ڈی جی آئی ایس پی آر نے بھارت کا بیچ عالمی چوراہے بھانڈا پھوڑکر سر عام ننگا کردیا جس پر بھارت اپنے عوام ہی نہیں بلکہ دنیا کے سامنے ذلیل و رسوا ہوگیا

فوجی تصادم کا راستہ بھارت کا ہے تو اسے نتیجہ خیز بناناہماری چوائس ہوگی

ڈی جی آئی ایس پی آر لیفٹیننٹ جنرل احمد شریف چوہدری نے نائب وزیراعظم اسحاق ڈار کے ہمراہ نیوز کانفرنس کرتے ہوئے کہا کہ بھارت، پاکستان میں ریاستی دہشت گردی کروا رہا ہے، سیاسی مفادات کے حصول کے لیے بھارت دہشت گردی کرتا ہے۔

انہوں نے کہا کہ بھارت میں یہی کہا جاتا ہے پاکستان پر الزام لگاؤ اور الیکشن جیتو۔ پاکستان  بھارت پر حملے  میں پہل نہیں کرے گا لیکن   بھارت کے حملے کی صورت میں اس کا منہ توڑ جواب دیا جائے گا۔

بھارتی فوج کے افسر نے دہشتگرد سے کہا بلوچستان سے لاہور تک قتل عام دیکھنا چاہتے ہیں

ڈی جی آئی ایس پی آر نے کہا کہ کلبھوشن یادیو کو سب جانتے ہیں وہ بھارتی فوج کا حاضر سروس افسر تھا، گزشتہ روز بھی ایک دہشت گرد کے بھارتی فوجی افسران کے ساتھ گٹھ جوڑ سے آگاہ کیا گیا، اس افسر کے دہشت گرد کو ہدایت دینے کا آڈیو کلپ موجود ہے جس میں کہا گیا کہ بلوچستان سے لاہور تک عام شہریوں کا قتل عام دیکھنا چاہتے ہیں۔

انہوں نے مزید کہا کہ پاک افواج پوری طرح کسی بھی محاذ پر ہر خطرے کا جواب دینے کے لیے تیار ہے۔

لیفٹیننٹ جنرل احمد شریف چوہدری نے بتایا کہ جعفر ایکسپریس واقعے سے پہلے بھارتی سوشل میڈیا اکاؤنٹس سے پوسٹ کی گئیں جس میں کہا گیا پاکستان پر نظر رکھیں، واقعے کے بعد بھارتی میڈیا نے دہشت گردوں کو ہیرو بنا کر پیش کیا۔

پلوامہ واقعے کو کشمیر کی حیثیت تبدیل کرنے میں استعمال کیا

ڈی جی آئی ایس پی آر کے مطابق جعفر ایکسپریس واقعے کی اے آئی فوٹیج جاری کی گئیں، بھارت میں سرینڈر کرنے والوں نے بتایا کہ بھارت کیسے انہیں اسپانسر کرتا ہے، پلوامہ واقعے کو کشمیر کی حیثیت تبدیل کرنے میں استعمال کیا۔

انہوں نے کہا کہ پہلگام واقعے سے متعلق بھارت کے اندر سے آوازیں اٹھ رہی ہیں، اب دیکھ رہے ہیں پہلگام واقعے کو سندھ طاس معاہدے پر استعمال کیا جارہا ہے۔

افواجِ پاکستان الرٹ ہیں

نائب وزیراعظم اسحاق ڈار نے کہا ہے کہ افواجِ پاکستان الرٹ ہیں، بھارت نے مہم جوئی کی تو سخت جواب دیں گے، نہتے شہریوں کو نشانہ بنانے کی کوئی بھی کارروائی قبول نہیں، بھارت یک طرفہ سندھ طاس معاہدہ معطل نہیں کرسکتا، پانی روکنا جنگ تصور کیا جائے گا، پہلگام واقعے میں پاکستان ملوث ہے نا ہی اس میں کوئی کردار ہے، بھارت دوسروں پر انگلی اٹھانے کی بجائے اپنے اندرونی مسائل پر توجہ دے

