ترکیہ اپنے خطے پر مکمل غلبہ حاصل کرنے کی پوزیشن میں، ایٹمی توانائی سے چلنے والی جدید ترک آبدوزیں خطے کی طاقت کا توازن تبدیل کردیں گی

اے آئی پی ٹیکنالوجی کی حامل آبدوزیں ریڈار سے مکمل طور پر اوجھل

رپورٹ: ڈاکٹر فرقان حمید

امریکی جریدہ نیشنل انٹرسٹ نے ترکیہ کی ریئس کلاس آبدوزوں پر تفصیلی تجزیہ کرتے ہوئے انہیں’خطے کے طاقت کے توازن کو بدل دینے والا ہتھیار‘ قرار دیا ہے۔ جریدے کے مطابق یہ آبدوزیں ترکیہ کی دفاعی حکمتِ عملی میں فیصلہ کن کردار ادا کریں گی اور خاص طور پر بحیرہ ایجین اور بحیرہ اسود میں ترکیہ کو ایسا غلبہ عطا کریں گی جو پہلے کبھی ممکن نہ تھا۔

ترک بحری تاریخ کا تسلسل

یہ حقیقت فراموش نہیں کی جا سکتی کہ سلطنتِ عثمانیہ کے دور سے ترکیہ کے ملاح اور جہاز ران عالمی سمندری قوتوں کے مقابلے میں صفِ اول پر رہے ہیں۔ خیرالدین پاشا (باربروسا) اور ترگت  ریئس جیسے سپہ سالاروں نے بحیرہ روم کی لہروں پر اپنی بہادری کے نقوش چھوڑے۔ ’’ریئس کلاس‘‘ کا نام دراصل اسی عظیم میراث کو آگے بڑھانے کا ایک استعارہ ہے۔

جدید ٹیکنالوجی کا شاہکار

ریئس کلاس آبدوزیں نہ صرف جدید ڈیزائن رکھتی ہیں بلکہ ان میں ہوا سے آزاد انجن (AIP) ٹیکنالوجی موجود ہے جس کی بدولت یہ طویل عرصے تک زیرِآب رہ کر دشمن کی نظروں سے اوجھل رہتی ہیں۔ امریکی تجزیے کے مطابق ان کا شور اس قدر کم ہے کہ دشمن کے ریڈار انہیں ڈھونڈنے میں تقریباً ناکام رہتے ہیں۔ یہی صلاحیت انہیں ترکیہ کی ’ غیر متوازن بحری حکمتِ عملی ‘ کا مرکزی عنصر بناتی ہے۔

ماوی وطن-(بلیو وطن)  اور ایردوان کا وژن

صدر رجب طیب ایردوان بارہا اس حقیقت پر زور دے چکے ہیں کہ ’ مضبوط بحریہ کے بغیر کوئی قوم سمندروں میں اپنے حقوق کا دفاع نہیں کر سکتی۔ ‘ ان کے پیش کردہ  ’ ماوی وطن-بلیو وطن ‘ کے تصور نے دراصل ترکیہ کے بحری عزائم کو ایک نظریاتی بنیاد فراہم کی ہے۔ مشرقی بحیرہ روم میں توانائی کے ذخائر، تجارتی راہداریوں کا تحفظ اور سمندری حدود کی حفاظت، یہ سب اہداف ریئس کلاس آبدوزوں کے ذریعے حقیقت کا روپ دھار رہے ہیں۔ ترک بحریہ کی کمان میں شامل ہونے والی 214 طرز کی ریئس کلاس آبدوزیں، ترکیہ کی زیرِآب جنگی صلاحیتوں میں ایک نیا موڑ ہیں۔ اپنی خفیہ ساخت اور جدید خصوصیات کے باعث یہ آبدوزیں کم لاگت میں ترک بیڑے کے لیے زبردست قوت ثابت ہو رہی ہیں۔  یہ نہ صرف انقرہ کے دفاعی ڈھانچے کو طاقتور بنا رہی ہیں بلکہ ترکیہ کے علاقائی سمندری غلبے کے عزم کی علامت بھی سمجھی جا رہی ہیں۔

   ترک بحری تاریخ کا نیا باب

ترکیہ کا جدید آبدوز پروگرام 2006 میں شروع ہوا۔ اس مقصد کے لیے مختلف ممالک سے پیشکشیں طلب کی گئیں اور آخرکار 2011 میں جرمن-برطانوی اتحاد ایچ ڈی ڈبلیو (موجودہ تھائسِن کروپ میرین سسٹمز) کے ساتھ 6 آبدوزوں کی تیاری کا 2.06 ارب یورو کا معاہدہ طے پایا۔ یہ آبدوزیں گولجک شپ یارڈ میں تیار کی جا رہی ہیں۔

ابتدا میں ’ جربہ کلاس ‘ کہلانے والے اس منصوبے کو 2014 میں سلطنتِ عثمانیہ کے عظیم ملاحوں کی یادگار کے طور پر ’ ریئس کلاس ‘ کا نام دیا گیا۔ منصوبے میں اسل سان، ہیول سان اور ایس ٹی ایم جیسی ترک دفاعی کمپنیوں نے کلیدی کردار ادا کیا اور بڑے پیمانے پر مقامی ٹیکنالوجی کو شامل کیا۔

