تحریر: ڈاکٹر فرقان حمید
استنبول کے میئر اکرم امام اولو کی گرفتاری کے بعد مال تپے میں ہونے والی تاریخی ریلی نے ترکیہ کی سیاست میں ایک نیا باب رقم کر دیا۔ اس عظیم الشان اجتماع میں تقریباً بائیس لاکھ افراد نے شرکت کر کے ری پبلیکن پیپلز پارٹی (CHP) کی تاریخ میں ایک نیا ریکارڈ قائم کیا۔ ریلی میں شریک عوام کے جوش و جذبے نے حکومت کے خلاف شدید احتجاج اور قبل از وقت انتخابات کے مطالبے کو مزید تقویت دی۔
جمہوری تحریک کی نئی لہر
ری پبلیکن پیپلز پارٹی (CHP) کے چیئرمین اوزگور اوزیل نے اس عظیم اجتماع میں شرکت کرنے والے تمام شہریوں کا شکریہ ادا کرتے ہوئے اسے جمہوری قوتوں کی فتح قرار دیا۔ انہوں نے کہا کہ یہ تحریک ابھی اپنے ابتدائی مراحل میں ہے اور اب ہر ہفتے کے آخر میں ترکیہ کے مختلف شہروں میں احتجاجی مظاہرے منعقد کیے جائیں گے، جبکہ ہر بدھ کو استنبول کے مختلف اضلاع میں عوامی اجتماعات کا انعقاد کیا جائے گا۔ انہوں نے اعلان کیا کہ ترکیہ کی عوام اب خاموش نہیں رہے گی بلکہ وہ جلد از جلد بیلٹ باکس کے ذریعے اپنی رائے کا اظہار کرے گی۔
عوامی جوش و جذبہ اور تاریخی اجتماع
ریلی کے لیے عوام نے صبح سویرے ہی مال تپے کا رخ کرنا شروع کر دیا تھا۔ اجتماع کے دوران خطاب کرتے ہوئے اوزگور اوزیل نے کہا کہ "19 مارچ کو اکرم امام اولو کے میئر شپ کو ختم کرنے کا منصوبہ کچھ بیرونی قوتوں کی منظوری سے نافذ کیا گیا ہے۔” انہوں نے مزید کہا کہ استنبول بلدیہ کے ہیڈکوارٹر سراچ حانے سے شروع ہونے والے احتجاجی مظاہروں نے آج مال تپے میں ایک تاریخی عوامی اجتماع میں تبدیل ہو کر صدر ایردوان کی حکومت کے لیے شدید مشکلات پیدا کر دی ہیں۔
اکرم امام اولو کا ورچوئل خطاب
اس ریلی کی خاص بات یہ تھی کہ استنبول کے میئر اور صدارتی امیدوار اکرم امام اولو کا خطاب مصنوعی ذہانت (Artificial Intelligence) کی مدد سے حاضرین کے روبرو پیش کیا گیا۔ اپنے ورچوئل خطاب میں امام اولو نے کہا: "اگر میری راہ میں رکاوٹیں کھڑی کی گئیں تو مجھے اپنے عوام پر مکمل بھروسہ ہے۔ آپ میرا بھرپور ساتھ دیں گے۔ ہمارے قومی ترانے کی ابتدائی سطر ہی ہمیں یہ سبق دیتی ہے کہ ’خوف محسوس نہ کرو‘ – اور ہم، اس قوم کے افراد، کبھی خوفزدہ نہیں ہوں گے۔ ہمیں کسی بلیک میلنگ سے ڈر نہیں لگتا۔”
امام اولو نے 19 مارچ کی بغاوت کی کوشش کے خلاف عوام کی ثابت قدمی کو سلام پیش کرتے ہوئے کہا: "میں ان تمام لوگوں کو خراج تحسین پیش کرتا ہوں جو اپنے ملک، اپنی قوم اور اپنے مستقبل کے تحفظ کے لیے کھڑے رہے اور ذرہ بھر بھی خوفزدہ نہیں ہوئے۔” انہوں نے صدر ایردوان کو کھلا چیلنج دیتے ہوئے مطالبہ کیا کہ ان کا ٹرائل ترکیہ کے قومی نشریاتی ادارے ٹی آر ٹی پر براہ راست نشر کیا جائے تاکہ عوام حقیقت جان سکے۔
حکومت کے خلاف بڑھتا دباؤ
