استنبول کے ری پبلیکن پیپلز پارٹی CHP سے تعلق رکھنے والے اکرم امام اولو کو کل رات یونیورسٹی ڈپلومہ کے جعلسازی کے الزام میں لے لیا گیا ہے ۔ یہ سب کچھ ایسے وقت میں ہوا جب 23 مارچ بروز اتوار امام اولو کی جانب سے آئندہ صدارتی انتخابات میں ری پبلیکن پیپلز پارٹی کی جانب سے صدارتی امیدوار کے طور پر اپنا نام پیش کیے جانے کا اعلان ہونے والا تھا۔
اکرم امام اولو جن کا یونیورسٹی ڈپلومہ ، کل شام غیر مجاز بورڈ آف ڈائریکٹرز کا اجلاس طلب کرکے ڈپلومہ منسوخ کر دیا گیا جبکہ آج صبح سینکڑوں پولیس اہلکاروں ان کے گھر پر چھاپہ مار کر حراست میں لے لیا گیا اور ان کے پورے گھر کی تلاشی لی گئی اور صبح دس بجے انہیں قریب ترین وطن اسٹریٹ پولیس اسٹیشن لے جایا گیا۔
ترکیہ کے مختلف ہروں جن میں استنبول، ازمیر اور انقرہ بڑے بڑے شہر شامل ہیں میں امام اولو کے حق میں بڑے پیمانے پر مظاہرے کیے جا رہے ہیں ۔ ترکیہ میں طویل عرصے بعد اس قسم کے مظاہروں کو دیکھا جا رہا ہے ۔
استنبول کی گورنر شپ نے اعلان کیا کہ شہر بھر میں امن عامہ کو برقرار رکھنے اور کسی بھی اشتعال انگیز کارروائی کو روکنے کے لیے 19 سے 23 مارچ کے درمیان 4 دن کے لیے ہر قسم کے جلسوں، مظاہروں اور پریس ریلیز پر پابندی عائد کر دی گئی ہے لیکن اس کے باوجود پہلی بار طویل عرصے بعد لوگ سڑکوں پر نکل آئے ہیں اور شام کے وقت ان مظاہروں میں شرکت کرنے والے افراد کی تعداد میں مسلسل اضافہ ہوتا جا رہا ہے۔پولیس کی جانب سے کی جانے والی ناکہ بندیوں اور تمام رکاوٹوں کے باوجود، شہری اور آئی ایم ایم کے ملازمین محکمہ پولیس کے سامنے جمع ہونے کا سلسلہ جاری رکھے ہوئے ہیں ۔
استنبول کے مئیر اکرم امام اولو کے وکیل مہمت پہلوان نے امام اولو سے سے ملاقات کرنے کے بعد سوشل میڈیا اکاؤنٹ پر ایک پوسٹ شیئر کرتے ہوئے لکھا ہے کہ اس قسم کے ہتھ کھنڈوں سے ری پبلیکن پیپلز پارٹی مزید مضبوط ہو کر نکلے گی۔ امام اولو کے حوصلے بہت بلند ہیں ۔ قوم کی قوت ارادی اور تدبر سے بڑھ کر کچھ نہیں ، قوم کا عزم سب سے بڑھ کر ہے۔