خطے میں طاقت کا توازن

ریئس کلاس آبدوزوں کی شمولیت یونان اور مشرقی بحیرہ روم میں ترکیہ کے لیے ایک توازن پیدا کرتی ہے۔ امریکی جریدے کے مطابق یہ آبدوزیں نہ صرف خطے کے خطرات کے مقابلے میں ڈھال ہیں بلکہ ترکیہ کی عسکری قوت کا وہ پہلو ہیں جو مخالفین کے لیے ناقابلِ پیش گوئی اور ڈرانے والا عنصر بن جائے گا۔

مستقبل کی راہ: ملدن  اور ممکنہ ایٹمی آبدوزیں

National Submarine Project

ریئس کلاس کو دراصل ایک عبوری منصوبہ بھی کہا جا سکتا ہے کیونکہ ان کے بعد ’ ملدن ‘ یعنی National Submarine Projectمکمل طور پر مقامی ڈیزائن کی آبدوزوں کی تیاری شروع ہو گی۔ ماہرین کا ماننا ہے کہ 2030 کی دہائی میں ترکیہ ایٹمی توانائی سے چلنے والی آبدوزوں کی جانب بھی قدم بڑھا سکتا ہے۔ اگر ایسا ہوتا ہے تو ترکیہ خطے میں پہلی مسلم طاقت ہو گی جو اس درجے کی بحری صلاحیت رکھتی ہو۔

اسٹریٹجک کامیابی

آخرکار یہ کہنا بجا ہے کہ ریئس کلاس آبدوزیں محض ایک فوجی منصوبہ نہیں بلکہ ایک اسٹریٹجک بیانیہ ہیں۔ یہ اس بات کی علامت ہیں کہ ترکیہ صرف خطے میں نہیں بلکہ عالمی سطح پر بھی اپنی بحری شناخت منوانے کے لیے پرعزم ہے۔ نیشنل انٹرسٹ نے درست ہی کہا کہ یہ پیش رفت محض جدید کاری نہیں بلکہ خطے میں طاقت کے توازن کو نئی شکل دینے والی ایک تاریخی کامیابی ہے۔

  دشمن کی نظروں سے اوجھل

رپورٹ میں واضح کیا گیا ہے کہ اے آئی پی ٹیکنالوجی اور نہایت کم شور پیدا کرنے والے انجن کے باعث ریئس کلاس آبدوزیں طویل مدت تک زیرِآب رہنے کی صلاحیت رکھتی ہیں اور دشمن کے ریڈار سے تقریباً مکمل طور پر اوجھل رہتی ہیں۔ یہی خصوصیت انہیں ترکیہ کی ’’غیر متوازن بحری حکمتِ عملی‘‘ کا مرکزی ہتھیار بناتی ہے۔

بیڑے میں شمولیت کا شیڈول

• ٹی سی جی پِری ریئس (S-330): 2019 میں سمندر میں اتاری گئی، 2022 میں آزمائشی سفر مکمل کیا اور اگست 2024 میں باقاعدہ سروس میں شامل ہو گئی۔
• ٹی سی جی حِضر ریئس (S-331): 2023 میں سمندر سے روشناس ہوئی اور رواں برس بحریہ میں شامل ہو گی۔
• ٹی سی جی مُرات ریئس (S-332): 2025 میں پہلی بار پانی میں اتاری گئی۔
• باقی تین آبدوزیں، ’ اوروج ریئس ‘ ، ’ سلیمان ریئس ‘ اور ’ یاوُز ریئس ‘ 2029 تک بیڑے کا حصہ بن جائیں گی۔

رپورٹ میں صدر رجب طیب ایردوان کے اس موقف کا بھی ذکر کیا گیا کہ ایک مؤثر اور طاقتور بحریہ ترکیہ کی بقا اور خطے میں مفادات کے تحفظ کے لیے ناگزیر ہے۔’ ماوی وطنMavi Vatan یعنی نیلا وطن ‘ کے تصور کے تحت ترکیہ اپنے سمندری حقوق، توانائی و تجارتی راہداریوں کے تحفظ کے لیے عملی اقدامات کر رہا ہے اور ریئس کلاس آبدوزیں اسی حکمتِ عملی کی ٹھوس مثال ہیں۔

خطرات کے مقابلے میں توازن

امریکی جریدہ مزید لکھتا ہے کہ یہ آبدوزیں یونان اور مشرقی بحیرہ روم میں ممکنہ خطرات کے خلاف ترکیہ کے لیے ایک توازن قائم کرتی ہیں اور ملکی دفاعی ڈھانچے میں فیصلہ کن کردار ادا کریں گی۔

ایک تاریخی کامیابی

تجزیے کا اختتام اس جملے پر ہوا کہ ’ ریئس کلاس آبدوزیں صرف ایک جدید کاری منصوبہ نہیں بلکہ خطے میں ترکیہ کی بحری بالادستی کو دوبارہ قائم کرنے والی ایک بڑی اسٹریٹجک کامیابی ہیں۔ ‘