اوزگور اوزیل نے اجتماع میں مزید کہا: "آج یہاں صرف ایک عام ریلی نہیں، بلکہ تاریخ رقم کی جا رہی ہے۔ آج ملک کے تمام میٹرو اور مارمرائے اسٹیشنوں پر احتجاجی مظاہرے ہو رہے ہیں۔ ہم ان لوگوں کو شکست دیں گے جو جمہوریت کو محض اقتدار حاصل کرنے کے لیے ایک ہتھیار کے طور پر استعمال کرتے ہیں، مگر جب عوام کے فیصلے کا وقت آتا ہے تو بیلٹ باکس سے فرار اختیار کرتے ہیں۔ ہم اس خوبصورت ملک کو کبھی بھی آمریت کے حوالے نہیں کریں گے۔ قوم نے 31 مارچ کو اقتدار کی تبدیلی کے عمل کا آغاز کر دیا ہے۔ اکرم امام اولو نے نہ صرف ایردوان بلکہ ان کے نامزد امیدواروں، پارلیمنٹ کے اسپیکرز، وزرائے اعظم اور وزراء کو تین مرتبہ شکست سے دوچار کیا ہے۔”
اپوزیشن جماعتوں کی یکجہتی
اس تاریخی ریلی میں ری پبلیکن پیپلز پارٹی (CHP) کے علاوہ کئی دیگر اپوزیشن جماعتوں نے بھی شرکت کی، جن میں ای ایم ای پی، ڈی ای ایم پارٹی، لیفٹ پارٹی، ٹی آئی پی، بی ٹی پی، ظفر پارٹی اور ہوم لینڈ پارٹی شامل تھیں۔ ہوم لینڈ پارٹی کے چیئرمین محرم انجے نے بھی اجتماع میں شریک ہو کر اپنی حمایت کا اظہار کیا۔
ملک گیر احتجاجی لہر
اکرم امام اولو کو اتوار 23 مارچ کو گرفتار کیا گیا تھا، جس کے بعد ملک بھر میں احتجاجی مظاہروں کا سلسلہ شروع ہو گیا، جو آج بھی پورے جوش و خروش سے جاری ہے۔ یہ مظاہرے ترکیہ میں جمہوریت کی بحالی اور عوامی حقوق کے تحفظ کے لیے ایک بڑی تحریک کی شکل اختیار کر چکے ہیں۔ مظاہرین نے استنبول، انقرہ، ازمیر، برصا اور دیگر بڑے شہروں میں احتجاجی ریلیاں نکالیں۔ کئی شہروں میں عوام نے جمہوری حقوق کے دفاع میں سڑکوں پر نکل کر حکومت کے خلاف نعرے لگائے اور انتخابات کے انعقاد کا مطالبہ کیا۔
بین الاقوامی ردعمل
اکرم امام اولو کی گرفتاری پر بین الاقوامی سطح پر بھی شدید ردعمل دیکھنے میں آیا۔ یورپی یونین اور امریکہ نے ترکیہ کی حکومت سے مطالبہ کیا کہ وہ جمہوری اصولوں کا احترام کرے اور شفاف عدالتی کارروائی کو یقینی بنائے۔ انسانی حقوق کی تنظیموں نے بھی اس معاملے پر تشویش کا اظہار کرتے ہوئے کہا کہ ترکیہ میں سیاسی آزادیوں کو دبانے کی کوششیں جمہوریت کے مستقبل کے لیے خطرناک ثابت ہو سکتی ہیں۔
ترکیہ کا مستقبل؟
مبصرین کا کہنا ہے کہ اکرم امام اولو کی گرفتاری اور اس کے خلاف ہونے والے مظاہرے ترکیہ میں سیاسی منظرنامے کو یکسر تبدیل کر سکتے ہیں۔ عوامی حمایت کی یہ لہر اگر برقرار رہی تو حکومت کے لیے مشکلات میں اضافہ ہو سکتا ہے اور ممکنہ طور پر قبل از وقت انتخابات کے انعقاد کی راہ ہموار ہو سکتی ہے۔ اپوزیشن کی بڑھتی ہوئی طاقت اور عوامی تحریک حکومت کے لیے ایک بڑا چیلنج بن چکی ہے۔
یہ تحریک ترکیہ میں جمہوریت کے لیے ایک نیا موڑ ثابت ہو سکتی ہے اور آنے والے دنوں میں مزید اہم پیش رفت سامنے آ سکتی ہیں۔