نئے مقننہ سال پر صدر ایردوان کا تاریخی خطاب
ترک صدر رجب طیب ایردوان نے ترک گرینڈ نیشنل اسمبلی میں نئے مقننہ سال کے موقع پر میں خطاب کرتے ہوئے کہا کہ گزشتہ دو برس سے غزہ اور فلسطین میں جاری نسل کشی اور ریاستی دہشت گردی کے خلاف سب سے بلند اور مؤثر آواز ترکیہ کی پارلیمان سے اٹھی ہے۔ یہ وہ پارلیمان ہے جو 86 ملین عوام کی نمائندگی کرتی ہے۔ انہوں نے کہا کہ پارلیمان نے سات مشترکہ بیانیے جاری کر کے قوم کے ضمیر کی بھرپور ترجمانی کی اور عالمی برادری کو یہ واضح پیغام دیا کہ ترکیہ فلسطینی عوام کے ساتھ کھڑا ہے۔
صدر اردوان نے مزید کہا کہ پارلیمان کی یہ پوزیشن نہ صرف داخلی سطح پر عوامی جذبات کی عکاس ہے بلکہ عالمی سطح پر ترکیہ کے اصولی موقف کو بھی ظاہر کرتی ہے۔ انہوں نے کہا کہ غزہ میں ہونے والی اجتماعی قتل و غارت گری کے خلاف ترکیہ نے جو غیر متزلزل موقف اختیار کیا، اس سے عالمی سطح پر ایک روشن مثال قائم ہوئی ہے۔
اقوام متحدہ میں قرارداد اور عالمی اثر
29 اگست کو اقوام متحدہ کی جنرل اسمبلی میں منظور ہونے والی قرارداد میں اسرائیل کی جانب سے فلسطینی عوام پر ڈھائے جانے والے مظالم اور نسل کشی کی بھرپور مذمت کی گئی۔ صدر ایردوان کے مطابق یہ قرارداد ان تمام عالمی حلقوں کے لیے پیغام ہے جو ظلم پر خاموش ہیں یا غفلت کی دلدل میں دبے ہوئے ہیں۔
انہوں نے کہا کہ فلسطینی عوام کی حمایت میں پارلیمانی گروپ کی سرگرمیاں بھی ترکیہ کی سفارتی کامیابیوں کا ایک اہم باب ہیں۔ ان سرگرمیوں کے ذریعے ترکیہ نے نہ صرف فلسطینی عوام کی حمایت کا عملی مظاہرہ کیا بلکہ عالمی سطح پر اپنی اصولی پالیسی کو بھی واضح کیا۔
قبلہ اول القدس کا دفاع آخری دم تک کرتے رہیں گے
صدر ایردوان نے کہا کہ ہم نے اپنی زندگی قبلہ اول القدس کی آزادی کے لیے وقف کر رکھی ہے اور اللہ کی رضا سے اپنی آخری سانس تک فلسطین ، قبلہ اول القدس کا بے خوفی سے دفاع کرتے رہیں گے۔ ترکیہ نے غزہ کے عوام کو کبھی تنہا نہیں چھوڑا۔ ہم نے غزہ کو 102 ہزار ٹن سے زائد انسانی امداد بہم پہنچائی ۔ اسرائیل کے ساتھ تجارت مکمل طور پر منقطع کی، عالمی عدالتِ انصاف میں نسل کشی کے مقدمے میں فریق بن کر قانونی اقدامات کیے گئے، اور درجنوں دیگر سفارتی، قانونی اور معاشی اقدامات کیے گئے تاکہ غزہ کے بھائیوں کے ساتھ مضبوط اتحاد قائم ہو۔فلسطینی عوام جانتے ہیں کہ ہم نے ان کے لیے کیا کیا اور کس قربانی کے ساتھ جدوجہد کی۔ انشاء اللہ تاریخ ہمارے موقف کو سنہری حروف میں یاد رکھے گی۔انہوں نے کہا کہ ان اقدامات کے سب سے بڑے گواہ خود غزہ کے عوام ہیں جو جانتے ہیں کہ ترکیہ نے ان کے لیے کس جذبے سے کوشش کی۔
غزہ میں خونریزی: عالمی قیادت کے ایجنڈے پر اولین ترجیح
ٹرمپ سے ملاقات
صدر ایردوان نے انکشاف کیا کہ امریکی صدر ڈونلڈ ٹرمپ کے ساتھ ملاقات میں سب سے پہلا موضوع غزہ میں جاری خونریزی کا خاتمہ تھا۔ ترکیہ نے عملی تجاویز پیش کیں، ممکنہ راستے دکھائے اور واضح کیا کہ پائیدار امن کے لیے کون سے اقدامات ناگزیر ہیں۔
جنگ اور امن پر ترکیہ کا اصول
