پاکستان کے مینگوز نے ترکوں کے دلوں میں پاکستان سے محبت کی چاشنی گھول دی، انقرہ کی سپر مارکیٹ میں مینگوز کی نمائش میں لوگوں کا تانتا بندھ گیا

پاکستانی مینگوزکا اپنی خوشبو، مٹھاس اور ذائقے میں کوئی ثانی نہیں :سفیر پاکستان

رپورٹ: ڈاکٹر  فرقان حمید

ترکیہ کے دارالحکومت انقرہ میں سفارتخانہ  پاکستان نے   منفرد اور خوشبوؤں سے معطر تقریب کا انعقاد کیا، جس نے ترک عوام کے ذوق اور ذائقے پر ایک ایسا اثر چھوڑا جو مدتوں یاد رکھا جائے گا۔ یہ مینگوز  کی نمائش اورترک عوام کو  مینگو کی لذت سے آشنا کرنے  کی  ایک تقریب تھی، جسے پاکستان کے سفارتخانے نے ترکیہ کی معروف سپر مارکیٹ چین کیرفورSA کے اشتراک سے ترتیب دیا۔ اس تقریب کا بنیادی مقصد ترک صارفین کو پاکستان کے مینگوز  کی وہ مٹھاس، خوشبو اور لذت دکھانا تھا جسے دنیا بھر بجا طور پر “پھلوں کا بادشاہ” تسلیم کرتی ہے۔

ترک عوام کی بڑی تعداد کی شرکت

اس خصوصی تقریب میں انقرہ کے شہری بڑی تعداد میں شریک ہوئے۔ جیسے ہی آموں کے اسٹال سجائے گئے اور تازہ کٹے ہوئے آموں کی مہک ہوا میں پھیلی، ترک خاندان، نوجوان، خواتین اور بچے جوق در جوق کیرفورSA کی مقامی شاخ کا رخ کرنے لگے۔ ہر کوئی بے تابی سے پاکستانی آموں کا ذائقہ چکھنے کو تیار تھا، اور جب انہوں نے پہلی بار اس لذت کو محسوس کیا تو ان کے چہروں پر مسکراہٹیں بکھر گئیں۔ بہت سے شرکاء نے برملا کہا کہ انہوں نے آج تک اتنے شیریں اور خوشبودار آم کبھی نہیں کھائے۔

ایک ترک خاتون نے کہا: “یہ آم صرف ایک پھل نہیں بلکہ ایک تحفہ ہے۔ ہم نے ترکیہ میں آم تو کھائے ہیں مگر پاکستانی آم کی خوشبو اور مٹھاس کا کوئی ثانی نہیں۔“ ایک نوجوان طالب علم نے ہنستے ہوئے کہا: “اگر یہ آم ہمیں روزانہ مل جائیں تو ہم کبھی میٹھائی کی طرف نہ جائیں!”

“پھلوں کا بادشاہ” نے سب کے دل جیت لیے

پاکستانی آموں کے اسٹال پر لمبے لمبے قطاریں لگ گئیں۔ لوگ ایک دوسرے سے آگے بڑھ کر یہ “پھلوں کا بادشاہ” حاصل کرنے کی کوشش کر رہے تھے۔ کیرفورSA کی انتظامیہ نے بھی اعتراف کیا کہ آموں کے اس شو نے ان کے اسٹور میں غیرمعمولی رش پیدا کیا۔ ترک عوام کی دلچسپی اور بڑھتی ہوئی مانگ دیکھ کر انتظامیہ نے فوری طور پر مزید مقدار میں پاکستانی آم منگوانے کا فیصلہ کیا۔

سفیر پاکستان سپر مارکیٹ میں عوام میں گھل مل گئے

پاکستان کے سفیر برائے ترکیہ، عزت مآب ڈاکٹر یوسف جنید بنفسِ نفیس اس موقع پر موجود تھے۔ انہوں نے آموں کے اسٹال کا تفصیلی دورہ کیا اور ترک شہریوں سے براہِ راست تبادلہ خیال کیا۔ سفیر نے پاکستانی آموں کے بارے میں گفتگو کرتے ہوئے کہا:

