غزہ کی نسل کشی کا ذمہ دار نیتن یاہو ہے
صدر رجب طیب ایردوان نے کہا ہے کہ غزہ میں جاری انسانی المیہ کسی اور نام سے نہیں بلکہ اسے نسل کشی ہےسے تعبیر کیا جانا چاہیے اور اس کا اصل مجرم اسرائیلی وزیرِاعظم بن یامین نیتن یاہو ہے جس نے انتہائی بے رحمی کے ساتھ ہزاروں نہیں بلکہ دسیوں ہزار معصوموں کو خاک و خون میں نہلا دیا۔ ایردوان نے واضح کیا کہ ‘ترکیہ اس نسل کشی کے سراسر خلاف ہے اور اس کی مزاحمت جاری رکھے گا۔’
نیویارک میں منعقد ہونے والے اقوامِ متحدہ کی 80 ویں جنرل اسمبلی اجلاس کے سلسلے میں موجود صدر ایردوان نے امریکی چینل فوکس نیوز کو خصوصی انٹرویو دیا۔ پروگرام کے میزبان بریٹ بائیر کے سوالات کا جواب دیتے ہوئے ایردوان نے ترکیہ کی خارجہ پالیسی، بالخصوص غزہ کی صورتحال اور روس۔یوکرین جنگ پر کھل کر اظہارِ خیال کیا۔
غزہ کے بارے میں پوچھے گئے سوال پر صدر ایردوان نے دوٹوک الفاظ میں کہا کہ ‘اس کی کوئی اور توجیہ ممکن نہیں۔ یہ سو فیصد نسل کشی ہے اور اس کا ذمہ دار نیتن یاہو ہے۔ نیتن یاہو نے نہایت سنگ دلی سے اس قتلِ عام میں ہزاروں بے گناہوں کو شہید کیا ہے۔’
انہوں نے بتایا کہ غزہ میں اب تک ایک لاکھ پچیس ہزار سے زائد افراد زخمی ہو چکے ہیں جن میں سے ایک بڑی تعداد کو علاج کی غرض سے ترکیہ لایا گیا ہے۔
انٹرویو کے دوران جب ان سے حماس کے قبضے میں موجود اسرائیلی قیدیوں کے بارے میں پوچھا گیا تو صدر ایردوان نے کہاکہ’ یہ معاملہ صرف حماس کے کھاتے میں ڈال دینا درست نہیں۔ دوسری طرف نیتن یاہو کے مظالم کو ہم کس طرح نظرانداز کر سکتے ہیں؟’
ایردوان نے اس بات پر بھی زور دیا کہ ‘کیا یہ کہا جا سکتا ہے کہ حماس عسکری طاقت میں اسرائیل سے زیادہ ہے؟ ہرگز نہیں۔ اسرائیل کے پاس جدید ترین ہتھیار ہیں جنہیں وہ بچوں، عورتوں، بوڑھوں اور جوانوں سب کے خلاف سفاکی سے استعمال کرتا ہے۔’
غزہ میں انسانی بحران کے خاتمے سے متعلق سوال پر صدر ایردوان نے امریکی صدر ڈونلڈ ٹرمپ کے دعوے کا حوالہ دیتے ہوئے کہا کہ ‘صدر ٹرمپ نے کہا تھا کہ ‘میں روس۔یوکرین جنگ ختم کر دوں گا’ ۔ کیا ختم ہوئی؟ آج بھی جاری ہے۔ اسی طرح اس نے غزہ جنگ کے بارے میں بھی یہی کہا تھا، لیکن حقیقت سب کے سامنے ہے۔’
حماس کے بارے میں صدر ایردوان نے اپنا پرانا مؤقف دہراتے ہوئے کہاکہ ‘بیس برس قبل جب میں یہاں آیا تھا تو مجھ سے یہی سوال پوچھا گیا تھا اور میں نے تب بھی یہی کہا تھا کہ میں حماس کو دہشت گرد تنظیم نہیں بلکہ ایک مزاحمتی تحریک سمجھتا ہوں۔’
ایف-35 معاملہ اور امریکا سے تعلقات
صدر ایردوان نے امریکی صدر ڈونلڈ ٹرمپ سے جمعرات کو ہونے والی ملاقات کے حوالے سے کہا کہ اس ملاقات میں ایف-35 طیاروں کے معاملے سمیت دیگر دفاعی موضوعات پر بھی بات چیت ہوگی۔
انہوں نے یاد دلایا کہ ترکیہ ایف-35 پروگرام کا باضابطہ شراکت دار اور پیداواری ملک رہا ہے اور اس مقصد کے لیے 1.4 ارب ڈالر کی خطیر رقم بھی ادا کر چکا ہے، لیکن اس کے باوجود ترکیہ کو طیارے فراہم نہیں کیے گئے۔ ایردوان کے بقول یہ رویہ ‘اسٹریٹجک شراکت داری کے منافی اور سراسر غلط ہے۔’
انہوں نے کہا کہ ‘ ہم اس مسئلے کو دوبارہ اٹھائیں گے اور امید کرتے ہیں کہ اس کا کوئی مثبت حل نکلے۔ اس ملاقات میں ایف-16 طیاروں سے متعلق پیش رفت بھی ایجنڈے میں شامل ہے۔’
صدر ایردوان نے مزید کہا کہ ترکیہ اور امریکا کے درمیان تجارت، خصوصاً دفاعی صنعت کے میدان میں، مستقبل میں کہیں زیادہ فروغ پائے گی۔ اس کے ساتھ ساتھ ٹیکنالوجی اور صنعت کے دیگر شعبوں میں بھی تعاون میں اضافہ متوقع ہے۔
یورپی یونین پر تنقید
ایردوان نے اس بات پر افسوس کا اظہار کیا کہ ترکیہ، جو ایک طاقتور نیٹو رکن ملک ہے، گزشتہ پچاس برسوں سے زائد عرصے سے یورپی یونین کے دروازے پر دستک دے رہا ہے لیکن اب تک اسے رکنیت سے محروم رکھا گیا ہے۔ ان کے مطابق یہ طرزِ عمل سراسر ‘غیرمنصفانہ’ ہے۔