رپورٹ : ڈاکٹر فرقان حمید
ترکیہ نے 122سپر سونک ڈرون کا فضاء سے بیلسٹک میزائیل داغنے کا کامیاب تجربہ کرکےدنیا تہلکہ مچادیا ہے۔ بے مثال ٹیکنالوجی کے حامل ترک دفاعی منصوبے ایک بار پھر دنیا کی توجہ کا مرکز بن گئے ہیں۔ بائیکار کے چیئرمین سیلچوق بایراکتار کے حالیہ بیان نے ایک مرتبہ پھر نگاہیں “ترک ڈرون 122” پر مرکوز کر دی ہیں۔ یہ راکٹ سان کے تیار کردہ وہ نیا میزائل ہے جو زمینی لانچر سے فائر کیے جانے والے بیلسٹک ہتھیاروں کا ایک جدید اور انقلابی ورژن ہے، مگر فرق یہ ہے کہ اسے اب ڈرون سے بھی داغا جا سکتا ہے۔ یہ صلاحیت ترکیہ کے دفاعی ہاتھ کو غیرمعمولی حد تک مضبوط کر رہی ہے۔
گزشتہ چند برسوں میں ترک دفاعی صنعت نے حیران کن ترقی کی ہے۔ میدانِ جنگ کی حقیقی ضروریات کو مدنظر رکھتے ہوئے تیار کیے گئے حل نہ صرف جدید جنگی توازن کو بدل رہے ہیں بلکہ ترکی کو دنیا کی صفِ اول کی عسکری طاقتوں میں لے آئے ہیں۔ اسی تناظر میں سیلچوق بایراکتار نے حالیہ دنوں ایک نہایت اہم ہتھیار کی طرف اشارہ کرتے ہوئےکہا کہ
ٹی بی-3 سے آواز کی رفتار سے چار گنا تیز اور ایک لاکھ فٹ کی بلندی تک پہنچنے والا میزائل کا کامیاب تجربہ کیا گیا ہے یہ ٹیکنالوجی فی الحال دنیا میں صرف ہمارے پاس موجود ہے۔
یہ محض ایک فخر بھرا جملہ نہیں، بلکہ دنیا کو دی جانے والی وہ دستاویزی اطلاع ہے جو ظاہر کرتی ہے کہ UAV-122 نامی یہ میزائل اب ترکیہ کی عسکری قوت کا نیا نشان ہے۔
میزائل کی خصوصیات: رفتار، درستگی اور دھوکہ
UAV-122 اپنی غیرمعمولی سُپر سونک رفتار کے باعث دشمن کے ریڈار کو دھوکہ دینے کی صلاحیت رکھتا ہے۔ یہ بجلی کی سی تیزی سے حرکت کرتے ہوئے سب میٹر سطح پر ہدف کو نشانہ بناتا ہے۔ مزید یہ کہ اپنی چابک دستی سے یہ جدید فضائی دفاعی نظاموں کو بھی بے بس کر دیتا ہے۔
بایراکتار کا اشارہ راکٹ سان کے تیار کردہ جدید ترین UAV-122 کی جانب تھا۔ یہ دراصل ان مشہور ٹی آر جی راکٹوں کا ایک ایسا ورژن ہے جسے حال ہی میں ڈرون سے فائر کرنے کے قابل بنایا گیا ہے۔ اس کامیابی کے ساتھ ترکیہ نے ایک اور تاریخی عسکری برتری حاصل کر لی ہے۔
UAV-122 کی نمایاں خصوصیات
بایئکار اور راکٹ سان کے اس مشترکہ شاہکار کی سب سے بڑی خوبی اس کی سُپر سونک رفتار ہے۔ بجلی کی سی تیزی سے حرکت کرنے والا یہ میزائل نہ صرف بے مثال درستگی کے ساتھ اپنے ہدف کو نشانہ بناتا ہے بلکہ شاندار مانورنگ صلاحیتوں کے باعث دنیا کے جدید ترین فضائی دفاعی نظاموں کو بھی دھوکہ دینے میں کامیاب رہتا ہے۔
جدید گائیڈنس کٹ کی بدولت اس میزائل کی نشانہ بازی سب میٹر لیول تک درست ہے۔ کم لاگت، تیز رفتار پیداوار اور ہدف پر انتہائی تباہ کن اثرات کی بدولت یہ میزائل ترکیہ کے لیے “گیم چینجر” حیثیت رکھتا ہے۔ سب سے بڑھ کر یہ کہ یہ ہتھیار ترکیہ کو “نقطۂ نظر کی حد سے پرے” کارروائی کرنے کا موقع فراہم کرتا ہے، جو اسے ایک نہایت اسٹریٹجک قوت بنا دیتا ہے۔
ڈرون سے بیلسٹک میزائل فائر کرنے والادنیا کا واحد ملک ترکیہ
تاریخ کے ریکارڈ کے مطابق آج تک کوئی اور ملک ایسا نہیں جس نے بیلسٹک میزائل کو ڈرون سے داغنے کی عملی صلاحیت حاصل کی ہو۔ماہرین کے مطابق” UAV-122 ” جسے ہوا سے داغا جانے والا بیلسٹک میزائل بھی کہاجاتا ہے کو تیار کرنے والا واحد ملک ترکیہ ہے۔ گویا دفاعی صنعت کی لغت میں اب ایک نیا باب لکھا جا رہا ہے، جس کی پہلی سطر پر صرف ترکیہ کا نام درج ہے۔
