ترکیہ غزہ کی تعمیر نو اور بین الاقوامی ٹاسک فورس میں حصہ لے گا
صدررجب طیب ایردوان نے صدارتی محل میں موجودملّت کانگریس اور ثقافتی مرکز میں منعقدہ 2025-2026ء اعلیٰ تعلیمی سال کی افتتاحی تقریب سے خطاب کرتے ہوئے کہا کہ مصر میں اسرائیل اور حماس کے درمیان جنگ بندی کے معاہدے پر پہنچنے کی خبر پر انہیں بے حد خوشی ہوئی ہے۔
انہوں نے اپنے خطاب میں کہا کہ ہم اس معاہدے کی تمام متفقہ شقوں پر عمل درآمد کو نہایت باریک بینی ور سنجیدگی سے جائزہ لے رہے ہیں۔ میدانِ عمل میں معاہدے کے نفاذ کی نگرانی کرنے وا لی ٹاسک فورس میں، ان شاءاللہ، ترکیہ بھی شامل ہوگا۔ انہوں نے مزید کہا کہ غزہ کو دوبارہ اپنے پاؤں پر کھڑا کرنے کے لیے ہم بین الاقوامی برادری کے ساتھ مل کر تعمیرِ نو کی سرگرمیوں میں بھرپور تعاون کریں گے۔
ایردوان کا معاہدہ طے کرنے پر خوشی کا اظہار
صدر ایردوان نے اپنےخطاب میں مصر میں جاری مذاکرات سے حاصل ہونے والی خوشخبری پر اپنی خوشی کا اظہار کرتے ہوئے کہا کہ ہم طویل عرصے سے غزہ میں جاری خونریزی کو روکنے کے لیے بھرپور کوششوں میں مصروف تھے۔ پہلے نیویارک میں اقوام متحدہ کی جنرل اسمبلی کے اجلاس کے دوران صدر ٹرمپ کی موجودگی میں غزہ کے حوالے سے ایک خصوصی اجلاس منعقد کیا گیا۔ اس کے بعد واشنگٹن کے دورے میں وائٹ ہاؤس میں صدر ٹرمپ اور ان کی ٹیم کے ساتھ غزہ کے مسئلے پر تفصیلی تبادلہ خیال ہوا۔ صدر ٹرمپ نے 20 نکاتی امن منصوبہ پیش کیا، اور حماس نے مذاکرات کے لیے آمادگی ظاہر کی۔ آج بالآخر اس معاہدے پر دستخط ہو گئے ہیں، جس پر ہمیں دلی طور پر خوشی ہوئی ہے۔
ترکیہ ٹاسک فورس کا حصہ ہوگا
صدر ایردوان نے کہا کہ ہم اس معاہدے میں شروع ہی سے فعال کردار ادا کرتے آئے ہیں، اور اس کے طے پانے پر ہمیں گہری مسرت ہے۔ اب فوری طور پر سب سے اہم مرحلہ یہ ہے کہ جامع انسانی امداد غزہ پہنچائی جائے، قیدیوں اور محبوسین کے تبادلے کو یقینی بنایا جائے، اسرائیل کی جارحانہ کارروائیاں فوراً بند ہوں، اور وہ متعین کردہ حدود تک پسپائی اختیار کرے۔ ہم معاہدے کی تمام شقوں کے نفاذ کی باریک بینی سے نگرانی کریں گے، اور ان شاءاللہ، میدانِ عمل میں اس کی نگرانی کرنے والی ٹاسک فورس میں ترکیہ بھی اپنی جگہ بنائے گا۔ ترک صدر ایردوان نے کہا کہ غزہ کی دوبارہ تعمیر و بحالی کے لیے ہم عالمی برادری کے ساتھ مل کر بھرپور مدد فراہم کریں گے۔ ہمارا مقصد نسل کشی کا خاتمہ اور خطے میں پائیدار امن کا قیام ہے۔ غزہ کے ہمارے بھائی دنیا میں سب سے زیادہ امن، سلامتی اور اطمینان کے مستحق ہیں۔ انہوں نے مزید کہا کہ دو برس بعد پہلی بار غزہ کے مظلوم عوام، خصوصاً معصوم بچوں کے چہروں پر جو مسکراہٹ کے پھول کھلے ہیں، ہم دعاگو ہیں کہ وہ کبھی نہ مرجھائیں۔ ان مسکراہٹوں کو قائم رکھنے کے لیے ہم جو کچھ کر سکتے ہیں، اللہ کے فضل سے کرتے رہیں گے۔
صدر ایردوان نے امریکی صدر ڈونلڈ ٹرمپ کا بھی شکریہ ادا کیا جنہوں نے اسرائیلی حکومت کو جنگ بندی پر آمادہ کرنے میں انتہائی مؤثر کردار ادا کیا۔ اسی طرح انہوں نے قطر اور مصر کا بھی شکریہ ادا کیا جنہوں نے معاہدے کے طے پانے میں اہم اور قابلِ قدر خدمات انجام دیں۔
آخر میں صدر ایردوان نے فلسطینی مزاحمتی تحریک حماس کو بھی ان کے پُرعزم اور دور اندیش موقف پر دل کی گہرائیوں سے مبارکباد دی۔