر ایردوان کا یہ دورہ ایسے وقت میں ہو رہا ہے جب انقرہ اور اسلام آباد کے درمیان تعاون میں اضافہ دیکھا جا رہا ہے، خاص طور پر دفاعی شعبے میں، جہاں پاکستان نے اپنی بحریہ کے لیے ترکیہ کے بحری جہاز خریدنے کا معاہدہ کیا ہے۔
دونوں ممالک نے جنوری میں مشرقی بحیرہ روم میں دوطرفہ بحری مشقیں بھی کی تھیں۔
علاوزہ ازیں ستمبر 2024 میں وزیر اعظم شہباز شریف نے نیویارک میں اقوام متحدہ کی جنرل اسمبلی کے 79ویں اجلاس کے موقع پر صدر ایردوان سے ملاقات کی تھی، جس میں ترک صدر نے پاکستان کی معاشی بہتری کو سراہا اور وزیر اعظم شہباز شریف کی قیادت میں پاکستان کی مزید ترقی کے لیے امید کا اظہار کیا تھا۔
ترک صدر کا یہ دورہ سفارتی لحاظ سے بھی بڑی اہمیت کا حامل ہے کیونکہ حالیہ دنوں میں مختلف عالمی رہنما پاکستان کا دورہ کر چکے ہیں، جن میں نومبر 2024 میں بیلاروس کے صدر الیگزینڈر لوکاشینکو اسلام آباد کا دورہ کرنے والے آخری غیر ملکی رہنما تھے۔
پاکستان اور ترکیہ تاریخی برادرانہ رشتہ رکھتے ہیں اور ترکیہ کے صدر کا دورہ دونوں ممالک کے درمیان تعلقات کو مزید گہرا کرنے اور کثیر جہتی تعاون کو بڑھانے میں ممدو معاون ثابت ہوگا۔