صدر نے کہا کہ “جنگ کا کوئی فاتح نہیں ہوتا اور عادلانہ امن کبھی ناکام نہیں ہوتا۔” انہوں نے زور دیا کہ فلسطینی عوام اپنی عزت دار جدوجہد کے باعث دنیا کے سب سے زیادہ امن کے مستحق ہیں۔
مستقبل کا وژن
صدر ایردوان نے کہا کہ جب تک 1967 کی سرحدوں پر مبنی اور مشرقی بیت المقدس کو دارالحکومت بنانے والی آزاد فلسطینی ریاست قائم نہیں ہو جاتی، ترکیہ اپنی جدوجہد جاری رکھے گا۔ انہوں نے مزید کہا کہ ترکیہ ہر ممکن سیاسی، سفارتی اور انسانی اقدام کرے گا تاکہ فلسطینی عوام کی زندگیوں میں سکون اور تحفظ لایا جا سکے۔
شام کی علاقائی سالمیت اور انتباہ
صدر ایردوان نے کہا کہ ترکیہ شام کی ارضی سالمیت کا ہمیشہ حامی رہا ہے اور کسی بھی دہشت گرد تنظیم کے قیام کی اجازت نہیں دے گا۔ ترکیہ نہ صرف اپنے داخلی کرد بھائیوں کے لیے بلکہ سرحد پار کے کردوں کے لیے بھی سب سے بڑا اور مخلص ترین حامی اور پناہ گاہ ہے۔ ترکیہ نے اس امر پر بھی زور دیا کہ یہ کاوشیں کسی عجلت یا جذباتیت کے تحت نہیں بلکہ صبر، خلوص اور تدبر کے ساتھ آگے بڑھائی جا رہی ہیں تاکہ خطے میں پائیدار امن کو یقینی بنایا جا سکے۔ تاہم، حکومت نے خبردار کیا ہے کہ اگر یہ کوششیں بے نتیجہ ثابت ہوئیں یا فریقین کی جانب سے مثبت جواب نہ ملا تو ترکیہ کی پالیسی اور موقف کسی سے ڈھکا چھپا نہیں۔ انقرہ ایسے کسی بھی منظرنامے کو ہرگز قبول نہیں کرے گا جو شام میں ماضی کے بحران کو دوبارہ جنم دے۔
مشترکہ مستقبل: ترک-کرد-عرب اتحاد
صدر نے تاریخی مثالیں دیتے ہوئے کہا کہ جس طرح ترک، کرد اور عرب سلطان آلپ ارسلان، صلاح الدین ایوبی اور سلطان محمد فاتح کی افواج میں شانہ بشانہ لڑے، اور چناق قلعہ میں اسلامی سرزمین کا دفاع کیا، اسی طرح مستقبل میں بھی ترک-کرد-عرب اتحاد خطے میں امن و خوشحالی کی ضمانت ہوگا۔
ترک معیشت ، استحکام اور ترقی ، اسٹیٹ بینک کے ریزرو 179 بلین ڈالر
صدر ایردوان نے کہا کہ اس سال ماہ اگست میں 45 ماہ کی سب سے کم افراطِ زر ریکارڈ کی گئی۔ حکومت کا ہدف ہے کہ سال کے آخر تک مہنگائی 30 فیصد سے کم اور 2026 تک 20 فیصد سے نیچے لائی جائے۔بجٹ خسارہ 2025 میں قومی آمدنی کے تناسب سے 3.6 فیصد تک محدود کیا جا رہا ہے، جبکہ برآمدات 269 ارب ڈالر سے تجاوز کر چکی ہیں۔ کرنٹ اکاؤنٹ خسارہ 2025 کے اختتام پر صرف 1.4 فیصد متوقع ہے۔اس دوران ترک لیرا مضبوط ہوا ہے اور مرکزی بینک کے ذخائر 179 ارب ڈالر تک پہنچ گئے جو معیشت کی مضبوطی کا مظہر ہیں۔ بے روزگاری کی شرح 28 ماہ سے مسلسل سنگل ڈجٹ پر ہے۔
سیاحت کے شعبے میں آمدنی کا نیا ریکارڈ
سیاحت سے 2025 کی پہلی ششماہی میں 25.8 ارب ڈالر آمدنی حاصل ہوئی جو ایک نیا ریکارڈ ہے۔ سال کے آخر تک 64 ارب ڈالر کا ہدف طے کیا گیا ہے جوبا آسانی حاصل کرلیا جائے گا۔
2026 اصلاحات اور مستقبل کا وژن
صدر ایردوان نے کہا کہ 2026 ترکیہ کی معیشت کے لیے اصلاحات کا سال ہوگا۔ اس دوران:
- صنعت، زراعت، توانائی اور ٹیکنالوجی میں بڑے پیمانے پر اصلاحات کی جائیں گی۔
- مقامی حکومتوں میں مالی نظم و ضبط، شفافیت اور جواب دہی کو مضبوط کیا جائے گا۔
- صحت، تعلیم، ٹرانسپورٹ، دفاعی صنعت سمیت تمام شعبوں میں نئی پالیسیاں نافذ ہوں گی۔