صدر رجب طیب ایردوان نے کابینہ اجلاس کے بعد ایک تاریخی اعلان کرتے ہوئے کہا کہ ترکیہ نے فضائی دفاع میں ایک نئی اور فیصلہ کن پیش رفت کی ہے۔ 460 ملین ڈالر مالیت کے جدید فضائی دفاعی نظام ’اسٹیل ڈوم‘کے 47 یونٹ ترک فوج کے حوالے کر دیے
گئے ہیں۔
اسٹیل ڈوم کے ساتھ ترکیہ کا نیا دفاعی دور
صدر ایردوان نے کہا کہ ’اسٹیل ڈوم کے ساتھ ہم فضائی دفاع میں بالکل نئی سطح پر پہنچ گئے ہیں۔ یہ نظام نہ صرف ترک جمہوریہ کی سرحدوں بلکہ ہر ترک شہری کی سلامتی کا ضامن ہے۔ اب ترکیہ اپنے فضائی دفاع میں خود کفیل ہے اور دشمن کو واضح پیغام دے رہا ہے کہ ہماری فضاؤں پر میلی نظر ڈالنے کی جرأت کوئی نہ کرے۔‘
نیتن یاہو حکومت انسانیت کے لیے خطرہ
صدر ایردوان نے اپنی گفتگو کے دوران اسرائیل کے وزیراعظم نیتن یاہو اور ان کی حکومت کو شدید تنقید کا نشانہ بنایا۔ ان کا کہنا تھاکہ’نیتن یاہو کی حکومت ایک پاگل پن اور سفاکیت میں ڈوبی ہوئی ہے۔ معصوم بچوں اور عورتوں کا قتل کرنے والی یہ حکومت انسانیت کے لیے بدترین خطرہ بن چکی ہے۔ ترکیہ کسی قیمت پر اپنے اصولی موقف سے پیچھے نہیں ہٹے گا اور ہم اپنے تمام وسائل کے ساتھ غزہ کے مظلوم عوام کے شانہ بشانہ کھڑے ہیں۔‘
انہوں نے مزید کہا کہ دنیا کے بڑے طاقتور ممالک خاموش تماشائی بنے بیٹھے ہیں مگر ’ترکیہ خاموش نہیں بیٹھ سکتا، کیونکہ ہمارا ضمیر ہمیں ظالم کے سامنے خاموش رہنے کی اجازت نہیں دیتا۔‘
اپوزیشن کو سخت انتباہ
صدر ایردوان نے اس موقع پر اپوزیشن، خصوصاً CHP سربراہ اوزگور اوزل کے حالیہ بیانات کو بھی شدید تنقید کا نشانہ بنایا۔ انہوں نے کہا کہ ’عدالتی فیصلوں کو نہ ماننا، قانون کو کھلے عام چیلنج کرنے کے مترادف ہے۔ ہم کسی کو بھی سڑکوں پر فساد برپا کر کے قوم کے سکون اور اتحاد کو خراب کرنے کی اجازت نہیں دیں گے۔‘
صدر نے کہا کہ جمہوریت اور آئین کے دائرے میں ہر قسم کی سیاسی سرگرمی کی آزادی ہے، مگر ریاستی اداروں کے خلاف بغاوت یا قانون کی توہین کسی صورت برداشت نہیں کی جائے گی۔
نوجوان جوڑوں کے لیے خوشخبری
صدر ایردوان نے نوجوانوں کے لیے ایک نئے اور انقلابی پیکج کا اعلان کرتے ہوئے کہاکہ
2026’ کے آغاز سے 18 تا 25 سال کی عمر کے شادی شدہ جوڑوں کو 2 لاکھ 50 ہزار لیر تک کا بلاسود قرض دیا جائے گا۔ مزید یہ کہ اگر وہ 48 ماہ کے اندر بچوں کے والدین بنتے ہیں تو ہر بچے کی پیدائش پر قرض کی واپسی ایک سال کے لیے مؤخر کر دی جائے گی۔‘
انہوں نے کہا کہ اس اقدام کا مقصد نوجوانوں کو معاشی اعتماد دینا اور خاندانی نظام کو مضبوط کرنا ہے تاکہ ترکیہ کا مستقبل مزید تابناک ہو۔