پاکستان اور ترکیہ کے مابین مثالی برادرانہ تعلقات ایک بار پھر اس وقت جگمگا اٹھے جب ترکیہ کے دارالحکومت انقرہ میں یومِ پاکستان کی شاندار اور تاریخی تقریب کا انعقاد ہوا۔
ترکیہ کے دارالحکومت انقرہ میں سفارتخانہ پاکستان کے زیر اہتمام یومِ پاکستان کی مناسبت سے شاندار اور تاریخی تقریب کا اہتمام کیا گیا۔
اس عظیم الشان، تاریخی اور پُر وقار تقریب میں ترکیہ کے گرینڈ نیشنل اسمبلی کے اسپیکر نعمان قرتلموش نے مہمان خاصوصی کی حیثیت سے شرکت کی ۔ ان کے علاوہ اس تقریب میں ترکیہ کے وزیر قومی دفاع یشار گیولر، وزیر تجارت عمر بولات ،سابق وزیراعظم بن علی یلدرم، سابق نائب وزیراعظم بلنت آرنیچ، ترک چیف آف جنرل اسٹاف جنرل متین گیوراک، ترک لینڈ فورسز کے کمانڈر جنرل، سیلچوق بائراکتار اولو، کمانڈر ترک فضائیہ جنرل ضیاء قادی اولو، کمانڈر ترک بحریہ ایڈمرل ارجمند تاطلی اولو ، سابق وزیر زراعت مہدی ایکر، نائب وزیر خارجہ عائشہ بریس ایکنجی، چئیرمین پاکستان ٹڑکش پارلیمانی فرینڈشپ گروپ علی شاہین، ارکانِ پارلیمنٹ برہان قایا ترک، دریا یانیک، چئیرمین سعادت پارٹی محمود آریکان، پریذیڈنٹ سیکرٹریٹ آف ڈیفینس انڈسٹریز پروفیسر ڈاکٹر حالوق گورگن، سابق پریذیڈنٹ سیکرٹریٹ آف ڈیفینس انڈسٹریز اسماعیل دیمیر، متعدد نائب وزراء، ارکانِ پارلیمنٹ کے علاوہ اعلیٰ عسکری اور سول حکام، غیر ملکی سفیروں ، میڈیا نمائندگان اور پاکستان کمیونٹی نے شرکت کی۔
ترکیہ کی سفارتی تاریخ میں یہ سفارتخانہ پاکستان ہی کومنفرد اعزاز حاصل ہے کہ اتنی بڑی تعداد میں اعلیٰ سول اور فوجی قیادت نے یومِ پاکستان کی تقریب میں شرکت کرتے ہوئے نہ صرف پاکستان کے دل جیت لیے ہیں بلکہ دونوں ممالک کے مابین گہرے دوستانہ تعلقات کو ایک نئی جہت بھی دی ہے۔
پاکستان، ترک دلوں کی دھڑکن ہے: سپیکر نعمان قرتلموش
اس موقع پر مہمانِ خصوصی کی حیثیت سے خطاب کرتے ہوئے ترکیہ گرینڈ نیشنل اسمبلی کے سپیکر نعمان قرتلموش نے اس پُرمسرت موقع پر پاکستان کے عوام اور حکومت کو پرتپاک مبارکباد پیش کی۔ انہوں نے خاص طور پر ترکیہ میں پاکستان کے سفیر ڈاکٹر یوسف جنید کے رول جو اس سے قبل استنبول میں قونصلر جنرل کی حیثیت سے بھی فرائض ادا کرچکے ہیں کے ترکیہ اور پاکستان کو ایک دوسرے کے قریب لانے اور دونوں ممالک کے درمیان تمام ہی شعبوں میں تعاون کو فروغ دینے کے لیے کی جانے والی خدمات کوسراہتے ہوئے پاکستان اور ترکیہ کے درمیان گہرے اور دیرنہ تعلقات کو اللہ تعالی کی طرف سے ایک نعمت قرار دیا۔ انہوں نے اس بات پر زور دیا کہ مشترکہ تاریخ، اقدار اور باہمی احترام سے تشکیل پانے والے اس پائیدار بھائی چارے کو محفوظ رکھا جانا چاہیے اور ایک مقدس امانت کے طور پر آنے والی نسلوں تک پہنچایا جانا چاہیے۔ جناب قرتلموش نے کئی دہائیوں سے ترک اور پاکستان کے عوام کے درمیان مضبوط روابط اور تاریخی یکجہتی پر روشنی ڈالتے ہوئے ان تعلقات کو بے مثال قرار دیا ۔ انہوں نے کہا کہ ترکیہ کی جنگِ آزادی کے دوران پاکستانی عوام نے جس بے لوث جذبے سے ترک قوم کی مدد کی، اسے ترک عوام آج بھی محبت سے یاد کرتے ہیں۔ علامہ اقبال کی ترکوں سے محبت اور ان کے درد میں شریک ہونا ہماری تاریخ کا روشن باب ہے۔