اس میزائل کی غیرمعمولی رفتار کے باعث دشمن کے فضائی دفاعی نظام اسے دیر سے پکڑ پاتے ہیں۔ اور جب تک میزائل ان کے ریڈار پر آتا ہے، تب تک وار اپنے ہدف پر جا کر لگ چکا ہوتا ہے۔ ماہرین کا کہنا ہے کہ موجودہ حالات میں دنیا کے چند ہی ممالک ایسے ہیں جن کے پاس UAV-230 یا UAV-122 جیسے میزائلوں کو روکنے کی صلاحیت ہے۔
کم لاگت، زیادہ تباہی
روس-یوکرین جنگ اور حالیہ اسرائیل-ایران کشیدگی میں یہ بات کھل کر سامنے آئی ہے کہ جدید جنگوں میں سب سے بڑا مسئلہ موزوں، کم لاگت اور جلدی تیار ہونے والے مؤثر ہتھیاروں کی کمی ہے۔ دنیا کی بڑی طاقتوں نے دیکھا ہے کہ مہنگے میزائلوں کے ذخائر کس تیزی سے ختم ہوتے ہیں اور یہ صورتحال میدانِ جنگ میں کس قدر نقصان دہ ثابت ہوتی ہے۔
ایسے وقت میں ترکیہ نے UAV-230 اور UAV-122 جیسے ہتھیار تیار کرکے اپنے لیے ناقابلِ یقین برتری حاصل کر لی ہے۔ یہ میزائل نہ صرف کم لاگت کے ہیں بلکہ بڑی تعداد میں تیزی سے تیار کیے جا سکتے ہیں اور ہدف پر انتہائی تباہ کن اثرات مرتب کرتے ہیں۔
یہ میزائل صرف فضائی دفاعی نظام ہی نہیں بلکہ دشمن کے حساس فوجی اڈوں اور کمانڈ مراکز کو بھی نشانہ بنانے کی صلاحیت رکھتے ہیں۔ مزید یہ کہ مناسب حالات میں دشمن کے بحری بیڑے پر بھی انہی میزائلوں سے کاری ضرب لگائی جا سکتی ہے۔ یاد رہے کہ مارچ 2025 میں بائیکار کے تیار کردہ ٹی بی-3 ڈرون نے بحیرہ میں موجود ایک ہدف کو 50 کلومیٹر سے زائد فاصلے پر UAV-122 کے ذریعے کامیابی سے تباہ کیا تھا۔
دوسری جانب راکٹ سان نے حال ہی میں یہ اعلان کیا ہے کہ UAV-300 پر بھی کام تیزی سے جاری ہے۔ اس میزائل میں استعمال ہونے والے جدید انجن اور ایندھن کے نظام کی بدولت اس کا رینج 500 کلومیٹر سے بھی تجاوز کر گیا ہے۔
میدانِ جنگ کی نئی حقیقت
یہ میزائل صرف فضائی دفاعی نظام کو ناکام نہیں بناتے بلکہ دشمن کے حساس فوجی مراکز، کمانڈ اینڈ کنٹرول سسٹم اور حتیٰ کہ بحری بیڑے کو بھی نشانہ بنانے کی صلاحیت رکھتے ہیں۔ مارچ 2025 میں جب ٹی بی-3 نے 50 کلومیٹر سے زائد فاصلے پر سمندری ہدف کو UAV-122 کے ذریعے تباہ کیا تو یہ لمحہ ایک فوجی کامیابی سے بڑھ کر تاریخ میں درج ہونے والا واقعہ بن گیا۔
مستقبل کی سمت: UAV-300
راکٹ سان نے اعلان کیا ہے کہ UAV-300 پر بھی کام جاری ہے، جس کا رینج 500 کلومیٹر سے تجاوز کر گیا ہے۔ یہ اعلان نہ صرف ایک خبر ہے بلکہ دفاعی ٹیکنالوجی کی تاریخ میں ایک دستاویزی سنگِ میل بھی ہے، جو آنے والی نسلوں کے لیے محفوظ کیا جانا چاہیے۔
کیا ترکیہ پاکستان کو یہ ٹیکنالوجی فراہم کرسکتا ہے؟
ترکیہ اور پاکستان ایک دوسرے کے ساتھ دفاعی صنعت اورپرو ڈکشن میں مکمل تعاون کرتے چلے آرہے ہیں۔ حالیہ پاک بھارت کشیدگی کے دوران جس طرح پاکستان نے ترکیہ کے ڈرونز کواستعمال وہ بھارت کے لیے ایک ڈرو نے خواب سے کم نہیں ہے ۔ ترکیہ کے ڈرونز نے بھارت کے اندر جاکر جس طرح ان کی دفاعی تنصیبات کو نقصان پہنچایا بھارت کبھی بھی اس نقصان کو فراموش نہیں کرسکے گا اور اب ترکیہ کی جانب سے UAV-122 کی تیاری نے بھارت کی نیندیں حرام کردی ہیں۔ اب دیکھنا یہ ہے کہ پاکستان ترکیہ سے ان ڈرونز کو حاصل کرنے کے لیے کب اپنے مذاکرات کا آغاز کرتا ہے۔