ترکیہ بھر میں آج تیسرے روز بھی مئیر استنبول امام اولو کے حق میں مظاہروں کا سلسلہ جاری ہے۔ مظاہروں اوریلی میں ہزاروں کی تعداد میں افراد کی شرکت۔
استنبول کے مئیر اکرم امام اولو کو 19 مارچ کی صبح سویرے ان کے گھر پر چھاپے کے دوران دہشت گردوں کا ساتھ دینے اور بد عنوانیوں میں ملوث ہونے کے الزام میں حراست میں لیتے ہوئے چار روزہ ریمانڈ پر بھیج دیا گیا ہے، انہیں کل عدلیہ کے رو برو پیش ہونے کی توقع کی جا رہی ہے۔
استنبول کے مئیر اکرم امام اولو جو ری پبلیکن پیپلز پارٹی CHP کے متوقع صدارتی امیدوار ہیں حراست کے تیسرے دن بھی بڑی تعداد میں ہزاروں شہریوں نے ترکیہ کے مختلف شہروں میں مظاہروں میں حصہ لیا ہے جبکہ استنبول سراچ حانے میں ہونے ولی ریلی میں چئیر،ین ری پبلیکن پیپلز پارٹی CHP اوزگور اوزیل کے مطابق اس وقت تین لاکھ افراد نے اس ریلی میں شرکت کی ہے۔
ری پبلیکن پیپلز پارٹی CHP کے چئیرمیں اوزیل نے ترکیہ کے 81 صوبوں میں مظاہرے کرنے کے لیے عوام سے اپیل کی ہے۔
حکومت ترکیہ کی جانب سے ترکیہ کے تین بڑے شہروں استنبول، انقرہ اور ازمیر میں ہر قسم کے جلسوں اور جلوسوں پر پابندی عائد کرنے کا اعلان کیا ہے لیکن اس کے باوجود ترکیہ بھر کے مختلف شہروں میں ایک ساتھ بڑی تعداد میں مظاہروں کا سلسلہ جاری ہے جبکہ 23 مارچ بروز اتوار ترکیہ بھر میں بہت بڑے پیمانے پر ریلی نکالنے کا بھی اعلان کیا گیا ہے۔
استنبول کے مئیر اکرم امام اولو کی نظر بندی کے دن سے، پابندی کے باوجود ترکیہ کے مختلف شہروں میں مسلسل تیرسے روز بھی ریلیاں نکالی گئی ہیں جن میں ہزاروں کی تعداد میں لوگوں نے شرکت کی ہے۔
استنبول سراچ حانے میں منعقد ہونے والی ریلی میں ری پبلیکن پیپلز پارٹی CHP کے علاوہ حزب اختلاف کی جماعتیں اور یونینیں بشمول پیپلز ایکویلیٹی اینڈ ڈیموکریسی پارٹی (DEM) اور ترک ورکرز پارٹی (TİP) بھی سراچ حانے میں ہونے والی ریلی میں شرکت کر رہی ہیں۔
اس موقع پر ری پبلیکن پیپلز پارٹی CHP کے چئیرمیں اوزگور اوزیل نے خطاب کرتے ہوئے کہا کہ ہم اس ریلی میں ے نتائج حاصل کرنے کے لیے موجود ہیں۔ انہوں نے کہا کہ یہ صرفCHP کی ریلی نہیں ہے بلکہ اس ریلی میں شریک ان تمام سیاسی جماعتوں اور تنظیموں کو تہہ دل سے سلام کرتا ہوں جو اکرم امام اولو کے ساتھ یک جہتی کے لیے یہاں جمع ہوئے ہیں۔
استنبول کے میئر کو حراست میں لیے جانے کے بعد ترکیہ میں ایک دہائی سے زائد عرصے بعد سول نافرمانی کے بڑے مظاہرے دیکھنے میں آئے ہیں ، جس کے بعد حکومت نے حزب اختلاف کی جانب سے سڑکوں پر احتجاج کی ’ غیرقانونی ’ کال دینے پر متنبہ کیا ہر اور سخت اقدامات کرنے کی وارننگ بھی دی ہے۔
ترکیہ کے وزیر داخلہ علی یرلی قایا نے کہا ہے کہ امام اولو کو حراست میں لیے جانے کے بعد عوامی اجتماعات پر چار روزہ پابندی عائد کی گئی تھی، اس کے باوجود جمعرات کو استنبول میونسپل ہیڈکوارٹر ، یونیورسٹی کیمپس اور دیگر جگہوں پر ہونے والے احتجاج پر 93 افراد کو حراست میں لیا گیا جبکہ اس دوران 16 پولیس افسران بھی زخمی ہوئے۔