انہوں نے مشکلات اور بحران کے کے وقت دونوں ممالک کی طرف سے دکھائے گئے باہمی تعاون کے جذبے کو سراہتے ہوئے سیاسی ، اقتصادی اور دفاعی تعاون کو فروغ دینے اور ایک دوسرے ملک کے درمیان ثقافتی تبادلے سمیت تمام شعبوں میں اس بندھن کو مزید مضبوط بنانے کے لیے ترکیہ کے مسلسل عزم کا اعادہ کیا۔ انہوں نے تا قیامت تک دونوں ممالک کی اس دوستی کو جاری رکھنے کی بھی نیک تمنا کی۔
پاک-ترک تعلقات محض سفارتی نوعیت کے نہیں بلکہ دلوں کے بندھن سے جُڑے ہیں: سفیر پاکستان
ااس سے قبل ترکیہ میں پاکستان کے سفیر ڈاکٹر یوسف جنید نے معززین اور مہمانوں کا نہایت گرمجوشی سےخیرمقدم کیا جس نے پاکستانی روایات کی جھلک کو مزید نمایاں کر دیا۔
اس موقع پر سفیرِ پاکستان نے یوم پاکستان کی تاریخی اہمیت پر روشنی ڈالتے ہوئے کہا کہ 23 مارچ 1940 کو منظور کی گئی قراردادِ لاہور برصغیر کے مسلمانوں کے لیے ایک علیحدہ ریاست کے قیام کی بنیاد بنی۔ انہوں نے قائداعظم محمد علی جناح کی دور اندیش قیادت اور سرسید احمد خان اور علامہ اقبال کی فکری خدمات کو خراج تحسین پیش کیا۔
سفیر ِ پاکستان نے بہتر شرح نمو، مہنگائی میں کمی، بڑھتی ہوئی برآمدات اور ترسیلات زر میں اضافہ کا حوالہ دیتے ہوئے پاکستان کی لچک اور معاشی پیش رفت سے بھی آگاہی فراہم کی۔
سفیر ِ پاکستان ڈاکٹر یوسف جنید نے پاکستان اور ترکیہ کے درمیان تاریخی اور بڑھتے ہوئے تعلقات پر بھی زور دیا جو مشترکہ عقیدے، تاریخ اور باہمی تعاون پر قائم ہیں۔ انہوں نے کہا کہ پاکستان اور ترکیہ کے تعلقات محض سفارتی نوعیت کے نہیں بلکہ دلوں کے بندھن سے جُڑے ہیں۔ ان تعلقات کی بنیاد دونوں اقوام کے مشترکہ جذبات، روایات اور تہذیبی ورثے پر ہے۔انہوں نے کہا کہ ماضی سے جاری ان قریبی تعلقات کی جھلک آپ کو اس وت زیادہ بہتر طریقے سے نظر آتی ہے جب دونوں ممالک کسی مشکلات میں یا قدرتی آفات میں گھرے ہوئے ہوں۔ اس کی مثال پاکستان میں آئے ہوئے زلزلے اور سیلاب کی تباہ کاریوں کے فورا بعد وزیراعظم کی حیثیت سے ایردوان کا دورہ پاکستان تھا بالکل اسی طرح پاکستان کے وزیراعظم شہباز شریف ترکیہ میں آئے ہوئے زلزلے کے فوراً بعد ترکیہ کا دورہ کرنے والے اور ترک بھائیوں کے غم میں برابر کے شریک ہونے والے پہلے عالمی رہنما تھے ۔ اپنے کلمات کے اختتام پر، سفیر ِ پاکستان نے ترکیہ کے ساتھ امن، ترقی اور تعلقات کو مضبوط بنانے کے لیے پاکستان کے عزم کا اعادہ کیا۔
جیوئے جیوئے پاکستان
اس سے قبل تقریب کا باقاعدہ آغاز تلاوتِ کلام پاک سے ہوا، جس کے بعد انقرہ میں واقع پاکستان اسکول کے بچوں کے بینڈ نے پاکستان اور ترکیہ کے قومی ترانے بجائے اور اس بینڈ کے پاکستان کے ملی نغمے خاص طور پر "جیوے جیوے پاکستان” نے ترک و پاکستانی مہمانوں کے دل موہ لیے کیونکہ "جیوے جیوے پاکستان” نامی یہ نغمہ ترکوں کے دلوں میں کئی برسوں سےبسا ہوا ہے۔
پاکستان کےروائتی پکوان
پروگرام کے آخر میں مہمانوں کی تواضع پاکستانی کے روایتی علاقائی پکوانوں سے کی گئی جسے مہمانوں نے بے حد پسند کیا۔