شہباز شریف کا شرم الشیخ کانفرنس میں خطاب پاکستان کیلیے اعزاز
شرم الشیخ کی فضا اُس وقت جذباتی اور پرشکوہ ہوگئی جب امریکی صدر نے خود پاکستان کے وزیر اعظم شہباز شریف کو مائیک پر آنے کی دعوت دی ، جو پاکستان کے لیے ایک نمایاں سفارتی اعزاز سمجھا جا رہا ہے۔ وزیر اعظم کا پُراثر خطاب نہ صرف بین الاقوامی میڈیا میں سراہا گیا بلکہ عالمی رہنماؤں نے بھی اُن کے امن پسند وژن اور متوازن سفارت کاری کو خراجِ تحسین پیش کیا۔
یہ تاریخی دن پاکستان کے لیے نہ صرف فخر کا لمحہ ہے بلکہ اس بات کا ثبوت بھی کہ عالمی سطح پر وزیر اعظم شہباز شریف کی قیادت میں پاکستان امن، مصالحت اور بین الاقوامی تعاون کے محاذ پر ایک اہم کردار بن کر اُبھرا ہے۔
اس تقریب میں امریکی صدر ڈونلڈ ٹرمپ، پاکستان کے وزیر اعظم شہباز شریف، قطر کے امیر شیخ تمیم بن حمد الثانی، مصر کے صدر ( جو کہ میزبان تھے ) الفتح السیسی اور و ترکیہ کے صدر رجب طیب ایردوان شریک ہوئے۔ عالمی رہنماؤں کی اس مشترکہ کاوش کے نتیجے میں مشرقِ وسطیٰ میں امن کی ایک نئی امید نے جنم لیا۔
صدر ٹرمپ کی خواہش پر خطاب کرتے ہوئے وزیر اعظم پاکستان شہباز شریف نے کہا کہ آج کا دن صرف غزہ نہیں بلکہ پوری انسانیت کے لیے تاریخی ہے۔ جنوبی ایشیا اور مشرقِ وسطیٰ میں قیامِ امن کے لیے صدر ٹرمپ نے جو کردار ادا کیا، وہ لائقِ تحسین ہے۔ اُن کی قیادت میں لاکھوں انسانی جانیں بچی ہیں، اسی لیے پاکستان انہیں امن کے نوبل انعام کے لیے نامزد کرتا ہے۔
وزیر اعظم کی جانب سے امریکی صدر کے لیے اس غیر معمولی خراجِ تحسین پر ہال تالیوں سے گونج اُٹھا۔ صدر ڈونلڈ ٹرمپ نے مسکراتے ہوئے شہباز شریف سے گرمجوش مصافحہ کیا اور مائیک پر کہا کہ مجھے میری تعریف کی توقع نہ تھی ۔ آپ نے واقعی میرے دل کو چھو لیا ہے۔ اب میرے پاس کہنے کو کچھ نہیں بچا ،چلو، اب گھر چلتے ہیں۔
صدر ٹرمپ نے بعدازاں وزیر اعظم شہباز شریف کی تعریف کرتے ہوئے کہا کہ شکریہ، آپ نے نہایت خوبصورت انداز میں گفتگو کی۔ پاکستان ایک عظیم قوم ہے، اور اس کی قیادت امن کی خواہشمند ہے۔
اسی موقع پر صدر ٹرمپ نے ایک اور دلچسپ تبصرہ کرتے ہوئے پاکستانی آرمی چیف فیلڈ مارشل عاصم منیر کو اپنا “فیورٹ فیلڈ مارشل” قرار دیا۔ اُنہوں نے کہا کہ میں وزیر اعظم شہباز شریف اور اپنے فیورٹ فیلڈ مارشل عاصم منیر ، جو یہاں موجود نہیں ہیں ، دونوں کا شکریہ ادا کرتا ہوں۔ غزہ امن معاہدہ ایک تاریخی کامیابی ہے، جس کے پیچھے پاکستان سمیت دوست ملکوں کا کلیدی کردار ہے۔