وزیر اعظم محمد شہباز شریف سے جمہوریہ ترکیہ کے سفیر ڈاکٹر عرفان نذیر اولو نے آج وزیر اعظم ہاؤس میں ملاقات کی ہے اور ترکیہ کی جانب سے پاکستان کے ساتھ مکمل یکجہتی کا اظہار کیا ہے۔
ملاقات کے دوران وزیراعظم شہباز شریف نے صدر رجب طیب ایردوان کو اپنی نیک خواہشات اور مبارکباد پیش کی اور 22 اپریل 2025 کو اپنے حالیہ دورہ انقرہ کو یاد دہانی کرواتے ہوئے کہا کہ ترکیہ کے ساتھ تمام شعبوں میں تعلقات کو فروغ دینے کے تمام پہلووں پر غور کیا ہے۔
وزیراعظم شہباز شریف نے صدر ایردوان کا جنوبی ایشیا کی موجودہ صورتحال کے دوران پاکستان کی حمایت کے ساتھ ساتھ خطے میں امن کے مطالبے پر ان کا شکریہ ادا کیا۔ وزیراعظم نے کہا کہ پاکستان کے لیے ترکیہ کی حمایت دونوں ممالک اور ان کے عوام کے درمیان تاریخی، گہرے اور وقت کی آزمائشی برادرانہ تعلقات کی عکاس ہے۔
وزیر اعظم شہباز شریف نے کہا کہ پہلگام واقعہ کے بعد ہندوستان کی اشتعال انگیز کارروائیوں کے باوجود پاکستان کا ردعمل ذمہ دارانہ ارہا ہے ۔ انہوں نے اس بات کا اعادہ کیا کہ پاکستان نے ہمیشہ ہر قسم کی دہشت گردی کی مذمت کی ہے۔ انہوں نے کہا کہ پاکستان نے انسداد دہشت گردی کے خلاف جدو جہد میں بڑے پیمانے پر قربانیاں دی ہیں، جن میں 90,000 ہلاکتیں اور 152 بلین امریکی ڈالر سے زیادہ کا معاشی نقصان شامل ہے۔ ان کا مزید کہنا تھا کہ بھارت کے اقدامات پاکستان کی انسداد دہشت گردی کی کوششوں سے توجہ ہٹانے کی ناکام کوشش ہے۔
وزیر اعظم شہباز شریف نے زور دے کر کہا کہ بھارت کوئی ثبوت دینے میں ناکام رہا ہے اور وہ پاکستان کو پہلگام واقعہ سے جوڑنے کی جھوٹی کوشش کر رہا ہے۔ انہوں نے مزید کہا کہ بھارت نے ابھی تک پہلگام واقعے کے پس پردہ حقائق کا پتہ لگانے کے لیے قابل اعتماد، شفاف اور غیر جانبدار بین الاقوامی تحقیقات کی پاکستان کی پیشکش کا جواب دینا ہے۔ پاکستان ایسی تحقیقات میں مکمل تعاون کرے گا اور اگر ترکیہ اس میں شامل ہوتا ہے تو اس کا خیرمقدم کیا جائے گا۔
انہوں نے پاکستان کی اقتصادی بحالی اور ترقی پر اپنی حکومت کی توجہ کا اعادہ کیا جس کے لیے اسے اپنے پڑوس میں امن اور سلامتی کی ضرورت ہے۔
ترک سفیر ڈاکٹر عرفان نذیر اولو نے وزیر اعظم ک شہباز شریف کو بتایا کہ ترکیہ نے پاکستان کے موقف کو سراہا اور پاکستان کے ساتھ اپنی یکجہتی کا اظہار کرتے ہوئے کشیدگی کو کم کرنے اور جنوبی ایشیا میں امن و سلامتی کو برقرار رکھنے کے لیے موجودہ بحران میں تحمل سے کام لینے پر زور دیا۔