“پاکستانی آم اپنی خوشبو، مٹھاس اور ذائقے میں دنیا بھر میں منفرد مقام رکھتے ہیں۔ یہ بجا طور پر پھلوں کے بادشاہ کہلاتے ہیں۔ آج ترک عوام کی گرمجوش پذیرائی ہمارے لیے باعثِ فخر ہے۔ ہمیں خوشی ہے کہ پاکستانی آم ترکیہ میں اپنی پہچان بنا رہے ہیں اور ہمیں یقین ہے کہ مستقبل میں ان کی مانگ میں مزید اضافہ ہوگا۔“

انہوں نے مزید کہا کہ پاکستان آم پیدا کرنے اور برآمد کرنے والے بڑے ممالک میں سے ہے، اور ترکیہ جیسے برادر ملک میں ان کی پذیرائی دونوں ممالک کے درمیان تجارتی تعلقات کو ایک نئی بلندی تک لے جائے گی۔ “ہماری خواہش ہے کہ پاکستانی آم صرف ایک میٹھا پھل ہی نہیں بلکہ پاکستان اور ترکیہ کے درمیان محبت اور بھائی چارے کی ایک علامت بن جائیں۔ یہ تقریب ایک آغاز ہے اور ان شاءاللہ ہم مستقبل میں بھی ایسی تقریبات جاری رکھیں گے تاکہ پاکستانی مصنوعات اپنی اصل پہچان کے ساتھ ترک عوام تک پہنچ سکیں۔“

سفارتخانے کی کوششیں رنگ لانے لگیں

یہ تقریب دراصل پاکستان کے سفارتخانے کی ایک وسیع تر مہم کا حصہ ہے، جس کا مقصد اعلیٰ پاکستانی مصنوعات کو ترکیہ کی مارکیٹ میں متعارف کرانا اور برادر ممالک کے درمیان تجارتی و ثقافتی روابط کو مزید مضبوط بنانا ہے۔ ڈاکٹر یوسف جنید اور ان کی ٹیم نے نہ صرف اس تقریب کو کامیاب بنایا بلکہ ترک میڈیا اور کاروباری حلقوں کو بھی اس مہم کا حصہ بنایا۔

ترک عوام کی بڑھتی مانگ

تقریب کے بعد صورتحال یہ تھی کہ سپر مارکیٹ میں پاکستانی آم ہاتھوں ہاتھ فروخت ہونے لگے۔ لوگ اپنی خریداری کی ٹوکریاں آموں سے بھر رہے تھے اور کئی خریدار تو ایک سے زائد ڈبے لے کر جا رہے تھے تاکہ اپنے دوستوں اور رشتہ داروں کو بھی یہ منفرد تحفہ پیش کر سکیں۔

کیرفورSA کی انتظامیہ نے تسلیم کیا کہ پاکستانی آموں کی نمائش اور چکھنے کی یہ تقریب ان کے اسٹور کی تاریخ کے کامیاب ترین ایونٹس میں سے ایک رہی۔ انتظامیہ کے مطابق: “ترک صارفین نے پاکستانی آموں کو جس پذیرائی سے قبول کیا ہے، اس نے ہمارے لیے بھی نئی راہیں کھول دی ہیں۔ ہم مستقبل میں پاکستانی آموں کی باقاعدہ اور بڑی مقدار میں فراہمی کے لیے پرعزم ہیں۔“

مینگو ڈپلومیسی میں کامیابی

انقرہ میں پاکستانی آموں کی یہ نمائش اور چکھنے کی تقریب نہ صرف ایک سفارتی سرگرمی تھی بلکہ پاکستان اور ترکیہ کے درمیان تعلقات کی نئی جہتوں کو اجاگر کرنے والا ایک سنگ میل ثابت ہوئی۔ ترک عوام کے دل پاکستانی آموں نے واقعی جیت لیے، اور اب صورتحال یہ ہے کہ انقرہ سے لے کر استنبول تک پاکستانی آموں کی مانگ بڑھتی جا رہی ہے۔

پاکستانی سفارتخانے کی انتھک کاوشوں اور سفیر پاکستان کی ذاتی دلچسپی کے نتیجے میں یہ تقریب ایک یادگار ایونٹ بن گئی۔ آج یہ کہنا بے جا نہ ہوگا کہ پاکستانی آم ترکیہ میں ایک نئے ذائقے کا سفر شروع کر چکے ہیں، اور آنے والے دنوں میں یہ “پھلوں کا بادشاہ” دونوں برادر ممالک کے درمیان تعلقات کو مزید میٹھا اور مضبوط بناتا چلا جائے گا۔