صدر ایردوان کے سب سے بڑے سیاسی حریف امام اولو، جو مقامی حکومتوں کے انتخابات میں ایردوان کی جماعت کو شکست بھی دے چکے ہیں، کو19 مارچ صبح سویرے حراست میں لیا گیا تھا اور انہیں مالی مفادات اور دہشت گرد گروپ کی امداد جیسے الزامات کا سامنا ہے، انہیں اتوار تک حراست میں رکھا جاسکتا ہے اور اس مدت میں عدالت کو ان کی گرفتاری کے بارے میں فیصلہ کرنا ہوگا۔
ترکیہ بھر میں مظاہرے
ترکیہ کے دارالحکومت انقرہ، ازمیر اور استنبول اور دیگر صوبوں میں جمعے کے روز بھی احتجاجی مظاہرے ہوئے جن سے نمٹنے کے لیے پولیس نے رکاوٹیں کھڑی اور سڑکیں بند کردیں، اور احتجاجی مظاہرین بالخصوص طالب علموں کو منتشر کرنے کے لیے واٹر کینن کا استعمال کیا۔
جمعہ کی شام کو استنبول میں مرکزی ریلی سے خطاب کرتے ہوئے سی ایچ پی کے رہنما اوزیل نے ردعمل ظاہر کرتے ہوئے کہا ،
ایردوان، تم لوگوں کے سڑکوں پر آنے سے خوف زدہ ہو، اور اب ہم سڑکوں پر ہیں، اور تمھیں خوف زدہ کرتے رہیں گے۔
دوسری بار استنبول کے میئر منتخب ہونے والے 54سالہ امام اولو کو ایک ایسے وقت میں حراست میں لیا گیا جب سی ایچ پی اتوار کے روز صدارتی انتخاب کے لیے اپنے امیدوار کے طور پر ان ( امام اولو ) کے نام کا اعلان کرنے والی تھی۔ سی ایچ پی نے عام لوگوں سے کہا کہ وہ عوامی مزاحمت کی علامت کے طور پر ملک بھر میں رکھے گئے بیلٹ باکسز میں اولو کے لیے ووٹ ڈالیں۔
ترک کرنسی کو شدید دہچکہ
ترکیہ کی کرنسی لیرا اور بونڈز کی قدر بھی امام اولو کی حراست کے بعد سے زوال کا شکار ہے، جبکہ جمعے کو استنبول کے حصص 7 فیصد گرگئے۔مرکزی بینک نے بدھ کے روز ایک غیر طے شدہ اجلاس میں راتوں رات اپنی شرح میں اضافہ کردیا اور کرنسی کو مستحکم کرنے کے لیے غیرملکی زرمبادلہ کے ذخائئر میں 10 ارب ڈالر صرف کرڈالے۔
ترکیہ کی کرنسی کی قدر میں 12 فیصد کی تاریخی گراوٹ کے بعد ایک ڈالر کے مقابلے میں 38 لیرا تک پہنچ گئی ہے۔
بڑھتی ہوئی قیمتوں اور کرنسی کی قدر میں مسلسل کمی کا تدارک کرنے کی دو سالہ کوششوں کے باوجود معیشت کمزور ہے اور افراط زر 39 فیصد تک پہنچ گیا ہے، یہ طیب ایردوان کی غیرروایتی مالیاتی محرکات کی حمایت کا نتیجہ ہے۔
امام اولو کی ایردوان کے خلاف تیری ہیٹرک فتح
ری پبلیکن پیپلز پارٹی CHP کے چئیر مین اوزیل نے کہا کہ اپنے آپ کو فٹ بالکا کھلاڑی کہلوانے والے رجب طیب ایردوان استنبول کے مئیر امام اولو سے ہونے والے تینوں میچوں میں شکست سے دوچار ہوئے ہیں اور اس طرح امام اولو نے ایردوان کے خلاف فتح کی ہیٹرک قائم کی ہے۔
انہوں نے کہا کہ گزشتہ انتخابات کو ایک سال کا عرصہ بیت چکا ہے لیکن ان کو اپنی شکست ابھی تک ہضم نہیں ہوئی ہے اور وہ مردانہ وار مقابلہ کرنے کی بجائے دھوکہ دہی سے فتح حاصل کرنا چاہتے ہیں۔ اور اس مقصد کو حاصل کرنے کے لیے استنبول بلدیہ میں اپنے قریبی ٹرسٹی کا تقرر کرنا چا ہتے ہیں ۔ اسی لیے ہم استنبول بلدیہ کے سامنے اپنا پہرہ جاری رکھے ہوئے ہیں۔
انہوں نے کہا کہ امام اولو کو کل عدلیہ کے رو برو پیش کیا جائے گا اور ہم دیکھیں گے عدلیہ کس طریقے سے انصاف سے کام لیتی ہے یا پھر ایک بار پھر ایردوان کے دباو میں آ جاتی ہے۔