نائب وزیراعظم اسحاق ڈار کا کہنا ہے کہ اس پریس کانفرنس کا مقصد موجودہ صورتحال سے آگاہ کرنا ہے، پہلگام واقعے کے بعد بھارت نے غیر ذمہ دارانہ اور جارحانہ رویہ اختیار کیا، پاکستان ہر قسم کی دہشت گردی کی مذمت کرتا ہے۔

اسحاق ڈار نے کہا کہ پورا خطہ بھارت کے غیر ذمہ درانہ اقدامات کی وجہ سے خطرے میں ہے، ہم بین الاقوامی برادری سے اس خطرے سے متعلق رابطے میں ہیں، بھارت خطے میں جان بوجھ کر حالات کو کشیدہ کر رہا ہے، پاکستان سمیت کئی ممالک میں دہشت گردی کے واقعات کے پیچھے بھارت کا ہاتھ ہے، بھارتی اقدامات جارحیت پر مبنی ہیں۔

انہوں نے کہا کہ پاکستان ہر قسم کی دہشت گردی کے خلاف ہے، معصوم شہریوں کا قتل قابل مذمت ہے، اقوام متحدہ کی سلامتی کونسل نے بھی اس حملے کی مذمت کی ہے، پاکستان خود دہشت گردی کا شکار ہے، پہلگام واقعے میں انسانی جانوں کے ضیاع پر افسوس ہے۔

اسحاق ڈار نے کہا کہ بھارت میں ہونے والا کوئی بھی واقعہ بھارت کا اپنا ڈرامہ ہوتا ہے، بھارت پاکستان سمیت دیگر ممالک میں دہشت گردی کا اسپانسر ہے، بھارت کو دوسرے پر انگلی اٹھانے کی بجائے اپنے اندرونی مسائل پر توجہ دینا چاہیے، پہلگام واقعہ کے بعد بھارت نے غیر ذمہ دارانہ رویہ اور اقدامات کیے۔

نائب وزیر اعظم نے کہا کہ بھارت میں ایسے واقعات اس وقت ہوتے ہیں جب وہاں کوئی اہم شخصیت دورہ کرتی ہے، بھارت بتائے کسی اہم شخصیت کے دورے پر ہی ایسے واقعات کیوں ہوتے ہیں؟، پہلگام واقعہ پر بھارت نے فوری طور پر پاکستان پر الزام لگا دیا، پاکستان کا پہلگام واقعہ سے کوئی تعلق نہیں ہے۔

پہلگام واقعہ کی تحقیقات غیر جانبدار اداروں سے کروانے کی پیشکش

اسحاق ڈار نے کہا کہ وزیراعظم نے پہلگام واقعہ کی تحقیقات کرنے کی پیش کش کی ہے، بھارت ایسی صورتحال کیوں پیدا کر رہا ہے، بھارت یکطرفہ طور پر سندھ طاس معاہدہ معطل نہیں کر سکتا، سندھ طاس معاہدے کو یکطرفہ معطل کرنے کی کوئی شق نہیں ہے، پانی پاکستان کے 24 کروڑ عوام کے لیے لائف لائن ہے۔

انہوں نے کہا کہ قومی سلامتی کونسل کا واضح پیغام ہے کہ پانی روکنے کا اقدام جنگ تصور کیا جائے گا، بھارتی اقدام سے پورا خطہ عدم استحکام کا شکار ہوگیا ہے، بھارت کے کسی بھی اقدام کا بھرپور جواب دیا جائے گا، بھارت پاکستان میں دہشتگردی کے واقعات کا منصوبہ ساز، سرپرست اور اسپانسر ہے، ہم واضح کرتے ہیں پاکستان کشیدگی بڑھانے میں پہل نہیں کرے گا، واضح کرتے ہیں اگر بھارت نے کوئی کارروائی کی تو بھرپور جواب دیں گے۔

اسحاق ڈار نے مزید کہا کہ بھارت مقبوضہ کشمیر میں تحریک آزادی کو دہشت گردی سے جوڑنا چاہتا ہے، ہماری افواج الرٹ ہیں، ہم چوکس ہیں، بھارت مخصوص مقاصد کے لیے پاکستان پر الزام لگاتا ہے۔