دنیا کی آنکھوں کے سامنے ایک سرزمین مسلسل لہو میں نہا رہی ہے۔ غزہ۔۔۔غزہ ۔۔۔غزہ ۔۔۔ خون میں نہایا ہوا غزہ ۔۔۔
وہ غزہ جس کی گلیوں میں کبھی بچوں کی قہقہے گونجتے تھے، آج بارود اور ملبے کی گرد میں ڈوب چکا ہے۔ جہاں کھلونوں کے بجائے لاشیں، اور جھولوں کے بجائے ملبے کے ڈھیر ہیں۔
یہ منظرنامہ صرف فلسطین کا نہیں، یہ انسانیت کے ماتھے پر ایک بدنما داغ ہے۔ اور ایسے وقت میں ترکیہ کے صدر رجب طیب ایردوان کی آواز ظلم کے اندھیروں میں جلتی ہوئی ایک مشعل بن کر اُبھرتی ہے۔
انہوں نے دو ٹوک کہاکہ ” غزہ کو مکمل فوجی کنٹرول میں لینے کا نیتن یاہو حکومت کا منصوبہ کسی صورت قبول نہیں کیا جا سکتا۔”
یہ الفاظ محض سفارتی جملے نہیں، یہ ایک ضمیر کی پکار ہیں۔
خاموش دنیا اور ملبے کا ڈھیر غزہ
سوال یہ ہے کہ جب یوکرین کی جنگ میں عالمی طاقتوں نے انصاف اور انسانی حقوق کے نام پر کانپتی زمین پر گونج پیدا کی تھی تو آج غزہ کے اجڑے گھروں، تڑپتے بچوں اور بھوکی ماؤں کے لیے یہ طاقتیں کیوں خاموش ہیں؟
کیا انسانیت کے حقوق کا کوئی جغرافیہ ہوتا ہے؟
کیا فلسطینی بچے کم درجے کے انسان ہیں؟
ایردوان کی للکار دراصل اسی دوہرے معیار کو چیلنج کر رہی ہے۔ وہ دنیا سے پوچھ رہے ہیں: انصاف اگر انصاف ہے تو پھر وہ غزہ کے لیے کیوں نہیں؟
اقوامِ متحدہ… ایک خاموش تماشائی
اقوامِ متحدہ کی عمارت نیویارک میں ضرور ایستادہ ہے مگر اس کے ستونوں سے انصاف کی بازگشت کب کی رُک چکی ہے۔ قراردادیں صرف کاغذ پر لکھی جاتی ہیں اور فلسطینیوں کے زخموں پر صرف نمک چھڑکا جاتا ہے۔
ایردوان کے الفاظ اقوامِ متحدہ کو بھی آئینہ دکھاتے ہیں کہ اگر یہ ادارہ اپنی ذمہ داری پوری نہیں کرتا تو کل تاریخ کے اوراق پر اس کا نام بھی تماشائیوں کی فہرست میں لکھا جائے گا۔
ترکیہ کا کردار: ایک روشنی، ایک امید
ایردوان کا مؤقف ترکیہ کی پالیسی کی روح ہے۔ “استنبول عمل” ہو یا یوکرین جنگ میں ثالثی، ترکیہ نے بار بار دنیا کو دکھایا کہ وہ امن کے سفر میں ایک رہنما کردار ادا کر سکتا ہے۔
غزہ کے معاملے پر بھی یہی کردار نمایاں ہے۔ ایردوان کی باتیں سفارت کاری سے آگے بڑھ کر ایک انسانی فریاد ہیں۔ وہ بتا رہے ہیں کہ ترکیہ ظلم کے سامنے سر نہیں جھکائے گا بلکہ مظلوم کے حق میں ڈٹ کر کھڑا ہوگا۔
غزہ۔۔۔صدی کا کربلا
غزہ آج محض ایک جغرافیہ نہیں رہا۔ یہ صدی کا کربلا بن چکا ہے جہاں مظلوموں کا خون بہہ رہا ہے اور طاقتور یزیدی صفیں باندھے کھڑے ہیں۔ فرق صرف اتنا ہے کہ کربلا کی خاک پر تاریخ نے یزید کو رسوا کر دیا تھا، اور آج غزہ کی مٹی ایک بار پھر ظالموں کے زوال کی گواہ بننے والی ہے۔
ایردوان کی للکار اسی حسینؑی سچائی کا اعلان ہے کہ ظلم جتنا بھی طاقتور ہو، وہ دیرپا نہیں رہ سکتا۔
ایک سوال جو آنے والی نسلوں سے جڑا ہے
کل جب تاریخ لکھی جائے گی تو یہ سوال باقی رہے گا
جب غزہ جل رہا تھا، جب بچے بلک رہے تھے، جب مائیں لاشوں سے لپٹ کر رو رہی تھیں ، تب دنیا کہاں تھی؟
کیا وہ انصاف کے علمبردار اقوام خاموش تماشائی تھیں یا پھر ایردوان کی طرح انہوں نے بھی اپنی آواز بلند کی تھی؟
ایردوان کی یہ للکار محض آج کی دنیا کے لیے نہیں، آنے والی نسلوں کے لیے بھی ہے۔ یہ اعلان ہے کہ ترکیہ کمزور اور مظلوم کے ساتھ کھڑا ہے، چاہے دنیا کا سارا زور ظلم کے پلڑے میں کیوں نہ ہو۔